ޔޫއެފާ ނޭޝަންސް ލީގު އޭގެ ގްރޫޕް އެކެއްގައި ފްރާންސާއި އިޓަލީން ރޭ ކުޅުނު މެޗު 1-1 އިން އެއްވަރުވި އިރު، އެ ގްރޫޕްގައި ބެލްޖިއަމްއިން 3-0 އިން ތުރުކީ ބަލިކޮށްފިއެވެ.

ފްރާންސުން އާ ކޯޗު ޒައިނެއްދީން ޒިދާންގެ އިރުޝާދުގެ ދަށުން ކުޅުނު ތިން މެޗުގެ ތެރެއިން ދެމެޗުން މޮޅުވެ، ރޭ ޕޮއިންޓެއް ހޯދި އިރު، އެ ޓީމުން ގްރޫޕްގެ އެއްވަނައިގައި އޮތީ ތިން މެޗުން ހަތް ޕޮއިންޓާއެކުގައެވެ. ބެލްޖިއަމް ގްރޫޕްގެ ދެވަނައިގައި ތިން މެޗުން ހަ ޕޮއިންޓާއެކު އޮތް އިރު، އިޓަލީ ތިންވަނައިގައި އޮތީ ތިން މެޗުން ހަތަރު ޕޮއިންޓާއެކުގައެވެ. ތުރުކީއަށް ތިން މެޗުން އަދި ޕޮއިންޓެއް ނުލިބެއެވެ.

ހީކުރި ގޮތަށް މެޗު ޑޮމިނޭޓް ކުރީ ފްރާންސުންނެވެ. ކުރީކޮޅުގައި އިޓަލީ ފަހަތަށް ޖައްސާލައިގެން ފްރާންސުން އެޓޭކަށް ނުކުތް ނަމަވެސް، އެންމެ ފުރަތަމަ ހުސް ފުރުސަތު ލިބުނީ އިޓަލީއަށެވެ. މޮއިސް ކީންއަށް ލިބުނު ހުސް ފުރުސަތުގައި އޭނާ ފޮނުވާލި ބޯޅަ އަމާޒުވީ މައިކް މެންޔޯންއެވެ.

އަނެއްކޮޅުން އިޓަލީ ކީޕަރު ޖިއާންލުއީޖީ ޑޮނަރޫމާ ރޭގެ މެޗުގައި ފެނުނީ ތަފާތު ފޯމެއްގައެވެ. ފުރަތަމަ ހާފުގައި ޑިސައިރޭ ޑޫއޭގެ ދެ ހަމަލާއަކަށްވެސް ޑޮނަރޫމާ ހުރަސް އެޅި އިރު، އޭގެން އެއް ހަމަލާ ޑޮނަރޫމާ އަތުގައި ޖެހިފައި ގޯލްގެ ދަނޑިއަށް އަމާޒުވިއެވެ.

ހާފު ނިމެން ދަނިކޮށް އިޓަލީން އަނެއްކާވެސް ނުރައްކާކުރި އިރު، ކޯނަރުތަކެއްގައި ކުރި ނުރައްކަލުގެ ތެރެއިން ޑާވިޑޭ ފްރަޓޭސީއަށް ލިބުނު ބޯޅައިގައި އޭނާ ފޮނުވާލި ހަމަލާ ބޭރަށް ދިޔައީ ދަނޑީގައި ޖެހިލައިފައެވެ.

ދެވަނަ ހާފު ފެށިގެން 10 ވަނަ މިނެޓުގައި ފްރާންސްގެ ތަފާތު ދައްކައިލިއެވެ. ރަނގަޅު ހިސާބަކުން ލިބުނު ހިލޭ ޖެހުން، މައިކަލް އޮލީސޭ ގޯލަށް ވައްދާލީ ދަނޑީގައި ޖައްސައިފައެވެ. ތަފާތު މޮޅު ހިލޭ ޖެހުމަކާއެކު އޮލީސޭގެ ފެންވަރު ދައްކާލި އިރު، އޭނާގެ ފަރާތުން އިތުރު ހަމަލާތައްވެސް ފެނުނެވެ. އަނެއްކާވެސް ހުރަހަކަށްވީ ޑޮނަރޫމާއެވެ.

އިޓަލީގެ ޑިފެންޑަރު އަލެސާންޑްރޯ ބަސްޓޯނީގެ ތަފާތު ހިތްވަރަކާއެކު އެޓީމުން 68 ވަނަ މިނެޓުގައި ނަތީޖާ ހަމަހަމަ ކުރި އިރު، އޭގެފަހުން ފްރާންސްގެ އިތުރު ދެ ހަމަލާއަކަށް ޑޮނަރޫމާ ހުރަސް އެޅިއެވެ. އެއީ އުސްމާން ޑެމްބެލޭއާއި ރަޔަން ޗާކީގެ ހަމަލާތަކެވެ.

ފަހުކޮޅުގައި ޑަޔޮޓް އުޕަމެކާނޯ، ކީންއަށް ކުރި ފައުލަކަށް ރަތެއް ދެއްކި ނަމަވެސް، އޭގެފަހުންވެސް ބޮޑަށް ނުރައްކާކުރީ ފްރާންސެވެ. އެހެން ނަމަވެސް މެޗު ނިމުނީ އެއްވަރު ވެގެންނެވެ.

ރޭގެ މެޗަށްވެސް ފްރާންސުން ނުކުތީ ކެޕްޓަން ކިލިއަން އެމްބާޕޭއާ ނުލައެވެ. އެއީ އަނިޔާގެ ސަބަބުންނެވެ.

ރޭ ބެލްޖިއަމުން ކުޅުނު މެޗުގައި އެޓީމުގެ ގޯލުތައް ޖެހީ ކެވިން ޑި ބްރޭނާއާއި ރޮމެލޫ ލުކާކޫއެވެ. ޑި ބްރޭނާ ވަނީ މެޗުގައި ދެ ގޯލް ޖަހައިފައެވެ.