ވޯލްޑް ކަޕް: އެމެރިކާ 1-1 ވޭލްސް (ދެވަނަ ހާފް)

މެޗުގެ އުސްއަލިއްތައް:

މެޗުގެ ކުޅުން ނިންމާލައިފި. މެޗު ނިމިގެންދިޔައީ 1-1 ގެ ނަތީޖާއަކުން ދެ ޓީމު އެއްވަރުވެގެން.

'90+10 - ބޭލްއަށް ކުރި ފައުލަކާ ގުޅިގެން އެމެރިކާގެ އޭކޮސްޓާއަށް ރީނދޫ ކާޑެއް.

'95 - ވޭލްސްގެ އިތުރު ބަދަލެއް. އީތަން އެމްޕަޑޫގެ ބަދަލުގައި ކުޅެން ނުކުތީ ޖޯ މޮރެލް.

'90+3 - ވޭލްސް އިން ބަދަލެއް. ވިލްސަންގެ ބަދަލުގައި ކުޅެން ނުކުތީ ސޯބާ ތޯމަސް. 

ދެވަނަ ހާފުގެ އިތުރު ވަގުތުގެ ގޮތުގައި ނުވަ މިނެޓުގެ ކުޅުން ދައްކައިފި.

'89 - ވޭލްސްގެ ކައުންޓާ އެޓޭކެއް. ކީފާ މޯ ދިން ބޯޅައެއް ހިފައިގެން ޕެނަލްޓީ އޭރިއާ ތެރެއަށް ވަނުމަށްފަހު، ބްރެނަން ޖޯންސަން ފޮނުވާލި ހަމަލާ އަމާޒުވީ އެމެރިކާގެ ކީޕަރު މެޓް ޓާނާގެ އަތަށް.

'88 - އެމެރިކާގެ ބަދަލެއް. ވިއާގެ ބަދަލުގައި ކުޅެން ނުކުތީ ޖޯޑަން މޮރިސް. 

'82 - ވޭލްސް އިން ނަތީޖާ ހަމަހަަމަކޮށްފި. ވޭލްސްގެ ޕެނަލްޓީ ކާމިޔާބުކޮށްދިނީ އެޓީމުގެ ކެޕްޓަން ގެރެތު ބޭލް. މިއީ ވޭލްސްއަށް ބޭލް ކާމިޔާބުކޮށްދިން 41 ވަނަ ގޯލް.

'80 - އެމެރިކާގެ ޕެނަލްޓީ އޭރިއާ ތެރެއިން ވޭލްސް ކެޕްޓަން ބޭލްއަށް ޒިމާމަން ކުރި ފައުލަކާ ގުޅިގެން ވޭލްސްއަށް ޕެނަލްޓީއެއް.

'79 - ވޭލްސް އިން ބަދަލެއް. ނީކޯ ވިލިއަމްސްގެ ބަދަލުގައި ކުޅެން ނުކުތީ ބްރެނަން ޖޯންސަން.

'76 - އެމެރިކާއަށް ފުރުސަތެއް. ޕުލިސިކް ނަގައިދިން ކޯނަރަކުން ޕެނަލްޓީ އޭރިއާ ތެރޭ ހުރެ އާރޮންސަން ބޮލުން ފޮނުވާލި ހަމަލާ، ވޭލްސްގެ ގޯލާ އަމާޒުވެފައެއް ނުވޭ.

'74 - އެމެރިކާގެ ތިން ބަދަލެއް. ޑެސްޓާއި މޫސާ އަދި ސާޖެންޓްގެ ބަދަލުގައި ކުޅެން ނުކުތީ ޑި އަންޑްރޭ ޔެޑްލިން އާއި ކެލީން އޭކޮސްޓާ އަދި ހާޖީ ރައިޓް. 

'72 - ޕުލިސިކް ނުރައްކާތެރި ހުރަހެއް ނެގި ނަމަވެސް، ވޭލްސްގެ ޕެނަލްޓީ އޭރިއާ ތެރެއިން އެމެރިކާގެ ކުޅުންތެރިޔަކަށް އެ ބޯޅަ ލިބޭ ގޮތެއް ނުވި.

'66 - އެމެރިކާގެ ފުރަތަމަ ބަދަލު. މެކެނީގެ ބަދަލުގައި ކުޅެން ނުކުތީ ބްރެންޑެން އޯރޮންސަން.

'65 - ވޭލްސްއަށް އިތުރު ފުރުސަތެއް. ކޯނަރެއްގެ ތެރެއިން ޕެނަލްޓީ އޭރިއާ ތެރޭ ހުރެ، ކީފާ މޯ ބޮލުން ފޮނުވާލި ހަމަލާ ދިޔައީ އެމެރިކާ ގޯލުގެ ހުރަސް ދަނޑިމަތިން ބޭރަށް.

'64 - ވޭލްސްގެ ނުރައްކަލެއް. ޕެނަލްޓީ އޭރިއާ ތެރޭ ހުރެ، ބެން ޑޭވީސް ފޮނުވާލި ހަމަލާ، އެމެރިކާގެ ކީޕަރު މެޓް ޓާނާ ވަނީ މަތަކޮށްފައި.

ވޭލްސް އިން ދަނީ ކުރިއަށް ޖެހި، އެމެރިކާގެ ގޯލަށް ނުރައްކާކުރުމަށް މަސައްކަތްކުރަމުން. ނަމަވެސް ވޭލްސްގެ ހުރަސްތައް ހުއްޓުވުމަށް އެމެރިކާގެ ޑިފެންޑަރުން ރަނގަޅު މަސައްކަތެއް ކުރޭ.

'55 - ކައުންޓާ އެޓޭކެއްގައި ޕެނަލްޓީ އޭރިއާ ތެރެއަށް ވަނުމަށްފަހު، ވޭލްސްގެ ނީކޯ ވިލިއަމްސް ނުރައްކާކުރުމުގެ ކުރިން އެމެރިކާ ޑިފެންޑަރުން އޭނާ އަތުން ބޯޅަ ހޯދައިފި.

ފުރަތަަމަ ހާފުގައި ދެއްކި ކުޅުމަށްވުރެ ދެވަނަ ހާފުގައި ވޭލްސްގެ ކުޅުން ވަރުގަދަ.

'50 - ވޭލްސް ކެޕްޓަން ބޭލްއަށް ކުރި ފައުލަކާ ގުޅިގެން އެމެރިކާ ޑިފެންޑަރު ރީމްއަށް ރީނދޫ ކާޑެއް.

ވޭލްސް އިން ނުކުތީ ބަދަލަކާއެކު. ޑެނިއެލް ޖޭމްސްގެ ބަދަލުގައި ކުޅެން ނުކުތީ ކީފާ މޯ.

މެޗުގެ ދެވަނަ ހާފުގެ ކުޅުން ފަށައިފި. ފެށީ ވޭލްސް އިން.

މެޗުގެ ފުރަތަމަ ހާފުގެ އުސްއަލިތައް:

މެޗުގެ ފުރަތަމަ ހާފުގެ ކުޅުން ނިންމާލައިފި. ހާފު ނިމުނު އިރު، 1-0 ގެ ނަތީޖާއަކުން ކުރީގައި އޮތީ އެމެރިކާ.

'45+3 - އެމެރިކާ ތަރި ޕުލިސިކްއަށް ކުރި ފައުލަކާ ގުޅިގެން ވޭލްސްގެ ކްރިސް މެފަމްއަށް ރީނދޫ ކާޑެއް.

އެމެރިކާގެ ގޯލު ޖަހައިދިން ޓިމޮތީ ވެއާ އަކީ އެފްރިކާގެ ގައުމެއްކަމުގައިވާ ލައިބީރިޔާގެ ރައީސް ޖޯޖް ވެއާގެ ދަރިކަލުން. ޖޯޖް ވެއާއަކީ ފުޓްބޯޅަ ލެޖެންޑެއް. ޖޯޖް ވެއާއަކީ އެފްރިކާއިން މިހާތަނަށް އުފެދުނު އެންމެ މޮޅު ފުޓްބޯޅަ ކުޅުންތެރިޔާ. ފްރާންސްގެ ޕީއެސްޖީއާއި އިޓަލީގެ އޭސީ މިލާނުން ވިދާލި ސުޕަ ސްޓާރެއް. ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާގެ އެވޯޑް މިހާތަނަށް ލިބިފައިވާ އެފްރިކާގެ ހަމައެކަނި ކުޅުންތެރިޔަކީވެސް ޖޯޖް ވެއާ. ޖޯޖް ވެއާ ސިޔާސީ ދާއިރާއަށް ނުކުންނެވީ ފުޓުބޯޅައިން ރިޓަޔާކުރައްވާފައި.

ފުރަތަމަ ހާފުގެ އިތުރު ވަގުތުގެ ގޮތުގައި ހަތަރު މިނެޓުގެ ކުޅުން ދައްކައިފި.

އެމެރިކާގެ ގޯލަށް ފަހު ވޭލްސް އިން އަންނަނީ ގޯލު ޖަހާނެ ފުރުސަތުތަކެއް ހޯދުމަށް މަސައްކަތްކުރަމުން.

'40 - އެމެރިކާގެ ޔޫނުސް މޫސާއަށް ކުރި ފައުލަކާ ގުޅިގެން ވޭލްސް ކެޕްޓަން ގެރެތު ބޭލްއަށް ރީނދޫ ކާޑެއް.

'36 - އެމެރިކާ އިން ގޯލެއް ޖަހައި، ލީޑު ހޯދައިފި. ޕުލިސިކް ދިން ރީތި ބޯޅައަކުން އެމެރިކާއަށް އެ ގޯލު ކާމިޔާބުކޮށްދިނީ ޓިމޮތީ ވެއާ. އޭނާ އެ ގޯލު ޖެހީ ޕެނަލްޓީ އޭރިއާ ތެރެއިން ވަރަށް ހަމަޖެހިލާފައި.

މެޗުގެ 30 މިނެޓުގެ ބޮޑުބައެއް ވޭލްސްގެ ހުރިހާ ކުޅުންތެރިން ހޭދަކޮށްފައިވަނީ އަމިއްލަ ހާފުގެ ތެރޭގައި. އެމެރިކާ އިން ގިނަ ވަގުތު ބޯޅަ ހިފަހައްޓައިގެން ކުޅުނު ނަމަވެސް، މާ ގިނަ ފުރުސަތުތަކެއް ތަނަވަސްކުރެވިފައެއް ނުވޭ.

'29 - އެމެރިކާ ފުލް ބެކް ސާޖީނޯ ޑެސްޓް ދުރުން ފޮނުވާލި ހަމަލާ، ވޭލްސްގެ ގޯލާ އަމާޒު ނުވެ ބޭރަށް.

މެޗުގައި ވޭލްސްއަށް ގިނަ ވަގުތު ބޯޅަ ހިފަހައްޓައިގެން ކުޅުމަށް ވަނީ އުނދަގޫތަކަކާ ކުރިމަތިވެފައި. އެޓީމުގެ ތަރިން، ކެޕްޓަން ގެރެތު ބޭލް އަދި އާރޮން ރަމްސީއަށް ވެސް ރަނގަޅު ބޯޅަތަކެއް ލިބިފައެއް ނުވޭ.

'23 - އެމެރިކާއަށް ފުރުސަތެއް. ޕުލިސިކް ދިން ބޯޅައަކުން ޕެނަލްޓީ އޭރިއާ ތެރެއިން އެންޓޮނީ ރޮބިންސަން ފޮނުވާލި ހަމަލާ، ވޭލްސްގެ ޑިފެންޑަރުން ވަނީ ދިފާއުކޮށްފައި.

އެމެރިކާގެ ވޯލްޑް ކަޕް ތާރީހަށް ނަޒަރެއް

މެޗުގެ ފުރަތަމަ 15 މިނެޓުގެ ތެރޭގައި ނުރައްކާ ޓީމެއްގެ ގޮތުގައި ފާހަގަވަނީ އެމެރިކާ. އެޓީމުން އަންނަނީ ކުރިއަށް ޖެހި ނުރައްކާކުރަމުން. ވޭލްސްއަށް އެމެރިކާގެ ގޯލަށް ނުރައްކާކުރުމަށް ރަނގަޅު ފުރުސަތުތަކެއް ތަނަވަސްކުރެވިފައެއް ނުވޭ.

'14 - ވޭލްސްގެ ހަމަލާއެއް. އެމްޕަޑޫ ދުރުން ފޮނުވާލި ހަމަލާ ދިޔައީ އެމެރިކާ ގޯލުގެ ހުރަސް ދަނޑިމަތިން ބޭރަށް.

'13 - ވޭލްސްގެ ނީކޯ ވިލިއަމްސްއަށް ކުރި ފައުލަކާ ގުޅިގެން އެމެރިކާގެ ވެސްޓަން މެކެނީއަށް ރީނދޫ ކާޑެއް.

'11 - ފައުލަކާ ގުޅިގެން އެމެރިކާ ޑިފެންޑަރު ސާޖީނޯ ޑެސްޓްއަށް ރީނދޫ ކާޑެއް.

'9 - ކައިރިކައިރީގައި އެމެރިކާއަށް ދެ ފުރުސަތެއް. ޓިމޮތީ ވެއާ ނަގައިދިން ހުރަސް، ވޭލްސް ޑިފެންޑަރު ރޮޑޮން ގައިގައި ޖެހިފައި ބައިކޮޅަށް ވަންނަން ދަނިކޮށް، ވޭލްސްގެ ކީޕަރު ހެނެސީ ވަނީ މަތަކޮށްފައި. ދެވަނައަށް ލިބުނު ފުރުސަތުގައި ރޮބިންސަން ދިން ބޯޅައަކުން ޕެނަލްޓީ އޭރިއާ ތެރެއިން އެމެރިކާގެ ޖޯޝް ސާޖެންޓް ފޮނުވާލި ހަމަލާ ގޯލާ އަމާޒުވެފައެއް ނުވޭ.

'4 - މެޗުގެ ފުރަތަމަ ކޯނަރު އެމެރިކާއަށް. ޕުލިސިކް ނަގައިދިން ކޯނަރުގައި ނުރައްކަލެއް ނެތް.

'2 - ޕުލިސިކްއަށް ވޭލްސްގެ ރޮޑޮން ކުރި ފައުލަކާ ގުޅިގެން އެމެރިކާއަށް ހިލޭ ޖެހުމެއް.

މެޗުގެ ކުޅުން ފަށައިފި. ކިކްއޯފް ކުރީ އެމެރިކާ އިން.