ފުޓުބޯޅައިގެ މައި އިދާރާ (ފީފާ) އިން ރާއްޖޭގެ ފުޓުބޯޅަ އެސޯސިއޭޝަން ހިންގަން ނޯމަލައިޒޭޝަން ކޮމިޓީއަކާ ހަވާލުކޮށް، ޒިންމާތައް ބަޔާންކޮށްދީފިއެވެ.

ފީފާއިން މިއަދު ނެރުނު ބަޔާނުގައި ބުނެފައި ވަނީ ފީފާ ކައުންސިލް ބައްދަލުވުމުގައި ނިންމާފައި ވަނީ ފީފާ ސްޓެޓަސްގެ އާޓިކަލް އަށެއްގެ ޕެރެގްރާފް ދެއަކަށް ރިއާޔަތްކޮށް ރާއްޖޭގެ ފުޓުބޯޅަ އިދާރާ ނޯމަލައިޒޭޝަން ކޮމިޓީއަކުން ހިންގުމަށް ކަމަށެވެ. ފީފާއިން ބުނެފައި ވަނީ ރާއްޖޭގެ އެފްއޭ ނޯމަލައިޒް ކުރަން ނިންމާފައި ވަނީ އޭއެފްސީގެ ލަފާގެ ވެސް މަތިން، އިދާރާ ހިންގުމުގެ ކަންކަން ހަމަ މަގަށް އަޅުވައި، ފައިސާގެ މައްސަލަތަކަށް ވެސް ހައްލު ހޯދުމަށް ކަމަށެވެ.

ފީފާއިން ރާއްޖޭގެ އެފްއޭ ނޯމަލައިޒް ކުރަން ނިންމާފައި ވަނީ މަސައްކަތްތައް ނިމެންދެންނެވެ. އެހެން ނަމަވެސް، އެންމެ ލަސްވެގެން ވެސް އެ މަސައްކަތްތައް 31 ޖުލައި 2025 ގެ ކުރިން ނިންމަން ފީފާއިން ޝަރުތު ކޮށްފައިވެއެވެ.

ރާއްޖޭގެ އެފްއޭ ވެސް ފީފާ އާއި އެފްއޭއެމް ގުޅިގެން އެކުލަވާލާ ހާއްސަ ކޮމިޓީއެއްގެ މެމްބަރުންނާ ހަވާލުކުރަން ނިންމާފައިވާ އިރު، އެ މެމްބަރުން އައްޔަން ކުރާނީ ފީފާއިން ހާއްސަ ކަންތައްތަކަށް ބަލައި، ހާއްސަ ރިވިއުތަކެއް ހެދުމަށްފަހު، ފީފާގެ އުސޫލުތަކާއި ހަމަތައް ކުރިއަށް ނެރޭނެ ކަމުގެ ޔަގީންކަމާ އެކުގައި ކަމަށްވެސް ފީފާއިން ބުނެފައިވެއެވެ.

ފީފާއިން ނޯމަލައިޒޭޝަން ކޮމިޓީއާ މަތިކޮށްފައިވާ ޒިންމާތައް އިންތިހާއަށް ބޮޑެވެ. އެގޮތުން އެފްއޭއެމްއިން ދުވަހުން ދުވަހަށް ކުރަން ޖެހޭ މަސައްކަތްތައް ކުރުމުގެ އިތުރުން، އަސާސީ ގަވާއިދާއި އިލެކްޓޯރަލް ކޯޑް ފީފާގެ ސްޓެޓިއުޓްސްއާ އެއްގޮތަށް މުރާޖާކޮށް، އެ އުސޫލުތަކާ އެއްގޮތަށް އަމަލުކުރާކަން ކަށަވަރު ކުރުން ހިމެނެއެވެ. އަދި އޭގެ އިތުރުން ކުރިން އެފްއޭއެމްގައި ތިބި އިސްވެރިންނާއި އެހެނިހެން ފަރާތްތައް ގުޅިގެން ފީފާ އާއި އޭއެފްސީން ދީފައިވާ ފައިސާ ނަހަމަ ގޮތުގައި ބޭނުންކޮށްފައިވާ ނަމަ، އެ ފައިސާ ހޯދުމަށް ރާއްޖޭގެ ގާނޫނުގެ ތެރެއިން ކުރަން ޖެހޭ ކަންކަން ކުރުމަށް ވެސް ނޯމަލައިޒޭޝަން ކޮމިޓީއާ ފީފާއިން މަތިކޮށްފައިވެއެވެ.

އެއީ ބުރަ މަސައްކަތެއްގެ ގޮތުގައި ވެގެންދާނެއެވެ. އެފްއޭއެމްގެ ހިންގާ ކޮމިޓީގެ ދައުރު ހަމަވެފައިވާ އިރު، އެ އިދާރާގެ ކުރީގެ ރައީސް ބައްސާމް އަދީލް ޖަލީލް މިހާރު ވެސް ހުންނެވީ ފުޓުބޯޅައިން ސަސްޕެންޑް ކޮށްފައެވެ. މިދިޔަ މަހު ބައްސާމް ސަސްޕެންޑް ކުރަން ނިންމާފައި ވަނީ އިންޑިޕެންޑެންޓް އެތިކްސް ކޮމިޓީންނެވެ. އޭނާ ސަސްޕެންޑް ކޮށްފައިވަނީ ފީފާގެ ކޯޑް އޮފް އެތިކްސްގެ އާޓިކަލް 86 އަކަށް ރިއާޔަތް ކޮށެވެ.

ފީފާ އިން ނެރުނު ބަޔާނެއްގައި ބުނެފައި ވަނީ ބައްސާމް ސަސްޕެންޑް ކުރަން ނިންމާފައި ވަނީ އިންވެސްޓިގޭޓަރީ ޗެމްބާ އިން އެންގި އެންގުމަކާ ގުޅިގެންނެވެ. އެ ޗެމްބާ އިން ބައްސާމް ސަސްޕެންޑް ކުރަން އެދިފައި ވަނީ ރާއްޖޭގެ ޕްރޮސިކިއުޓާ ޖެނެރަލްގެ އޮފީހުން ހިންގަމުން އަންނަ ބައްސާމްގެ ކޮރަޕްޝަނާއި މަނީ ލޯންޑަރިންގެ ތަހުގީގާ ގުޅިގެންނެވެ.

އޭގެ އިތުރުން ފީފާ ފަންޑުން ނާޖައިޒު ބޭނުންތައް ހިފައި، އެ ނަހަމަ ގޮތުގައި ބޭނުންކުރަމުން ދާ މައްސަލަ ވެސް ބަލަމުންދާ އިރު، ފީފާގެ ޑިވަލޮޕްމެންޓް ފަންޑުވެސް ވަނީ މާޗު މަހުން ފެށިގެން ހުއްޓާލައިފައެވެ.

އޭގެ އިތުރުންވެސް ފީފާއިން އައްޔަން ކޮށްފައިވާ ފީފާގެ ފޮރެންސިކް އޯޑިޓް ރިޕޯޓްގައި ބަޔާންކޮށްފައިވާ ކަންތައްތައް ތަންފީޒުކުރަން ފެށުމާއި އެކްސްޓާނަލް ފައިނޭންޝަލް ކޮންސަލްޓަންޓާ ގުޅިގެން އެފްއޭއެމްގެ ދަރަނި ރީސްޓްރަކްޗާ ކުރުންވެސް ނޯމަލައިޒޭޝަން ކޮމިޓީން ކުރުމަށް ވަނީ ނިންމައިފައެވެ. އަދި އެފްއޭއެމްގެ އިންތިހާބު އާ ގާނޫނީ އޮނިގަނޑެއްގެ މައްޗަށް ބާއްވައި އެގްޒެކެޓިވް ކޮމިޓީއެއް ހޮވުމަށްވެސް އެފްއޭއެމްއިން ފީފާއަށް ވަނީ އަންގައިފައެވެ.

ފީފާއިން އަންގާފައި ވަނީ ނޯމަލައިޒޭޝަން ކޮމިޓީ އެކުލަވާލާނެ ވަކި އަދަދެއް ވަރަށް އަވަހަށް ނިންމާ، މީހުންވެސް އައްޔަން ކުރާނެ ކަމަށެވެ. ކޮމިޓީ އެކުލެވިގެންދާނީ ގާނޫނީ، މާލީ، އަދި ފުޓުބޯޅައާ ގުޅުން ހުރި އެކަށީގެންވާ ތަޖުރިބާކާރުންގެ މައްޗަށް ކަމަށާއި އެ ކޮމިޓީ އެކުލަވާލާނީ ފީފާ އާއި އޭއެފްސީ ގުޅިގެން ކަމަށްވެސް ފީފާއިން އަންގާފައިވެއެވެ.