ލުބުނާންގެ ޚަލީލް ބަދަރް ފޮނުވާލި ޕެނަލްޓީ ގޯލުގެ ހުރަސް ދަނޑިމަތިން ބޭރަށް، އިންޑިއާ ފައިނަލަށް.
އިންޑިއާގެ އުދަންތާ ފޮނުވާލި ޕެނަލްޓީ ކާމިޔާބުކޮށްފި.
ލުބުނާންގެ މުހައްމަދު ސަޑެކް ފޮނުވާލި ޕެނަލްޓީ ކާމިޔާބުކޮށްފި.
އިންޑިއާގެ މަހޭޝް ސިންހް ފޮނުވާލި ޕެނަލްޓީ ވެސް ކާމިޔާބުކޮށްފި.
ލުބުނާންގެ ވާލިދް ޝޫރް ފޮނުވާލި ޕެނަލްޓީ ކާމިޔާބުކޮށްފި.
އިންޑިއާގެ އަންވަރު އަލީ ފޮނުވާލި ޕެނަލްޓީ ކާމިޔާބުކޮށްފި.
ލުބުނާންގެ ކެޕްޓަން މާތޫކް ފޮނުވާލި ޕެނަލްޓީ، އިންޑިއާގެ ކީޕަރު ގުޕްރީތު ސިންހް މަތަކޮށްފި.
އިންޑިއާގެ ފުރަތަަމަ ޕެނަލްޓީ ފޮނުވާލަނީ ކެޕްޓަން ޗެތުރީ، އޭނާގެ ޕެނަލްޓީ ކާމިޔާބުކޮށްފި.
އިތުރު ވަގުތުގެ ދެވަނާ ހާފުގެ ކުޅުން ވެސް ނިންމާލައިފި. ނަތީޖާ ނެރުމަށް ދެން ޖެހޭނީ ޕެނަލްޓީ ޝޫޓްއައުޓަށް ދާން.
'120+2 - ލުބުނާނުން ދެ ބަދަލެއް. ކީޕަރު މެހްދީ ޚަލީލްގެ ބަދަލުގައި ކުޅެން ނުކުތީ ކީޕަރު އަލީ ސަބާހް އަދި ނަދަރް މަތަރްގެ ބަދަލުގައި ކުޅެން ނުކުތީ މުހައްމަދު ސަޑެކް.
'120 - އިންޑިއާއަށް ހުސް ފުރުސަތެއް. ޕެނަލްޓީ އޭރިއާ ތެރޭ ހުސްކޮށް ހުރެ، ލާލިއަންޒުއާލާ ޗަންގްޓޭ ފޮނުވާލި ހަމަލާ، ލުބުނާންގެ ކީޕަރު މެހްދީ ޚަލީލް ވަނީ މަތަކޮށްފައި.
'113 - އިންޑިއާގެ ނުރައްކަލެއް. ކައުންޓާ އެޓޭކެއްގައި ބޯޅަ ހިފައިގެން ޕެނަލްޓީ އޭރިއާ ތެރެއަށް ވަނުމަށްފަހު، އިންޑިއާގެ އުދަންތާ ސިންހް ފޮނުވާލި ހަމަލާ، ލުބުނާންގެ ކީޕަރު މެހްދީ ޚަލީލް ވަނީ މަތަކޮށްފައި.
'109 - ލުބުނާންގެ ޑާވިޗްއަށް ކުރި ފައުލަކާ ގުޅިގެން އިންޑިއާ ޑިފެންޑަރު އަންވަރު އަލީއަށް ރީނދޫ ކާޑެއް.
109 - ލުބުނާންގެ ނުރައްކަލެއް. ޕެނަލްޓީ އޭރިއާ ބޭރުން ޚަލީލް ބަދަރް ފޮނުވާލި ހަމަލާ ދިޔައީ އިންޑިއާ ގޯލުގެ އަރިމަތީ ދަނޑިކައިރިން ބޭރަށް.
އިތުރު ވަގުތުގެ ދެވަނަ ހާފުގެ ކުޅުން ފަށައިފި.
އިތުރު ވަގުތުގެ ފުރަތަމަ ހާފުގެ ކުޅުން ނިންމާލައިފި. އަދިވެސް ނަތީޖާއެއް ނުނެރެވޭ.
'105 - އިންޑިއާއަށް އިތުރު ފުރުސަތެއް. އާކާޝް މިޝްރާ ނަގައިދިން ހުރަހަކުން ޕެނަލްޓީ އޭރިއާ ތެރޭ ހުރެ، އިންޑިއާގެ ކެޕްޓަން ސުނިލް ޗެތުރީ ބޮލުން ފޮނުވާލި ހަމަލާ ދިޔައީ ލުބުނާން ގޯލުގެ ހުރަސް ދަނޑިމަތިން ބޭރަށް.
'102 - އިންޑިއާއަށް ހުސް ފުރުސަތެއް. ލާލިއަންޒުއާލާ ޗަންގްޓޭ ރީތި ހުރަހެއް ނަގައިދިން އިރު، ޕެނަލްޓީ އޭރިއާ ތެރޭގައި އިންޑިއާގެ ދެ ކުޅުންތެރިޔަކު ހުސްކޮށް ހުރި ނަމަވެސް، އެ ބޯޅަ ނިންމައިލެވިފައެއް ނުވޭ.
'100 - އިންޑިއާއަށް އިތުރު ފުރުސަތެއް. އުދަންތާ ސިންހް ނަގައިދިން ހުރަހެއް ލުބުނާންގެ ޑިފެންޑަރުންނަށް ރަނގަޅަށް ދިފާއު ނުކުރެވުމާއެކު ޕެނަލްޓީ އޭރިއާ ތެރެއިން ލިބުނު ބޯޅައަކުން ލާލިއަންޒުއާލާ ޗަންގްޓޭ ފޮނުވާލި ހަމަލާ، ލުބުނާންގެ ކީޕަރު މެހްދީ ޚަލީލް ވަނީ މަތަކޮށްފައި.
ލުބުނާންގެ އޮފިޝަލަކަށް ރަތް ކާޑެއް.
'96 - އިންޑިއާއަށް ހުސް ފުރުސަތެއް. އުދަންތާ ސިންހް ދިން ބޯޅައަކުން ޕެނަލްޓީ އޭރިއާ ތެރޭ ވަރަށް ހުސްކޮށް ހުރެ، އިންޑިއާގެ ކެޕްޓަން ސުނިލް ޗެތުރީ ފޮނުވާލި ހަމަލާ ދިޔައީ ލުބުނާން ގޯލުގެ ހުރަސް ދަނޑިމަތިން ބޭރަށް.
'94 - ލުބުނާނުން ބަދަލެއް. އަނިޔާއާ ގުޅިގެން ހުސައިން ޒެއިންގެ ބަދަލުގައި ކުޅެން ނުކުތީ ޚަލީލް ބަދަރް.
'93 - އިންޑިއާގެ ނުރައްކާތެރި ހަމަލާއެއް. ޕެނަލްޓީ އޭރިއާ ބޭރުން އިންޑިއާގެ ކެޕްޓަން ސުނިލް ޗެތުރީ ފޮނުވާލި ހަމަލާ، ލުބުނާންގެ ކީޕަރު މެހްދީ ޚަލީލް ވަނީ ހުޝިޔާރުކަމާއެކު މަތަކޮށްފައި.
އިތުރު ވަގުތުގެ ފުރަތަމަ ހާފުގެ ކުޅުން ފަށައިފި.
ދެވަނަ ހާފުގެ ކުޅުން ނިންމާލައިފި. މި ހާފު ވެސް ނިމިގެންދިޔައީ ދެ ޓީމުންކުރެ އެއްވެސް ޓީމަކަށް ގޯލެއް ނުޖެހި އެއްވަރުވެގެން.
'90+6 - އިންޑިއާގެ ލާލިއަންޒުއާލާ ޗަންގްޓޭއަށް ކުރި ފައުލަކާ ގުޅިގެން ލުބުނާންގެ ކަރީމް ޑާވިޗްއަށް ރީނދޫ ކާޑެއް.
އިންޑިއާ އިން ބަދަލެއް. މުހައްމަދު ކުރުނިޔަންގެ ބަދަލުގައި ކުޅެން ނުކުތީ އުދަންތާ ސިންހް ކުމާމް.
ދެވަނަ ހާފުގެ އިތުރު ވަގުތުގެ ގޮތުގައި ފަސް މިނެޓުގެ ކުޅުން ދައްކައިފި.
'83 - ލުބުނާންގެ ނުރައްކަލެއް. ޒެއިން އަލް އަބިދީން ދިން ބޯޅައެއް ހިފައިގެން ޕެނަލްޓީ އޭރިއާ ތެރެއަށް ވަނުމަށްފަހު، ލުބުނާން ކެޕްޓަން ހަސަން މާތޫކް ފޮނުވާލި ހަމަލާ، އިންޑިއާގެ ގޯލާ އަމާޒުވެފައެއް ނުވޭ.
މި މެޗު ބަލަން 19،640 މީހުން ވަނީ ދަނޑަށް ވަދެފައި.
'75 - އިންޑިއާ އިން އިތުރު ދެ ބަދަލެއް. އަނިރުދް ތާޕާ އާއި ސުބާޝިސް ބޯސްގެ ބަދަލުގައި ކުޅެން ނުކުތީ މަހޭޝް ސިންހް ނައޮރެމް އަދި ރޯހިތު ކުމާރު.
'72 - އިންޑިއާގެ މުހައްމަދު ކުރުނިޔާން ނަގައިދިން ހުރަސް، ޕެނަލްޓީ އޭރިއާ ތެރެއިން ނުރައްކާވުމުގެ ކުރިން ލުބުނާންގެ ޑިފެންޑަރު ޖޯޖް ފީލިކްސް މެލްކީ ދިފާއުކޮށްފި.
'67 - ލުބުނާންގެ ހަަމަލާއެއް. ޕެނަލްޓީ އޭރިއާ ބޭރުން ލުބުނާންގެ ޒެއިން އަލް އަބިދީން ފޮނުވާލި ހަމަލާ، އިންޑިއާގެ ގޯލާ އަމާޒުވެފައެއް ނުވޭ.
'61 - ލުބުނާންގެ ނުރައްކަލެއް. ނުރައްކާތެރި ހުރަހަކުން ޕެނަލްޓީ އޭރިއާ ތެރޭ ހުރެ، ލުބުނާންގެ ކަރީމް ޑާވިޗް ބޮލުން ފޮނުވާލި ހަމަލާ އަމާޒުވީ އިންޑިއާގެ ކީޕަރު ގުޕްރީތު ސިންހްއާ ދިމާއަށް.
'60 - އިންޑިއާގެ ހަމަލާއެއް. އަނިރުދް ތާޕާ ދިން ބޯޅައަކުން ޕެނަލްޓީ އޭރިއާ ބޭރުން އިންޑިއާގެ ލާލިއަންޒުއާލާ ޗަންގްޓޭ ފޮނުވާލި ހަމަލާ އަމާޒުވީ ލުބުނާން ކީޕަރު މެހްދީ ޚަލީލްއާ ދިމާއަށް.
'58 - އިންޑިއާ އިން ބަދަލެއް. ޕްރިތަމް ކޮޓާލްގެ ބަދަލުގައި ކުޅެން ނުކުތީ ނިކިލް ޗަންދަރްޝޭކަރް ޕުޖާރީ.
'54 - ލުބުނާނުން ބަދަލެއް. އަލީ މާކަބާވީގެ ބަދަލުގައި ކުޅެން ކަރީމް ޑާވިޗް.
މެޗުގެ ފުރަތަމަ ފަސް މިނެޓުގެ ތެރޭގައި ދެ ޓީމަށް ވެސް ގޯލު ޖަހާނެ ރަނގަޅު ފުރުސަތެއް ތަނަވަސްކުރެވިފައެއް ނުވޭ، ނަމަވެސް އިންޑިއާ އިން އެޓޭކުގައި ނުރައްކާކުރުމަށް މަސައްކަތްކުރޭ.
'51 - ލުބުނާންގެ ވާލިދް ޝޫރްއަށް ރީނދޫ ކާޑެއް.
މެޗުގެ ދެވަނަ ހާފުގެ ކުޅުން ފަށައިފި.
ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ ދެ ޓީމުންކުރެ އެއްވެސް ޓީމަކަށް ގޯލެއް ނުޖެހި އެއްވަރުވެގެން.
ފުރަތަމަ ހާފުގެ އިތުރު ވަގުތުގެ ގޮތުގައި ފަސް މިނެޓުގެ ކުޅުން ދައްކައިފި.
'42 - ލުބުނާނުގެ ނުރައްކާތެރި ހަމަލާއެއް. ކެޕްޓަން މާތޫކު އަރިމަތިން ފޮނުވާލި ހިލޭ ޖެހުން ގޯލުގެ ކަނަށް އަމާޒުވާން ދަނިކޮށް ޕަންޗުކޮށް ބޭރުކޮށްލީ އިންޑިއާ ކީޕަރު ގްރަޕްރީތު ސިންހް.
'40 - ހިލޭ ޖެހުމަކުން އިންޑިއާގެ ނުރައްކަލެއް. ޕެނަލްޓީ އޭރިއާ ތެރޭ ހުއްޓައި، ހިލޭ ޖެހުމަކުން ލިބުނު ބޯޅައަކުން އިންޑިއާ ކެޕްޓަން ސުނިލް ޗެތުރީ ފޮނުވާލި ހަމަލާ، ލުބުނާންގެ ޑިފެންޑަރުން ވަނީ ދިފާއުކޮށްފައި.
'36 - ޕެނަލްޓީ އޭރިއާ ބޭރު އަރިމަތިން އިންޑިއާގެ ސުބާސިޝް ބޯސްއަށް ލުބުނާންގެ ޒެއިން އަލް އަބިދީން ކުރި ފައުލަކާ ގުޅިގެން އިންޑިއާއަށް ހިލޭ ޖެހުމެއް.
'31 - ލުބުނާން ކެޕްޓަން ހަސަން މާތޫކު ފޮނުވާލި ހިލޭ ޖެހުން، ޕެނަލްޓީ އޭރިއާ ތެރެއިން ނުރައްކާވުމުގެ ކުރިން އިންޑިއާގެ ކީޕަރު ގުޕްރީތު ސިންހް ކުރިއަށް ނުކުމެ، ދިފާއުކޮށްފި.
'27 - ލުބުނާންގެ އަލީ މާކަބާވީއަށް ރީނދޫ ކާޑެއް.
'24 - އިންޑިއާގެ ނުރައްކަލެއް. އަނިރުދް ތާޕާ ނަގައިދިން ހިލޭ ޖެހުމަކުން ޕެނަލްޓީ އޭރިއާ ތެރޭ ހުރެ، އިންޑިއާގެ ސިބާސިޝް ބޯސް ބޮލުން ފޮނުވާލި ހަމަލާ، ލުބުނާންގެ ގޯލާ އަމާޒުވެފައެއް ނުވޭ.
'20 - އިންޑިއާއަށް އިތުރު ފުރުސަތެއް. އަނިރުދް ތަޕާ ނަގައިދިން ރީތި ހުރަހަކުން ޕެނަލްޓީ އޭރިއާ ތެރޭ ހުރެ، އިންޑިއާގެ ޕްރިތަމް ކޮޓާލް ބޮލުން ފޮނުވާލި ހަމަލާ، ލުބުނާންގެ ގޯލާ އަމާޒުވެފައެއް ނުވޭ.
'17 - އިންޑިއާއަށް ރަނގަޅު ފުރުސަތެއް. ކައުންޓާ އެޓޭކެއްގައި ކެޕްޓަން ޗެތުރީ ދިން ބޯޅައަކުން ޕެނަލްޓީ އޭރިއާ ތެރެއިން ހަމަލާއެއް ފޮނުވާލުމަށް އިންޑިއާގެ ޖީކްސަން ސިންހަށް ފުރުސަތު ލިބުނު ނަމަވެސް، އޭނާ އެ ބޯޅަ ޖައްސާލީ ސަހަލް އަބްދުލް ސަމަދަށް. އޭރު ސަހަލް ހުރީ އޮފްސައިޑް މަގާމެއްގައި.
'14 - ޕެނަލްޓީ އޭރިއާ ބޭރުން އިންޑިއާގެ މުހައްމަދު ކުރުނިޔަން ފޮނުވާލި ހަމަލާ، ލުބުނާންގެ ގޯލާ އަމާޒެއް ނުވި.
މެޗުގެ ފުރަތަމަ ދިހަ މިނެޓުގެ ކުޅުން ނިމުނު އިރު، މުޅިން ވެސް އެޓޭކުގައި ފެނިގެންދިޔައީ ލުބުނާން. ލުބުނާނުން ވަނީ ހުސް ފުރުސަތުތަކެއް ވެސް ތަނަވަސްކޮށްފައި. އިންޑިއާ ފެންނަނީ ވަރަށް ބޮޑަށް ފަހަތަށް ޖެހި، ޑިފެންސަށް ވިސްނައިގެން ކުޅޭތަން.
'9 - ލުބުނާން ކެޕްޓަން ހަސަން މާތޫކަށް ކުރި ފައުލަކާ ގުޅިގެން އިންޑިއާގެ މެހްތާބް ސިންހަށް ރީނދޫ ކާޑެއް.
'8 - ލުބުނާނަށް ހުސް ފުރުސަތެއް. ހަސަން މާތޫކް ދިން ބޯޅައަކުން ޕެނަލްޓީ އޭރިއާ ތެރޭ ވަރަށް ހުސްކޮށް ހުރެ، ލުބުނާންގެ ޒެއިން އަލް އަބިދީން ފޮނުވާލި ހަމަލާ، އިންޑިއާގެ ކީޕަރު ގުޕްރީތު ސިންހް ވަނީ މަތަކޮށްފައި.
މި މެޗުގެ ރެފްރީއަކީ ރާއްޖޭގެ އެލީޓް ރެފްރީ ހުސައިން ސިނާން.
'5 - ޕެނަލްޓީ އޭރިއާ ބޭރުން ނަދަރް މަތަރް ފޮނުވާލި ހަމަލާ، އިންޑިއާގެ ގޯލާ އަމާޒެއް ނުވި.
'2 - ލުބުނާނަށް ހުސް ފުރުސަތެއް. ޒެއިން އަލް އަބިދީން ނަގައިދިން ހުރަހަކުން ޕެނަލްޓީ އޭރިއާ ތެރޭ ހުސްކޮށް ހުރެ، ލުބުނާންގެ ނަދަރްް މަތަރް ފޮނުވާލި ހަމަލާ، އިންޑިއާގެ ގޯލާ އަމާޒުވެފައެއް ނުވޭ.
މެޗުގެ ކުޅުން ފަށައިފި. ކިކްއޯފް ކުރީ އިންޑިއާ އިން.
އިންޑިއާގެ ބެންޗުން ކޯޗު އިގޯ ސްޓިމަކް ނުފެންނާނެ. އޭނާއަށް ވަނީ ކުވައިތާ ދެކޮޅަށް ކުޅުނު މެޗުގައި ރަތް ކާޑެއް ދައްކާފައި. އޭގެ އިތުރުން ޕާކިސްތާނާ ދެކޮޅަށް ކުޅުނު މެޗުގައި ވެސް އޭނާއަށް ވަނީ ރަތް ކާޑެއް ދައްކާފައި. އެހެންކަމުން އިންޑިއާގެ މެޗެއްގެ 90 މިނެޓު ހަމަވަންދެން އިންޑިއާގެ ކޯޗު ސްޓިމަކަށް އަދި ބެންޗުގައި އިނދެވިފައެއް ނުވޭ، މިއީ ސަސްޕެންޝަނުގައި ހުންނަން ޖެހޭ ދެވަނަ މެޗު.
އިންޑިއާ އިން ވެސް ފުރަތަމަ 11 އިން ތިން ބަދަލެއް ފާހަގަކޮށްލެވޭ. އެގޮތުން ކުވައިތު މެޗުގައި ފެނިގެންދިޔަ ގޯލްކީޕަރު އަމްރިންދަރު ސިންހްގެ ބަދަލުގައި މި މެޗުގައި އިންޑިއާގެ ގޯލު ބަލަހައްޓަނީ ގުޕްރީތު ސިންހް ސަންދޫ. އޭގެ އިތުރުން ސުބާސިޝް ބޯސް އާއި ސަހަލް އަބްދުލް ސަމަދަށް އަލުން ފުރަތަަމަ 11 އިން ވަނީ ފުރުސަތުދީފައި. އިންޑިއާގެ ޑިފެންސުން އާންމުކޮށް ފެންނަ މުހިންމު ޑިފެންޑަރު ސަންދޭޝް ޖިންގަން، ކާޑު ހަމަވެގެން މި މެޗަށް ހުރީ ސަސްޕެންޝަންގައި.
ލުބުނާނުން މެޗަށް ނުކުންނަނީ ބަދަލުތަކަކާއެކު. ނަމަވެސް ގްރޫޕު ސްޓޭޖުގައި އެންމެ ރަނގަޅު ކުޅުމެއް ދެއްކި ކުޅުންތެރިން ކުޅުންތެރިން ފުރަތަމަ 11 ގައި ވަނީ ހިމަނާފައި. އެގޮތުން ކެޕްޓަން ހަސަން މާތޫކާއެކު ޑިފެންޑަރު އަބްދުލް ރައްޒާކް ދަކްރަމަންޖީ، މުހައްމަދު ސަޑެކް، ހުސައިން ޒެއިން އަދި ހަސަން ކޫރާނީ ފަދަ ކުޅުންތެރިން ހިމެނޭ.
ސާފް ޗެމްޕިއަންޝިޕްގެ ސެމީ ފައިނަލް ދެވަނަ މެޗުގައި އިންޑިއާއާއި ލުބުނާން ވާދަކުރާ މެޗުގެ ލައިވް ބްލޮގަށް "ވަން ސްޕޯޓްސް"ގެ ކިޔުންތެރިންނަށް މަރުހަބާ!
އިންޑިއާ ސެމީއަށް ނުކުންނަނީ ގްރޫޕް އޭގެ ދެވަނަ ޓީމުގެ ގޮތުގައި. އިންޑިއާއަކީ އެންމެފަހުގެ ޗެމްޕިއަން، އަދި މުބާރާތުގެ އެންމެ ކާމިޔާބު ޓީމު. އެޓީމުން މިރޭ ނުކުންނަނީ ގްރޫޕް ބީގެ އެއްވަނަ ޓީމާ ދެކޮޅަށް. އެއީ ލުބުނާން.
