އޭޝިއަން ގޭމްސްގެ ކްރިކެޓް ރަން މެޑަލް އަނެއްކާވެސް އިންޑިއާއަށް

ޖަޕާނުގެ އައިޗީ-ނަގޯޔާގައި ކުރިއަށްދިޔަ އޭޝިއާގެ އެންމެ ބޮޑު ކުޅިވަރު ހަރަކާތް، އޭޝިއަން ގޭމްސްގެ ކްރިކެޓްގެ ފިރިހެން އަދި އަންހެން ރަން މެޑަލްވެސް އިންޑިއާއިން ހޯދައިފިއެވެ.

މިއަހަރުގެ އޭޝިއަން ގޭމްސްގައި 11،000 އެއްހާ އެތުލީޓުން ވާދަކޮށްފައިވާ އިރު، އިންޑިއާއިން ވަނީ 500 އަށްވުރެ ގިނަ އެތުލީޓުން ވާދަކޮށްފައިވެއެވެ. އިންޑިއާއިން މިހާތަނަށް 21 ރަން މެޑަލް ހޯދާފައިވެއެވެ. އިންޑިއާގެ ކްރިކެޓް ޓީމުން ރަން މެޑަލް ހޯދީ، ވާދަވެރި ޕާކިސްތާން ބަލިކޮށްގެންނެވެ. ޓީ20 ފޯމެޓަށް އޭޝިއަން ގޭމްސްގެ ކްރިކެޓް އިވެންޓް ކުރިއަށްދާ އިރު، އިންޑިއާއިން ފައިނަލް މެޗު ކާމިޔާބުކުރީ 19 ލަނޑުން މޮޅުވެގެންނެވެ.

އިންޑިއާއަށް ޓޮސް ދިމާވުމުން ނިންމީ ކުޅެން އަރާށެވެ. ކުޅެން އަރައި 20 އޯވަރު ހަމަވި އިރު، ހަ ކުޅުންތެރިން ނުބައިވެގެން އިންޑިއާއިން ވަނީ 211 ލަނޑު ހަދައިފައެވެ. އަބީޝޭކް ޝަރުމާ ވަނީ 28 ބޯޅައިން 61 ލަނޑު ހަދައި، ތަފާތު ދައްކައިފައެވެ. އަދި ތިލަކު ވަރުމާ ވަނީ 22 ބޯޅައިން 51 ލަނޑު ހަދައިފައެވެ.

ޕާކިސްތާނުން ބަދަލުގައި ކުޅެން އަރައި، 20 އޯވަރުން ހަ ކުޅުންތެރިން ނުބައިވެގެން ހެދުނީ 192 ލަނޑެވެ. ޕާކިސްތާނުގެ ހަސަން ނަވާޒް 96 ލަނޑު ހެދި ނަމަވެސް، ދެން ތިބި ކުޅުންތެރިންނަށް އެ ތަފާތު ދެއްކިފައެއް ނުވެއެވެ.

އޭޝިއަން ގޭމްސްގައި ފުރަތަމަ ފަހަރަށް ކްރިކެޓް ހިމެނުނީ 2010 ވަނަ އަހަރު ގުއާންޒޯގައެވެ. އޭގެފަހުން އިންޗެއޯންގައި 2014 ވަނަ އަހަރު ބޭއްވި ގޭމްސްގައިވެސް ކްރިކެޓް ހިމަނާފައިވާ އިރު، 2018 ވަނަ އަހަރު އޭޝިއަން ގޭމްސްގައި ކްރިކެޓް ނުހިމެނެއެވެ. އަލުން 2022 ވަނަ އަހަރާއި މިއަހަރުވެސް ކްރިކެޓް ހިމެނުނު އިރު، މިދިޔަ ދެފަހަރުވެސް ފިރިހެން އަދި އަންހެން ކްރިކެޓް ޗެމްޕިއަނަކީ އިންޑިއާއެވެ. ގުއާންޒޯގައި ބޭއްވި އޭޝިއަން ގޭމްސްގެ ފިރިހެން ޗެމްޕިއަންކަން ބަންގްލަދޭޝް ހޯދި އިރު، އޭގެފަހުން 2014 ވަނަ އަހަރު ރަން މެޑަލް ހޯދީ ސްރީ ލަންކާއެވެ. އެ ދެފަހަރުވެސް އަންހެން ކްރިކެޓް ޗެމްޕިއަނަކީ ޕާކިސްތާނެވެ.