ގދ. ގައްދޫ ސިއްހީ މަރުކަޒުން، މުއްދަތު ހަމަވެފައިވާ އައިވީތަކެއް ކުޑަކުދިންނަށް ދިން މައްސަލައެއްގައި ސިއްހީ މަރުކަޒު ކައިރީގައި އެ ރަށު މީހުން މުޒާހަރާކުރަން ފަށައިފިއެވެ.

ގައްދޫ ކައުންސިލުގެ މެމްބަރު އަހުމަދު ޝަމާހު "ވަން" އަށް މިރޭ ވިދާޅުވީ މުއްދަތު ހަމަވެފައިވާ އައިވީ ތިން ކުއްޖަކަށް ދީފައިވާ ކަމަށެވެ.

"އައިވީ ދޭ އިރަކު ނުއެއް ބަލާނެ ދެއްތޯ މުއްދަތު ހަމަވެފައިތޯއެއް، މަރުކަޒުގައި ބާއްވާފައި އޮތް ކުއްޖަކަށް ގުޅައިފައިވާ އައިވީ ހުސްވެގެން، ބަދަލުކުރުމުގެ ތެރޭގައި އެނގުނީ އެއީ މުއްދަތު ހަމަވެފައިވާ އައިވީއެއްކަން. އެއިރު އިތުރު ތިން ކުއްޖެއްގެ ގަޔަށް ވަނީ އައިވީ ގުޅައިފައި. އެ ތިން ކުދިންގެ ގަޔަށް ގުޅައިފައިވާ އައިވީއަކީ މުއްދަތު ހަމަވެފައިވާ އައިވީއެއްތޯ ސިއްހީ މަރުކަޒުން ބެލީ އެހެންވެ،" ޝަމާހު ވިދާޅުވިއެވެ.

މިކަމާ ގުޅޭގޮތުން އިތުރު މައުލޫމާތު ހޯދުމަށް ގައްދޫ ސިއްހީ މަރުކަޒުގެ މެނޭޖަރަށް ގުޅުމުން ފޯނަށް ޖަވާބުދެއްވާފައިނުވާތީ، އެކަމާ ގުޅޭ އިތުރު މައުލޫމާތު ސާފުވެފައެއް ނުވެއެވެ. ހެލްތު މިނިސްޓްރީގެ މީޑިއާ އޮފިޝަލަށް ގުޅުމުން ވެސް ފޯނަށް ޖަވާބުދީފައެއް ނުވެއެވެ.

ޝަމާހު ވިދާޅުވީ، ވަރަށް ގިނަ އަދަދެއްގެ މީހުން ސިއްހީ މަރުކަޒު ދޮށުގައި މުޒާހަރާ ކުރަމުންދާ ކަމަށާއި އެ ސަރަހައްދުގައި ފުލުހުން ވެސް ހަރަކާތްތެރިވަމުންދާ ކަމަށެވެ.

ސޯޝަލް މީޑިއާގައި އާންމުވެފައިވާ ވީޑިއޯއެއްގައި ވަނީ މުއްދަތު ހަމަވެފައިވާ އައިވީ ކަމަށް ބުނާ އައިވީ ދައްކައިފައެވެ. އެ ވަގުތު އެ ތަނުގައި ފުލުހުންނާއި ނަރުހުން ހަރަކާތްތެރިވަމުން ދިޔައެވެ.