ދިރާގު ދިވެހި ޕްރިމިއާ ލީގުގައި ނިއު ރޭޑިއަންޓް ސްޕޯޓްސް ކްލަބުން ރާއްޖޭގެ އެންމެފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން ބަލިކުރި މެޗުގައި ހިނގާ ދިޔަ ހަމަނުޖެހުމުގެ ކަންކަން ބަލައި، ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން މާޒިޔާގެ އެސިސްޓެންޓް ކޯޗު އަހުމަދު ސުޒެއިރު 10 މެޗަށް ސަސްޕެންޑްކޮށް، ޖޫރިމަނާ ކޮށްފިއެވެ.

މާޒިޔާއާއި ނިއު ރޭޑިއަންޓް އެންމެފަހުން ލީގުގައި ކުޅުނު މެޗު ނިއު ރޭޑިއަންޓުން ކާމިޔާބުކުރީ 3-2ގެ ނަތީޖާ އަކުންނެވެ.

އެމެޗުގެ ދެވަނަ ހާފުގައި ހަމަނުޖެހުންތަކެއް ހިނގާފައިވެއެވެ. އެއީ ރެފްރީ ފައުލަކަށް ކަށިގަނޑު ފުމުނު ފަހުން، ނިއު ރޭޑިއަންޓްގެ ބިލީޓީ ޖެހި ބޯޅައެއް މާޒިޔާގެ ލޫތު ގައިގައި ޖެހުމުން ހިނގާ ދިޔަ ހަމަނުޖެހުމެކެވެ. އެކަމުގައި ދެޓީމުގެ ކުޅުންތެރިންނާއި އޮފިޝަލުން ދަނޑަށް އަރާފައިވާ އިރު، ކޮންމެވެސް ވަރަކަށް ހަމަނުޖެހުންވެސް ހިނގާފައިވެއެވެ. އެ ވަގުތު ހިނގި ކަންކަމަށް ރެފްރީ ވަނީ އަދަބު ދީފައެވެ. އެގޮތުން ނިއު ރޭޑިއަންޓްގެ ބިލިޓީއާއި އީތަންއަށް ރީނދޫ ކާޑެއް ދެއްކި އިރު، މާޒިޔާގެ ހަސަން ޝިފާޒް (ޑުންގާ) އާއި ނިއުގެ އަބްދުﷲ މައިސާން (މައި) އަށް ރަތް ކާޑެއް ދެއްކިއެވެ. އަދި، މާޒިޔާގެ އެސިސްޓަންޓް ކޯޗު ސުޒެއިރަށްވެސް ރަތް ކާޑެއް ދެއްކިއެވެ.

ސުޒެއިރު، ނިއު ރޭޑިއަންޓް އެސިސްޓަންޓް ކޯޗު ސްޕެއިނުގެ ލޫޝިއާނޯ ސިގޭރާ ބާބޯސާއަށް ހަމަލާދީފައިވާތީ އެ މައްސަލަ ބަލައިދޭން ނިއު ރޭޑިއަންޓުން އެފްއޭއެމްއަށް ހުށަހަޅާފައިވާ އިރު، އެ މައްސަލަ ނިއު ރޭޑިއަންޓުން ފުލުހަށްވެސް ހުށަހެޅިއެވެ. އެހެން ނަމަވެސް ފަހުން ނިއު ރޭޑިއަންޓުން ވަނީ ފުލުހަށް ހުށަހެޅި މައްސަލަ ނަގައިފައެވެ.

އެފްއޭއެމްއިން މިރޭ ނެރުނު ބަޔާނެއްގައި ބުނީ ސުޒެއިރުގެ މައްސަލަ ބަލައި، އެފްއޭއެމްގެ ޑިސިޕްލިނަރީ އެންޑް އެތިކްސް ކޯޑުގެ 34 ވަނަ މާއްދާގެ ދަށޫން ފިޔަވަޅު އަޅާފައިވާ ކަމަށެވެ. އެ ފިޔަވަޅަކީ 10 މެޗަށް ސަސްޕެންޑް ކުރުމާއެކު 15،000 ރުފިޔާއިން ޖޫރިމަނާ ކުރުމެވެ. އެފްއޭއެމްއިން ބުނެފައި ވަނީ އެ ފައިސާ 15 ދުވަހުގެ ތެރޭގައި ދައްކަން އަންގާފައިވާ ކަމަށެވެ.

އޭގެ އިތުރުން އެފްއޭއެމްގެ ބަޔާނުގައި ބުނީ ސުޒެއިރަށް އެޅި ފިޔަވަޅު އެޕީލް ކުރަން ބޭނުންވާ ނަމަ، އެކަން ތިން ދުވަހުގެ ތެރޭގައި ލިޔުމަކުން އެފްއޭއެމްއަށް އެންގުމަށެވެ.