ޔޫއެފާ ނޭޝަންސް ލީގު އޭގައި ސްޕެއިނާއި އިންގްލެންޑުން ރޭ ކުޅުނު މެޗުތައް ކާމިޔާބުކޮށްފިއެވެ.

ސްޕެއިން ގައުމީ ޓީމުން އެންމެފަހުން ކުޅުނު ވާދަވެރި 40 މެޗުންވެސް ބަލިވެފައި ނުވާ އިރު، އޭގެ ތެރެއިން 31 މެޗުން މޮޅުވެފައިވެއެވެ. އަދި ނުވަ މެޗުން ވަނީ އެއްވަރުވެފައެވެ.

ރޭ ސްޕެއިނުން އަމިއްލަ ދަނޑުގައި 4-1 އިން ކްރޮއޭޝިއާ ބަލިކުރި އިރު، މިހާތަނަށް ނޭޝަންސް ލީގު ގްރޫޕް ތިނެއްގައި ސްޕެއިން ވަނީ ދެމެޗުން މޮޅުވެފައެވެ. ރޭގެ މެޗަށް ސްޕެއިން ނުކުތީ ފުރަތަމަ މެޗުގައި އިންގްލެންޑް ބަލިކޮށްފައެވެ.

ގްރޫޕްގައި ކުޅުނު ފުރަތަމަ މެޗުން ބަލިވެފައި އޮތް ޗެކް ރިޕަބްލިކް ކައިރިން އިންގްލެންޑް ރޭ މޮޅުވީ 2-0 އިންނެވެ.

އިންގްލެންޑަށް ރޭގެ މެޗު ފަސޭހަ ވެގެން ދިޔައީ ޕަވެލް ސުލްކަށް ދެއްކި ރަތް ކާޑާއެކުގައެވެ. އެއީ އެލިއޮޓް އެންޑަސަންއަށް ކުރި ނުރައްކާތެރި ފައުލަކަށެވެ.

ފުރަތަމަ ކޮޅުގައި ޗެކް ރިޕަބްލިކުން ނުރައްކާ ކުރި ނަމަވެސް، އެންމެ ފުރަތަމަ ވަރުގަދަ ހަމަލާ ފެނުނީ އިންގްލެންޑުންނެވެ. މޯގަން ރޮޖާސް ފޮނުވާލި ހަމަލާ ދަނޑިއަށް އަމާޒުވި އިރު، އެންޑަސަން ފޮނުވާލި ރިބައުންސް ހަމަލާ މަތަކުރީ އެންޑަސަންއެވެ.

ފުރަތަމަ ހާފުގައި ގޯލެއް ނުފެނުނު ނަމަވެސް، ދެވަނަ ހާފުގެ ފުރަތަމަ މިނެޓުގައި ކަހަލަ ގޮތަކަށް އިންގްލެންޑް ލީޑު ނެގިއެވެ. އެ ގޯލް ޖަހައިދިނީ އެންތަނީ ގޯޑަންއެވެ. އެއީ ޓްރެންޓް އެލެކްސެންޑާ-އާނޯލްޑް ނަގައިދިން ހުރަހަކުން ޖެހި ގޯލެކެވެ.

އޭގެފަހުން އިންގްލެންޑުން ޕްރެޝަރު ބޮޑުކުރި އިރު، 68 ވަނަ މިނެޓުގައި ހެރީ ކޭން ވަނީ ދެވަނަ ގޯލެއް ޖަހައި ނަތީޖާ ޔަގީން ކޮށްދީފައެވެ. ރޮޖާސް ވެއްޓުމުން އެ ލިބުނު ބޯޅައިގައި ކޭން ވަނީ އެއް ފަހަރުން ގޯލަށް ބޯޅަ ވައްދާލައިފައެވެ.

އިންގްލެންޑުން އިތުރަށް ނުރައްކާ ކުރި އިރު، ޖޫޑް ބެލިންހަމްއާއި އެބެރެޗީ އެޒޭ ފޮނުވާލި ހަމަލާތައް މަތަކުރީ ޗެކްގެ ކީޕަރެވެ.

ސްޕެއިން ކުޅުނު މެޗުގައި ޔަމާލް ދެ ގޯލް ޖެހި އިރު، އޭނާ ވަނީ ރޭގެ މެޗުގައިވެސް ދެވަނަ މިނެޓުގައި ގޯލް ޖަހައިފައެވެ. ޔަމާލް ވަނީ އިންގްލެންޑް ކޮޅަށްވެސް އަވަސް ގޯލެއް ޖަހައިފައެވެ. އޭގެ ފަހުންވެސް ސްޕެއިނުން ނުރައްކާ ކުރަމުން ގޮސްފައިވާ އިރު، ޕައު ކުބާސީ ދުރުން ފޮނުވާލި ހަމަލާ ބޭރަށް ދިޔައީ ކިރިޔާއެވެ.

ސްޕެއިނުން ނުރައްކާ ކުރަމުން ދަނިކޮށް މެޗުގެ އޮއެވަރާ ދެކޮޅަށް ގޯލް ޖެހީ ކްރޮއޭޝިއާއެވެ. 30 އަކަށް މިނެޓާ ހަމައަށް ދަނިކޮށް ކްރޮއޭޝިއާގެ ގޯލް ޖެހީ ޑިއޯން ބެލްޖޯއެވެ.

އެހެން ނަމަވެސް އޭގެ ތިން މިނެޓް ފަހުން ސްޕެއިނުން އަނެއްކާވެސް ލީޑު ނެގިއެވެ. އެ ގޯލަކީ ކޯނަރެއްގައި ޔަމާލް ތަނަވަސްކުރި ފުރުސަތުން މާކް ޕުބިލް ޖެހި ގޯލެކެވެ.

ހާފު ނިމުމުގެ ކުރިން ފާމިން ލޮޕޭޒް ފޮނުވާލި ހަމަލާ ދަނޑިއަށް އަމާޒުވި އިރު، 63 ވަނަ މިނެޓުގައި ޔަމާލް ވަނީ އިތުރު ގޯލެއް ޖަހައިފައެވެ. އޭގެ ފަހުން ޕެޑްރީގެ ބާރު ހަމަލާއެއް ނާކާމިޔާބުވި އިރު، ފަހުވަގުތު ހަތަރު ވަނަ ގޯލް ޖެހީ ނިކޯ ވިލިއަމްސްއެވެ.