މާސްކް ނާޅައި މަގުމަތީގައި އުޅުނު 151 މީހަކު މިހާތަނަށް ޖޫރިމަނާކޮށްފައިވާ ކަމަށް ހެލްތު އިމަޖެންސީ އޮޕަރޭޝަންސް ސެންޓަރު (އެޗްއީއޯސީ)ގެ ތަރުޖަމާނު ޑރ. ނަޒްލާ ރަފީގު ވިދާޅުވެއްޖެއެވެ.

އެޗްއީއޯސީގައި މިރޭ ބޭއްވި ނޫސްވެރިންގެ ބައްދަލުވުމުގައި ޑރ. ނަޒްލާ ވިދާޅުވީ އިއްޔެ ހަވީރު 6:00 އިން މިއަދު ހަވީރު 6:00އަށް މާސްކް ނާޅައި އުޅުނު 120 ފަރާތަކަށް ފުލުހުން ނަސޭހަތްދީފައިވާ ކަަމަށާއި 19 ފަރާތެއް ޖޫރިމަނާކޮށްފައިވާ ކަމަށެވެ.

"މިއަދާ ހަމައަށް އާއިރު 986 ފަރާތަކަށް ނަސޭހަތްދެވި، 151 ފަރާތެއް ޖޫރިމަނާކޮށްފައިވޭ،" ނަޒްލާ ވިދާޅުވިއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އާންމު ކުރި ގައިޑްލައިނުގައި ގެއިން ބޭރުގައި އުޅޭއިރު ނޭފަތާއި ދަތްދޮޅި ނިވާވާ ގޮތަށް މާސްކު އެޅުން މަޖުބޫރުކޮށްފައިވެއެވެ. އެއީ އުމުރުން ދެ އަހަރުން ދަށުގެ ކުދިން، ކަސްރަތު ކުރަން ނުކުމެ އުޅޭ މީހުން ކަސްރަތު ކުރާ ވަގުތު އަދި އެހެން މީހެއްގެ އެހީއާ ނުލައި މާސްކު އަޅައި މާސްކު ނުނެގޭ މީހުން އިސްތިސްނާވާ ގޮތަށް ކަމަށް އެޗްޕީއޭއިން އާންމު ކުރި ގައިޑްލައިނުގައިވެއެވެ.

މަގުމަތީގައި މާސްކް ނަގައިގެން ސިނގިރޭޓް ބޯން ނުތިބެވޭނެ ކަމަށާއި އެއީ މަނާ ކަމެއް ކަމަށް ނަޒްލާ ވަނީ މީގެ ކުރިން ބޭއްވި ނޫސްވެރިންގެ ބައްދަލުވުމެއްގައި ވިދާޅުވެފައެވެ.

މީގެ އިތުރުން ރެސްޓޯރެންޓްތަކާއި ކެފޭތަކުގެ އެތެރޭގައި އުޅޭއިރުވެސް ކާ ވަގުތު ނޫން އެހެން ވަގުތުތަކުގައި އުޅެން ޖެހޭނީ މާސްކް އަޅައިގެން ކަމަށާއި އެފަދަ ތަންތަނުގެ ހިދުމަތް ހޯދާއިރުވެސް ގައިދުރުކަން ބަހައްޓަން ޖެހޭނެ ކަމަށް ޑރ. ނަޒްލާ ވަނީ ވިދާޅުވެފައެވެ.