ވެރިކަންކުރާ ޕީއެންސީގެ ޓިކެޓުގައި ރަށްރަށުގެ ކައުންސިލްތަކުގައި މިހާރު ތިއްބެވި މެމްބަރުންގެ ދެބައިކުޅަ އެއްބަޔަކީ ސިޔާސީ ގޮތުން އެމަނިކުފާނުގެ "އަތްޕުޅުމައްޗަށް ފެނަށް ދިރުނު" ބޭފުޅުންކަމަށް އެމްޑީޕީގެ ޗެއާޕާސަން އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

އެމްޑީޕީގެ ކޮންގްރެސްގެ ހަވާސާގައި ބޭއްވި އިންވެސްޓް ފޯރަމް ނިންމުމުގެ ރަސްމިއްޔާތުގައި ނަޝީދު މިރޭ ވިދާޅުވީ ރަށްރަށުގެ ތަރައްގީގެ މަޝްރޫއުތަކަށް އެހީތެރިވުމަށް އެމްޑީޕީން ގާއިމުކޮށްފައިވާ ޕްރޮޖެކްޓް އޮފީހަށް ޕީއެންސީގެ ގިނަ ކައުންސިލަރުންތަކެއް ޝައުގުވެރިކަން ފާޅުކުރަމުންދާ ކަމަށެވެ. އަދި އެ ހަރަކާތުގައި ބައިވެރިވުމުގެ ފުރުސަތު އޮތްތޯ ސުވާލުކޮށް ގިނަ މެސެޖުތަކެއް ލިބެމުން އަންނަކަމަށް ނަޝީދު ވިދާޅުވިއެވެ.

ކައުންސިލްތަކަށް ބޭނުންވާ ފަންނީ ލަފަޔާއި މާލީ އެހީތެރިކަން ހޯދައިދިނުމުގެ މަގުސަދުގައި "އިންޓަ ލޯކަލް ކައުންސިލް ޕްރޮޖެކްޓް ޑިވެލޮޕްމަންޓް އޮފީސް"ގެ ނަމުގައި އެމްޑީޕީން މި އިދާރާ އުފެއްދީ މިދިޔަ ޖޫން މަހުއެވެ. މި މަސައްކަތް އިސްވެ ހިންގަވަނީ ކުރީގެ ފިނޭންސް މިނިސްޓަރު އިބްރާހިމް އަމީރެވެ.

ނަޝީދު ވިދާޅުވި ގޮތުގައި ޕީއެންސީގެ ކައުންސިލަރުންނަކީ އެމްޑީޕީއާ އެއްވެސް ވަރަކަށް ބީރައްޓެހި ބައެއް ނޫނެވެ.

"މިހާރު ތިބި ޕީއެންސީ ކައުންސިލަރުންގެ ދެބައިކުޅަ އެއްބައި މީހުން ސިޔާސީ ގޮތުން ފެނަށް ދިރުނީ އެމްޑީޕީގެ ތެރެއަށް. އެހެން ގޮތަކަށް ދަންނަވާ ނަމަ، އަޅުގަނޑުގެ އަތް މައްޗަށް،" ނަޝީދު ވިދާޅުވިއެވެ.

މި ޕްރޮޖެކްޓް އޮފީހަކީ އެމްޑީޕީގެ އިދާރާއަކަށް ވީނަމަވެސް، ޕީއެންސީގެ މެޖޯރިޓީ އޮތް ކައުންސިލްތަކުން އެދުނު ކަމުގައި ވިޔަސް އެއްވެސް ތަފާތުކުރުމެއް ނެތި ފަންނީ އަދި މާލީ އެހީތެރިކަން ފޯރުކޮށްދޭނެ ކަމަށާއި އެ ފުރުސަތު އެ ފަރާތްތަކަށްވެސް ހުޅުވިފައިވާ ކަމަށް ނަޝީދު ވިދާޅުވިއެވެ.