އާޖެންޓީނާގެ މޮންޓިއާލްގެ ޕެނަލްޓީ ކާމިޔާބުކޮށްފި. އާޖެންޓީނާއަށް ވޯލްޑް ކަޕްގެ ޗެމްޕިއަންކަން.
ފްރާންސްގެ ކޯލޯ މުއާނީގެ ޕެނަލްޓީ ކާމިޔާބުކޮށްފި.
އާޖެންޓީނާގެ ލިއާންޑްރޯ ޕެރޭޑޭސްގެ ޕެނަލްޓީ ކާމިޔާބުކޮށްފި.
ފްރާންސްގެ އޯރެލިއެން ޗުއަމެނީގެ ޕެނަލްޓީ ބޭރަށް.
އާޖެންޓީނާގެ ޕައުލޯ ޑިބާލާގެ ޕެނަލްޓީ ކާމިޔާބުކޮށްފި.
ފްރާންސްގެ ކިންގްސްލީ ކޮމާންގެ ޕެނަލްޓީ އެމިލިއާނޯ މާޓިނޭޒް މަތަކޮށްފި.
އާޖެންޓީނާ ކެޕްޓަން މެސީގެ ޕެނަލްޓީ ކާމިޔާބުކޮށްފި.
ފްރާންސްގެ އެމްބާޕޭ ފޮނުވާލި ޕެނަލްޓީ ކާމިޔާބުކޮށްފި.
އިތުރު ވަގުތުގެ ފަހު 15 މިނެޓުގެ ކުޅުން ވެސް ނިންމާލައިފި. އާޖެންޓީނާ އަދި ފްރާންސް 3-3 ގެ ނަތީޖާއަކުން އެއްވަރު. ނަތީޖާ ނެރުމަށް ދެން ދާން ޖެހޭނީ ޕެނަލްޓީ ޝޫޓްއައުޓަށް.
'120+3 - ފްރާންސަށް ހުސް ފުރުސަތެއް. ޕެނަލްޓީ އޭރިއާ ތެރޭ ހުސްކޮށް ހުރެ، ކޯލޯ މުއާނީ ފޮނުވާލި ބާރު ހަމަލާ، އާޖެންޓީނާ ކީޕަރު އެމިލިއާނޯ މާޓިނޭޒް ވަނީ ހުޝިޔާރުކަމާއެކު މަތަކޮށްފައި.
'120 - ފްރާންސްގެ ނުރައްކަލެއް. އެމްބާޕޭ ނަގައިދިން ހުރަހަކުން ޕެނަލްޓީ އޭރިއާ ތެރޭ ހުރެ، ކޯލޯ މުއާނީ ބޮލުން ފޮނުވާލި ހަމަލާ ދިޔައީ އާޖެންޓީނާ ގޯލުގެ އަރިމަތީ ދަނޑި ކައިރިން ބޭރަށް.
'118 - ޕެނަލްޓީ ކާމިޔާބުކޮށް، ފްރާންސުން އަނެއްކާވެސް ނަތީޖާ ހަމަހަމަކޮށްފި. ފްރާންސަށް އެ ޕެނަލްޓީ ކާމިޔާބުކޮށް، އެމްބާޕޭ ވަނީ ހެޓްރިކް ފުރިހަމަކޮށްފައި. މިއީ ވޯލްޑް ކަޕްގެ ތާރީހުގައި ފައިނަލުގެ ފުރަތަަމަ ހެޓްރިކް.
'116 - ފްރާންސަށް ޕެނަލްޓީއެއް. ފްރާންސަށް އެ ޕެނަލްޓީ ލިބިފައިވަނީ ޕެނަލްޓީ އޭރިއާ ތެރެއިން އާޖެންޓީނާ ޑިފެންޑަރު މޮންޓިއާލް ބޯޅައިގައި އަތްލުމުން.
'113 - ފްރާންސްގެ ބަދަލެއް. ވަރާންގެ ބަދަލުގައި ކުޅެން ނުކުތީ އިބްރާހިމާ ކޮނާޓޭ.
'109 - އާޖެންޓީނާ އިން ގޯލެއް ޖަހައި އަލުން ލީޑު ހޯދައިފި. ލައުޓާރޯ މާޓިނޭޒް ފޮނުވާލި ހަމަލާ، ފްރާންސް ކީޕަރު ހޫގޯ ލޮރިސް މަތަކުރުމާއެކު ލިބުނު ރީބައުންސް ބޯޅައަކުން ޕެނަލްޓީ އޭރިއާ ތެރެއިން ފޮނުވާލި ހަމަލާއަކުން އާޖެންޓީނާއަށް އެ ގޯލު ކާމިޔާބުކޮށްދިނީ އެޓީމުގެ ފުރަތަމަ ގޯލު ވެސް ކާމިޔާބުކޮށްދިން ކެޕްޓަން މެސީ.
'108 - އާޖެންޓީނާގެ ހަމަލާއެއް. ޕެނަލްޓީ އޭރިއާ ތެރެއިން މެސީ ފޮނުވާލި ހަމަލާ، ފްރާންސްގެ ކީޕަރު ލޮރިސް ވަނީ މަތަކޮށްފައި.
އިތުރު ވަގުތުގެ ފަހު 15 މިނެޓުގެ ކުޅުން ފަށައިފި.
އިތުރު ވަގުތުގެ ފުރަތަަމަ 15 މިނެޓުގެ ކުޅުން ނިންމާލައިފި.
'105+1 - އާޖެންޓީނާއަށް އިތުރު ފުރުސަތެއް. ޕެނަލްޓީ އޭރިއާ ތެރެއިން ލައުޓާރޯ މާޓިނޭޒް ފޮނުވާލި ހަމަލާ، ފްރާންސްގެ ގޯލާ އަމާޒުވެފައެއް ނުވޭ.
'105 - އާޖެންޓީނާއަށް ހުސް ފުރުސަތެއް. މެސީ ދިން ބޯޅައަކުން ޕެނަލްޓީ އޭރިއާ ތެރޭ ހުސްކޮށް ހުރެ، ލައުޓާރޯ މާޓިނޭޒް ފޮނުވާލި ހަމަލާ، ފްރާންސްގެ ޑިފެންޑަރު ޑަޔޮޓް އުޕަމެކާނޯ ވަނީ ދިފާއުކޮށްފައި.
'104 - އާޖެންޓީނާގެ ހަމަލާއެއް. ޕެނަލްޓީ އޭރިއާ ތެރެއިން މާކޮސް އަކޫނިއާ ފޮނުވާލި ހަމަލާ، ފްރާންސްގެ ގޯލާ އަމާޒުވެފައެއް ނުވޭ.
'102 - އާޖެންޓީނާ އިން ދެ ބަދަލެއް. އަލްވަރޭޒާއި ޑި ޕޯލްގެ ބަދަލުގައި ކުޅެން ނުކުތީ ލައުޓާރޯ މާޓިނޭޒާއި ލިއާންޑްރޯ ޕަރޭޑޭޒް.
'100 - ފޮފާނާއަށް ކުރި ފައުލަކާ ގުޅިގެން އާޖެންޓީނާ ޑިފެންޑަރު މޮންޓިއާލްއަށް ރީނދޫ ކާޑެއް.
'95 - ފްރާންސުން ބަދަލެއް. ރަބިއޯގެ ބަދަލުގައި ކުޅެން ނުކުތީ ޔޫސުފް ފޮފާނާ.
އާޖެންޓީނާ އިން ނުކުތީ ބަދަލަކާއެކު. މޮލީނާގެ ބަދަލުގައި ކުޅެން ނުކުތީ ގޮންޒާލޯ މޮންޓިއާލް.
އިތުރު ވަގުތުގެ ފުރަތަމަ 15 މިނެޓުގެ ކުޅުން ފަށައިފި.
މެޗުގެ ދެވަނަ ހާފުގެ ކުޅުން ނިންމާލައިފި. ހާފު ނިމިގެންދިޔައީ 2-2 ގެ ނަތީޖާއަކުން ދެ ޓީމު އެއްވަރުވެގެން. ނަތީޖާ ނެރުމަށް ދެން ކުޅޭނީ އިތުރު ވަގުތުގެ ދެ ހާފު.
'90+7 - އާޖެންޓީނާގެ ނުރައްކާތެރި ހަމަލާއެއް. ޕެނަލްޓީ އޭރިއާ ބޭރުން މެސީ ފޮނުވާލި ބާރު ހަމަލާ، ފްރާންސްގެ ކީޕަރު ލޮރިސް ވަނީ މަތަކޮށްފައި.
'90+4 - ފްރާންސްގެ އިތުރު ނުރައްކަލެއް. އެޑުއާޑޯ ކަމަވިންގާ ދިން ބޯޅައަކުން ޕެނަލްޓީ އޭރިއާ ތެރެއިން ރަބިއޯ ފޮނުވާލި ހަމަލާ، އާޖެންޓީނާ ކީޕަރު އެމިލިއާނޯ މާޓިނޭޒް ވަނީ މަތަކޮށްފައި.
'90+3 - ފްރާންސްގެ ނުރައްކަލެއް. ޕެނަލްޓީ އޭރިއާ ބޭރުން އެމްބާޕޭ ފޮނުވާލި ހަމަލާ، އާޖެންޓީނާ ޑިފެންޑަރު އޮޓަމެންޑީ ގައިގައި ޖެހި ވަނީ ބްލޮކްވެފައި.
ދެވަނަ ހާފުގެ އިތުރު ވަގުތުގެ ގޮތުގައި އަށް މިނެޓުގެ ކުޅުން ދައްކައިފި.
'81 - ފްރާންސުން އިތުރު ގޯލެއް ޖަހައި ނަތީޖާ ހަމަހަމަކޮށްފި. މާކަސް ތުރާމް ދިން ބޯޅައަކުން ފްރާންސަށް އެ ގޯލު ކާމިޔާބުކޮށްދިނީ އެޓީމުގެ ފުރަތަމަ ގޯލު ވެސް ކާމިޔާބުކޮށްދިން އެމްބާޕޭ. އޭނާ އެ ގޯލު ޖެހީ ޕެނަލްޓީ އޭރިއާ ތެރޭ ވަރަށް ހުސްކޮށް ހުރެ ފޮނުވާލި ހަމަލާއަކުން. އެ ގޯލާއެކު އެމްބާޕޭ ވަނީ މިފަހަރުގެ ވޯލްޑް ކަޕްގައި އެންމެ ގިނަ ގޯލު ޖެހި ކުޅުންތެރިންގެ ލިސްޓުގެ އެންމެ ކުރިއަށް ޖެހިލާފައި. އޭނާ ވަނީ ހަތް ގޯލު ކާމިޔާބުކޮށްފައި.
'80 - ފްރާންސުން ގޯލެއް ޖަހައި ފަރަގު ކުޑަކޮށްފި. ފްރާންސަށް ޕެނަލްޓީ ކާމިޔާބުކޮށްދިނީ އެމްބާޕޭ. އެ ގޯލާއެކު މެސީއާއެކު އެންމެ ގިނަ ގޯލު ޖެހި ކުޅުންތެރިންގެ ލިސްޓުގެ ކުރިއަށް އަނެއްކާވެސް އެމްބާޕޭ ވަނީ ޖެހިލާފައި. ދެ ކުޅުންތެރިން ވެސް ވަނީ މިފަހަރުގެ ވޯލްޑް ކަޕްގައި ހަ ގޯލު ކާމިޔާބުކޮށްފައި.
'79 - ފްރާންސަށް ޕެނަލްޓީއެއް. ފްރާންސަށް އެ ޕެނަލްޓީ ދީފައިވަނީ ކޯލޯ މުއާނީއަށް އާޖެންޓީނާ ޑިފެންޑަރު ނިކްލަސް އޮޓެމެންޑީ ކުރި ފައުލަކާ ގުޅިގެން.
'72 - ފްރާންސުން ދެ ބަދަލެއް. ތިއޯ ހެނާންޑޭޒްގެ ބަދަލުގައި އެޑުއާޑޯ ކަމަވިންގާ، އަދި ގްރީޒްމަންގެ ބަދަލުގައި ކުޅެން ނުކުތީ ކިންގްސްލީ ކޮމާން.
'71 - ފްރާންސްގެ ހަމަލާއެއް. ބޯޅަ ހިފައިގެން ޕެނަލްޓީ އޭރިއާ ތެރެއަށް ވަނުމަށްފަހު، ކިލިއާން އެމްބާޕޭ ފޮނުވާލި ހަމަލާ ދިޔައީ އާޖެންޓީނާ ގޯލުގެ ހުރަސް ދަނޑިމަތިން ބޭރަށް.
'64 - އާޖެންޓީނާ އިން ބަދަލެއް. ޑި މަރީއާގެ ބަދަލުގައި ކުޅެން ނުކުތީ މާކޮސް އަކޫނިއާ.
'59 - އާޖެންޓީނާއަށް ފުރުސަތެއް. ޑި މަރީއާ ދިން ބޯޅައަކުން ޕެނަލްޓީ އޭރިއާ ތެރެއިން އަލްވަރޭޒް ފޮނުވާލި ހަމަލާ، ފްރާންސް ކީޕަރު ލޮރިސް ވަނީ މަތަކޮށްފައި.
'55 - ރޮޑްރިގޯ ޑި ޕޯލްއަށް ކުރި ފައުލަކާ ގުޅިގެން ފްރާންސް މިޑްފީލްޑަރު އެޑްރިއެން ރަބިއޯއަށް ރީނދޫ ކާޑެއް.
'49 - އާޖެންޓީނާގެ ހަމަލާއެއް. ޕެނަލްޓީ އޭރިއާ ތެރެއިން ޑި ޕޯލް ފޮނުވާލި ހަމަލާ، އަމާޒުވީ ފްރާންސް ކީޕަރު ހޫގޯ ލޮރިސްއާ ދިމާއަށް.
މެޗުގެ ދެވަނަ ހާފުގެ ކުޅުން ފަށައިފި.
މެޗުގެ ފުރަތަމަ ހާފުގެ ކުޅުން ނިންމާލައިފި. ހާފު ނިމިގެންދިޔައީ 2-0 ގެ ނަތީޖާއަކުން އާޖެންޓީނާ ކުރީގައި އޮވެގެން.
'90+7 - ކޯލޯ މުއާނީއަށް ކުރި ފައުލަކާ ގުޅިގެން އާޖެންޓީނާގެ އެންޒޯ ފެނާންޑޭޒަށް ރީނދޫ ކާޑެއް.
ފުރަތަމަ ހާފުގެ އިތުރު ވަގުތުގެ ގޮތުގައި ހަތް މިނެޓުގެ ކުޅުން ދައްކައިފި.
'41 - ފްރާންސުން ދެ ބަދަލެއް. ޑެމްބެލޭ އާއި ޖިރޫގެ ބަދަލުގައި ކުޅެން ނުކުތީ ކޯލޯ މުއާނީ އާއި މާކަސް ތުރާމް.
'40 - ފްރާންސްގެ ފަރާތުން އެދެވޭ ކުޅުމެއް ފެނިގެންނެއް ނުދޭ. ގޯލު ޖަހާނެ ރަނގަޅު ފުރުސަތެއް ވެސް ތަނަވަސްކުރެވިފައެއް ނުވޭ.
'36 - އާޖެންޓީނާ އިން ގޯލެއް ޖަހައި ލީޑު ފުޅާކޮށްފި. ކައުންޓާ އެޓޭކެއްގައި އެލެކްސިސް މެކް އަލިސްޓާ ދިން ބޯޅައަކުން ޕެނަލްޓީ އޭރިއާ ތެރޭ ވަރަށް ހުސްކޮށް ހުރެ ފޮނުވާލި ހަމަލާއަކުން އާޖެންޓީނާއަށް އެ ގޯލު ކާމިޔާބުކޮށްދިނީ ޑި މަރީއާ.
'23 - އާޖެންޓީނާއިން ޕެނަލްޓީ ކާމިޔާބުކޮށް، ލީޑު ހޯދައިފި. އާޖެންޓީނާއަށް އެ ޕެނަލްޓީ ކާމިޔާބުކޮށްދިނީ ކެޕްޓަން ލިއޮނެލް މެސީ. މިއީ މިފަހަރުގެ ވޯލްޑް ކަޕްގައި މެސީ ޖެހި ހަ ވަނަ ގޯލު. އެ ހަ ގޯލުގެ ތެރެއިން ހަތަރު ގޯލު ޖެހީ ޕެނަލްޓީން. އެ ގޯލާއެކު މިފަހަރުގެ ވޯލްޑް ކަޕްގައި އެންމެ ގިނަ ގޯލު ޖެހި ކުޅުންތެރިންގެ ލިސްޓުގެ އެންމެ ކުރިއަށް މެސީ ވަނީ ޖެހިލާފައި.
'21 - އާޖެންޓީނާއަށް ޕެނަލްޓީއެއް. އާޖެންޓީނާއަށް އެ ޕެނަލްޓީ ލިބިފައިވަނީ ޕެނަލްޓީ އޭރިއާ ތެރެއިން އަންހެލް ޑި މަރީއާއަށް ފްރާންސްގެ އޮސްމާން ޑެމްބެލޭ ކުރި ފައުލަކާ ގުޅިގެން.
'20 - ފްރާންސްގެ ހަމަލާއެއް. އެންޓޮއިން ގްރީޒްމަން ނަގައިދިން ހިލޭ ޖެހުމަކުން ޕެނަލްޓީ އޭރިއާ ތެރޭ ހުރެ، އޮލިވިއާ ޖިރޫ ބޮލުން ފޮނުވާލި ހަމަލާ، އާޖެންޓީނާގެ ގޯލާ އަމާޒުވެފައެއް ނުވޭ. ރެފްރީ ނިންމީ ޖިރޫ ފައުލު ކުރި ކަމަށް.
'17 - އާޖެންޓީނާއަށް ރަނގަޅު ފުރުސަތެއް. ރޮޑްރިގޯ ޑި ޕޯލް ދިން ބޯޅަ، ކެޕްޓަން ލިއޮނެލް މެސީއަށް ނުލިބި، އެ ބޯޅަ ލިބުނީ ޕެނަލްޓީ އޭރިއާ ތެރޭ ހުސްކޮށް ހުރި އަންހެލް ޑި މަރީއާއަށް. ނަމަވެސް އޭނާ ފޮނުވާލި ހަމަލާ، ފްރާންސްގެ ގޯލާ އަމާޒުވެފައެއް ނުވޭ.
މެޗުގެ ފުރަތަމަ 15 މިނެޓުގެ ކުޅުން ނިމުނު އިރު، އެޓޭކުގައި ނުރައްކާކޮށް ފެންނަނީ އާޖެންޓީނާ. ނަމަވެސް ދެ ޓީމަށް ވެސް ގޯލު ޖަހާނެ ހުސް ފުރުސަތެއް ލިބިފައެއް ނުވޭ.
'8 - އާޖެންޓީނާގެ އިތުރު ހަމަލާއެއް. ޕެނަލްޓީ އޭރިއާ ބޭރުން ރޮޑްރިގޯ ޑި ޕޯލް ފޮނުވާލި ހަަމަލާ، ފްރާންސް ޑިފެންޑަރު ރަފައެލް ވަރާންގެ ފައިގައި ޖެހި ވަނީ ބްލޮކްވެފައި.
'5 - މެޗުގެ ފުރަތަމަ ހަމަލާ، އާޖެންޓީނާއިން. ހޫލިއަން އަލްވަރޭޒް ދިން ބޯޅައަކުން ޕެނަލްޓީ އޭރިއާ ބޭރުން އެލެކްސިސް މެކް އެލިސްޓާ ފޮނުވާލި ބާރު ހަމަލާ އަމާޒުވީ ފްރާންސް ކީޕަރު ހޫގޯ ލޮރިސްއާ ދިމާއަށް.
މެޗުގެ ކުޅުން ފަށައިފި. ކިކްއޯފް ކުރީ ފްރާންސުން.
ގަތަރު ވޯލްޑް ކަޕްގެ ފައިނަލް މެޗުގައި އާޖެންޓީނާއާއި ފްރާންސް ވާދަކުރާ މެޗުގެ ލައިވް ބްލޮގަށް "ވަން" ގެ ކިޔުންތެރިންނަށް މަރުހަބާ!
