މާލެއާއި ހުޅުމާލެއާ ދެމެދު ދަތުރުފަތުރު ކުރުމުގައި ދިމާވާ ތޮއްޖެހުމަށް ލުޔެއް ހޯދައިދިނުމުގެ ގޮތުން، ސްކޫލް ކުދިންނަށާއި އޮފީސްތަކަށް ދާ މީހުންނަށް އަމާޒުކޮށްގެން ހާއްސަ ބަސް ދަތުރުތަކެއް ފެށުމަށް ނިންމާފައިވާކަމަށް ޓްރާންސްޕޯޓް އެންޑް އިކޮނޮމިކް މިނިސްޓަރު މުހައްމަދު ސައީދު މިރޭ ވިދާޅުވެއްޖެއެވެ.

ރައީސް އޮފީހާއި، ޕީއެސްއެމް ގުޅިގެން ބާއްވާ "އަހާ" ފޯރަމްގެ އަށްވަނަ ޕްރޮގްރާމުގައި ވާހަކަދައްކަވަމުން ސައީދު ވިދާޅުވީ، ދެވަނަ ފިޔަވަހީގެ ހިޔާ ސަރަހައްދުން ފެށިގެން މާލޭގެ ވެލާނާގެ އަދި ގްރީން ޒޯނާ ހަމައަށް ވަކި ހާއްސަ ގަޑިތަކެއްގައި ދަތުރުކުރާނެ ބަސްތަކެއް ތައާރަފުކުރުމަށް ރާވާފައިވާ ކަމަށެވެ.

"އަދި އެކިއެކި ސްކޫލުތަކާއި ބެލެނިވެރިންނާއި ވާހަކަދައްކައިގެން އަޅުގަނޑުމެން މި ގަސްތުކުރަނީ ސްކޫލުތަކަށް ދަތުރުކުރާ ސްކޫލު ފްރެންޑްލީ ބަސްތަކެއް ހަމަ، މި ދަންނަވާހެން ފޭސް ދޭކާއި ފޭސް އެކަކުން މާލެއާ ދޭތެރޭގެ ދަތުރުތަކެއް ފައްޓަން އެނގޭތޯ" ސައީދު ވިދާޅުވިއެވެ.

ސައީދު ވިދާޅުވީ، އެ ހިދުމަތް ފެށުމުގެ މައިގަނޑު މަގުސަދަކީ ގިނަ އަދަދެއްގެ އުޅަނދުތައް އެއްފަހަރާ ބްރިޖު މަތިން ދަތުރުކުރުމުގެ ސަބަބުން ދިމާވާ ޓްރެފިކް ތޮއްޖެހުމަށް ދާއިމީ ލުޔެއް ހޯދައިދިނުން ކަމަށެވެ. އަދި މި ބަސް ދަތުރުތައް ހިންގާނީ އަލަށް އަމަލުކުރަން ފަށާ އާންމު ދަތުރުފަތުރުގެ ގާނޫނުގެ ދަށުން އުފައްދާ "ގްރޭޓާ މާލެ ޓްރާންސްޕޯޓް އެންޑް މޮބިލިޓީ އޮފީހު"ގެ ބެލުމުގެ ދަށުންކަމަށް މިނިސްޓަރު ވިދާޅުވިއެވެ.

އަލަށް ތަސްދީގުކުރި އެއްގަމު ދަތުރުފަތުރުގެ ގާނޫނުގެ ދަށުން ކުރިއަށް އޮތް ހަ މަސްދުވަހުގެ ތެރޭގައި ގައުމީ ސްޓްރެޓަޖީއެއް އެކުލަވާލައި، ރޯޑް ސޭފްޓީ ކައުންސިލަކާއި އެޑްވައިޒަރީ ކޮމިޓީއެއް އުފައްދާނެއެވެ. މީގެއިތުރުން، މާލެ ސަރަހައްދުގެ ޓްރެފިކް ބެލެހެއްޓުން އިތުރަށް ހަރުދަނާކުރުމަށް ފުލުހުން ހިންގާ ޓްރެފިކް މެނޭޖްމަންޓް ސެންޓަރެއްވެސް ގާއިމުކުރެވިގެންދާނެއެވެ.

މިނިސްޓަރު ވިދާޅުވީ، މި އާ އިންތިޒާމުތަކާއި ސިޔާސަތުތައް ތަންފީޒުވާން ފެށުމުން، ކުރިއަށް އޮތް ތިން އަހަރު ދުވަހުގެ ތެރޭގައި މާލޭ ސަރަހައްދުގެ ޓްރެފިކްގެ މައްސަލައަށް ވަރަށް ބޮޑު، އެދެވޭ ހައްލެއް ލިބިގެންދާނެ ކަމަށެވެ.