ހުޅުމާލޭގައި އިމާރާތް ކުރަމުން އަންނަ ވިނަރެސް ފްލެޓުތައް ގަންނަން 288 އަށް ފަރާތަކުން ހުށަހަޅާފައިވާ ކަމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން ބުނެފިއެވެ.

ވިނަރެސް ފްލެޓްތައް ވިއްކަން ނިންމާފައިވަނީ ސީލައިފް ގްލޯބަލް އިންކް ޕްރައިވެޓް ލިމިޓެޑަށް އެޕާޓްމަންޓް ގަތުމަށް ފައިސާ ދައްކާފައިވާ މީހުންނާއި ހިޔާ މަޝްރޫއުން ފްލެޓް ދޫކޮށްލި މީހުންނާއި ގުޅީފަޅުން ފްލެޓް ދޫކޮށްލި މީހުންނަށް އަދި ބާކީ ހުރި ފްލެޓްތައް މާލޭގައި ދިރިއުޅޭ ރައްޔިތުންނަށް ވިއްކުމަށެވެ.

އެޗްޑީސީން މިއަދު "ވަން" އަށް ބުނީ ސީލައިފް ގްލޯބަލް އިން ހުޅުމާލޭގައި ހަދަން ނިންމި އެޕާޓްމަންޓްތައް ގަތުމަށް ފައިސާ ދެއްކި މީހުންގެ ތެރެއިން 117 މީހަކު ވިނަރެސް ފްލެޓް ގަތުމަށް ހުށަހަޅާފައިވާ ކަމަށެވެ. އަދި ހިޔާ ފްލެޓް ދޫކޮށްލުމަށް ފަހު ވިނަރެސް އިން ފްލެޓް ގަތުމަށް 79 މީހަކު ހުށަހެޅި ކަމަށެވެ. ނަމަވެސް އޭގެ ތެރެއިން ހަތަރު މީހަކު ވަނީ އެޕްލިކޭޝަން ކެންސަލްކޮށްފައެވެ.

މީގެ އިތުރުން ގުޅީފަޅުން ފްލެޓް ދޫކޮށްލި މީހުންގެ ތެރެއިން 96 ފަރާތަކުން ވިނަރެސް ފްލެޓް ގަތުމަށް ހުށަހަޅާފައިވާ ކަމަށްވެސް އެޗްޑީސީން ބުންޏެވެ.

އެޗްޑީސީން މީގެ ކުރިން ބުނެފައިވާ ގޮތުގައި ވިނަރެސް ފްލެޓުތައް މިއަހަރުގެ ޖުލައި މަހުގެ ތެރޭގައި ނިމޭނެއެވެ.

ވިނަރެސް މަޝްރޫއުގެ ދަށުން ޖުމުލަ ދިހަ ޓަވަރު ހަދާނެއެވެ. މި ޓަވަރުތަކުގައި ޖުމުލަ 1340 އެޕާޓްމަންޓާ އެކު ހަތަރު ވައްތަރެއްގެ އެޕާޓްމަންޓް ހުންނާނެއެވެ. އެއީ މެރީނާ ވިއު، އިނާ ވިއު، އައުޓާ ވިއު އަދި ސްޓޭންޑާޑް ވިއުއެވެ. މި ހުރިހާ ވައްތަރެއްގައިވެސް ހުންނާނީ ތިން ކޮޓަރީގެ އެޕާޓްމަންޓުތަކެވެ.

އިނާ ވިއު، އައުޓާ ވިއު އަދި މެރީނާ ވިއު އެޕާޓްމަންޓުތަކުގެ ބޮޑުމިނުގައި 902 އަކަފޫޓު ހުންނާނެއެވެ. ސްޓޭންޑާޑް ވިއު އެޕާޓްމަންޓުތަކުގެ ބޮޑުމިނުގައި ހުންނާނީ 883 އަކަފޫޓެވެ.

އެޗްޑީސީން ކުރިން ބުނެފައިވާ ގޮތުން، މި ފްލެޓުތަކުގެ ފިނިޝިންގެ މަސައްކަތް ނިމޭ އިރު، ލިވިން ރޫމާއި ކޮޓަރިތަކުގައި ހުންނާނީ ތަށިމުށި ޖަހައިފައެވެ. ފާހާނާގެ ތަޅުމާއި ފާރުގައި ވެސް ތަށިމުށި ޖަހައި، ފާހާނާގައި ފިކްސްޗާސްތައް ވެސް ހަރުކޮށްފައި ހުންނާނެއެވެ.

އޭގެ އިތުރުން ބަދިގެ ކަބަޑު ސެޓު ހަރުކޮށް، ބެލްކަނި ހުންނާނީ ދޮންނަ މެޝިން ބެހެއްޓޭ ގޮތަށެވެ. ލިވިން ރޫމާއި ކޮޓަރިތަަކުގައި އޭސީ ހަރުކޮށްފައި ހުންނާނެއެވެ. ނަމަވެސް އެޕާޓްމަންޓްތައް ހަވާލުކުރާއިރު އެތަނުގައި ފަރުނީޗަރެއް ނުހުންނާނެއެވެ.

އެޗްޑީސީން ބުނީ، އެތަންތަން ވިއްކަނީ ތިން މޮޑެލެއްގެ ދަށުން ކަމަށެވެ. އެއީ ލީސް ޓު އޯން މޮޑެލް، އޯން އިކުއިޓީ ފައިނޭންސިން މޮޑެލް އަދި އެންޑް ޔޫޒާ މޮޑެލްއެވެ.

ލީސް ޓު އޯން މޮޑެލްގެ ދަށުން ދެ ގޮތެއް ލިބޭނެއެވެ. ފުރަތަމަ ގޮތަކީ އެޕާޓްމަންޓް އަގުގެ 15 ޕަސެންޓް ޑައުންޕޭމަންޓުގެ ގޮތުގައި ދެއްކުމަށް ފަހު، 20 އަހަރަށް ބަހާލައިގެން ފައިސާ ދެއްކުމެވެ. ދެވަނަ ގޮތަކީ ޑައުންޕޭމަންޓަށް ވިހި ޕަސެންޓް ދައްކައިފިނަމަ 25 އަހަރަށް ބަހާލައިގެން ފައިސާ ދެއްކުމެވެ.

އޯން އިކުއިޓީ ފައިނޭންސިން މޮޑެލްގެ ދަށުން، ޕްރޮޖެކްޓުގެ އަގު އެއް ފަހަރާވެސް ދެއްކޭނެއެވެ. އަދި ބަހާލައިގެން ޕޭމަންޓް ޝެޑިއުލްގެ ދަށުންވެސް ފައިސާ ދެއްކޭނެއެވެ. އެންޑް ޔޫސާ ފައިނޭންސިން މޮޑެލްގެ ދަށުން ބޭންކެއް ނުވަތަ އެހެން ފައިނޭންޝަލް އިންސްޓިޓިއުޓެއް މެދުވެރިކޮށް ލޯނެއްގެ ދަށުން އެޕާޓްމަންޓް ގަނެވޭނެއެވެ. އޯން އިކުއިޓީ ނުވަތަ އެންޑް ޔޫޒާ މޮޑެލް ބޭނުންކުރާނަމަ ދިހަ ޕަސެންޓްގެ ޑިސްކައުންޓެއް ވެސް ލިބޭނެއެވެ.