ޔޫއެފާ ނޭޝަންސް ލީގުގައި ބެލްޖިއަމާއި ފްރާންސް ވާދަކުރި މެޗު ފްރާންސުން ކާމިޔާބު ކުރި އިރު، އާ ކޯޗު ރޮބާޓޯ މަންޗިނީ ހަވާލުވިފަހުން އިޓަލީން ފުރަތަމަ މޮޅެއް ހޯދައިފިއެވެ.

ފްރާންސުން މިހާތަނަށް ނޭޝަންސް ލީގު އޭގެ ގްރޫޕް އެކެއްގައި ކުޅުނު ދެމެޗުވެސް ކާމިޔާބު ކޮށްފައިވާ އިރު، ރޭ ބެލްޖިއަމް ބަލިކުރީ 1-0 އިންނެވެ. އިޓަލީން ކުޅުނު ފުރަތަމަ މެޗުގައި ބެލްޖިއަމް ކައިރިން ބަލިވެފައި އޮވެ ރޭގެ މެޗަށް ނުކުތް އިރު، ރޭ ރަށުން ބޭރުގައި ތުރުކީ ބަލިކުރީ 4-1 އިންނެވެ.

ޒައިނެއްދީން ޒިދާންގެ ކޯޗުކަމުގައި ފްރާންސުން މިހާތަނަށް ކުޅުނު ދެ މެޗުން ވެސް 1-0 އިން މޮޅުވެފައިވާ އިރު، ރޭގެ ކުރިން ތުރުކީ ކައިރިން ކައިރިން މޮޅުވި މެޗުގައި އެޓީމުގެ ކެޕްޓަން ކިލިއަން އެމްބާޕޭއަށް ވަނީ އަނިޔާވެފައެވެ. އެހެންކަމުން ރޭގެ މެޗުގައި އޭނާ ކުޅެފައެއް ނުވެއެވެ.

ފްރާންސުން މެޗު ފެށީ ރަނގަޅަށެވެ. ޑިސައިރޭ ޑޫއޭ، 12 ވަނަ މިނެޓުގައި ގޯލަކާ ގާތަށް ޖެހިލިއެވެ. ޑިފެންޑަރު ކައިރިން ނައްޓާލުމަށްފަހު ފޮނުވާލި ހަމަލާ އަމާޒުވީ ގޯލުގެ ދަނޑިއަށެވެ.

އޭގެ އިރުކޮޅެއްފަހުން ޑޫއޭ ހުރަސްކުރި ބޯޅައިގައި އެސްޓެބަން ޑެޕައުލް ފޮނުވާލި ހަމަލާ މަތަކުރީ ބެލްޖިއަމްގެ ކީޕަރު ސެނޭ ލަމެންސްއެވެ. އަދި ފުރަތަމަ ހާފުގައި މަގްނޭސް އަކްލިއޯޗޭގެ ހިލޭ ޖެހުންވެސް މަތަކުރީ ލަމެންސްއެވެ.

ދެވަނަ ހާފު ފެށިގެން ބެލްޖިއަމުން މަޑުމަޑުން މެޗު ތެރެއަށް ވަނެވެ. ޑޯޑީ ލުކެބާކިއޯގެ ހަމަލާއެއް ބެލްޖިއަމުން ފެނުނު ނަމަވެސް، މައިކަލް އޮލީސޭ ކުޅެން ނުކުތުމާއެކު އަނެއްކާވެސް ފްރާންސްގެ ނުރައްކާ ބޮޑުވިއެވެ.

އޮލީސޭ، 88 ވަނަ މިނެޓުގައި ފްރާންސް މޮޅުކޮށްދިން ގޯލް ޖެހީ ބަދަލަކަށް ނުކުތް ރަޔަން ޗާކީގެ ބޯޅައަކުންނެވެ.

ކުރިން އިޓަލީއާއެކު ޔޫރޯ ކާމިޔާބުކުރި ކޯޗު މަންޗިނީއާއެކު ރޭ ރަށުން ބޭރުގައި ކުޅުނު މެޗުގެ ކުރީކޮޅުގައި އެޓީމުން ލީޑު ނެގިއެވެ. އަލެސާންޑްރޯ ބަސްޓޯނީގެ ގޯލުން ނުވަވަނަ މިނެޓުގައި އިޓަލީ ލީޑު ނެގި އިރު، 22 ވަނަ މިނެޓުގައި މިޝޭލް ކަޔޯޑޭ ތަނަވަސްކޮށްދިން ފުރުސަތެއްގައި ގޯލް ޖެހީ ޑޭވިޑް ފްރަޓޭސީއެވެ.

އެ ގޯލަށް ފަސް މިނެޓް ފަހުން ކަޔޯޑޭ ވަނީ އިޓަލީގެ ތިންވަނަ ގޯލާއެކު މެޗުގެ ކޮންޓްރޯލް ހޯދައިފައެވެ.

ދެވަނަ ހާފު ފެށިގެން ދެވަނަ މިނެޓުގައި ބާރިސް އަލްޕާ ޔިލްމާޒްގެ ގޯލުން ތުރުކީ ހިތްވަރެއް ހޯދި ނަމަވެސް، އޭގެ ދެމިނެޓު ފަހުން އިޓަލީން ހަތަރު ވަނަ ގޯލް ޖެހިއެވެ. އެ ގޯލް ޖަހައިދިނީ ފްރެންސެސްކޯ ޕިއޯ އެސްޕޮސިޓޯއެވެ.

ރޭ ކުޅުނު ޔޫއެފާ ނޭޝަންސް ލީގު ބީގެ މެޗުތަކަށް ބަލާ އިރު، ޖޯޖިއާއާއި ޔުކްރެއިން، ނޮދާން އަޔަލޭންޑާއި ހަންގޭރީގެ މެޗުވެސް ނިމުނީ ގޯލެއް ނުޖެހިއެވެ. ބޮސްނިއާއިން ރޮމޭނިއާ ވާދަކުރި މެޗު، ބޮސްނިއާ 4-2 އިން ބަލިކުރި އިރު، ސްވިޑެން ވަނީ 3-1 އިން ޕޮލެންޑް ބަލިކޮށްފައެވެ.