މޮނިޓަރިން އަށް މިހާރު ލާފައިވާ ރަށްތަކާއި އަދި މާދަމާއިން ފެށިގެން މޮނިޓަރިން އަށް އަލަށް ލާ ރަށްތަކުގައި ވަކި ގަޑިތަކެއްގައި ކާފިއު އިއުލާން ކުރަން ނިންމައިފި އެވެ.
ޑިރެކްޓާ ޖެނެރަލް އޮފް ޕަބްލިކް ހެލްތު، މައިމޫނާ އަބޫބަކުރު ސޮއި ކުރައްވައި މިއަދު ނެރުއްވާފައިވާ އެންގުމެއްގައި ބުނެފައިވަނީ މޮމިޓަރިން އަށް ލާފައިވާ ރަށްތަކާއި އަލަށް މޮނިޓަރިން އަށް ލެވޭ ރަށްތަކުގައި މާދަމާއިން ފެށިގެން ރޭގަނޑު 9:00 އިން ފަތިހު 4:00 އަށް ކާފިއު އިއުލާން ކުރަން ނިންމާފައިވާ ކަމަށެވެ.
މިވަގުތު ތަކުގައި ހުއްދަ ދީފައިވާ ފަރާތްތައް ފިޔަވައި އެހެން ފަރާތަކަށް ބޭރުގައި އުޅުން މަނާވާނެ ކަމަށާއި އަދި އެއްގަމު އުޅަނދު ދުއްވުމަކީވެސް މަނާ ކަމެއް ކަމަށް ވަނީ އަންގާފަ އެވެ. އެހެން ނަމަވެސް ރަށުގައި ބަލި ފެތުރުމުގެ ހާލަތަށް ބަލައި މި ފިޔަވަޅު އަޅާފައިވާ ވަގުތަށް ބަދަލު ގެނެވޭނެ ކަމަށްވެސް މި އެންގުމުގައި ބުނެފައިވެއެވެ.
- ޒަރޫރީ ބޭނުންތަކުގައި މެނުވީ ބޭރަށް ނުނިކުތުން
- ޕާޓީތަކާއި ހަފުލާތަކާއި ރަސްމިއްޔާތުތައް ބޭއްވުން ހުއްޓައިލުން
- އެއް ގެއިން އަނެއް ގެއަށް ޒިޔާރަތްކުރުން ހުއްޓައިލުން
- އެއްފަހަރާ ތިން މީހުންނަށްވުރެ ގިނަ މީހުން މަގުމައްޗާއި އާންމު ތަންތާނގައި އެއްވެ އުޅުން ހުއްޓައިލުން
- ސެލޫންތަކާއި ޖިމްތަކާއި ބޯކޮށާ ތަންތަން ބަންދުކުރުން
- ހުރިހާ ކުޅިވަރު ހަރަކާތްތަކާއި ކަސްރަތުގެ ހަރަކާތްތައް ހިންގުން ހުއްޓައިލުން
- ފިހާރަތަކުން ހިދުމަތްދޭއިރު، އެޗްޕީއޭއިން އާންމުކޮށްފައިވާ ގައިޑްލައިނާ އެއްގޮތަށް ހިދުމަތްދިނުން
- ޔުނިވާސިޓީތަކާއި ކޮލެޖްތަކަށް ދަރިވަރުން ހާޒިރުވެގެން ކްލާސްތައް ކުރިއަށްގެންދިއުން ހުއްޓާލުން
- ހޮޓާތަކާއި ކެފޭތަކާއި ރެސްޓޯރެންޓްތަކާއި ކާބޯތަކެތީގެ ހިދުމަތްދޭ އެހެނިހެން ތަންތަނުން ޓޭކްއަވޭ އަދި ޑެލިވަރީގެ ހިދުމަތް ފިޔަވައި އެހެން ހިދުމަތްތައް ހުއްޓައިލުން
މި އެންގުމާއި ހިލާފުވާ ފަރާތްތަކަށް ފިޔަވަޅު އަޅާނެ ކަމަށްވެސް ވަނީ ބުނެފަ އެވެ.
މިހާރުވެސް ރާއްޖޭގެ 74 ރަށެއް ވަނީ މޮނިޓަރިން ހާލަތަށް ގެނެސްފަ އެވެ.
ޚަބަރު 
ޚަބަރު 
ޚަބަރު 
ޚަބަރު