މިއަހަރުގެ އޭޝިއަން ގޭމްސްގައި 11،000 އެއްހާ އެތުލީޓުން ވާދަކުރެއެވެ. ބޮޑެތި އެތައް އިވެންޓްތަކެއް މިހާތަނަށް ފެނިގެން ގޮސްފައިވެއެވެ. އެތައް ތާރީހީ ވާހަކައެއް، އެތައް ތާރީހީ ކާމިޔާބީތަކެއް ޓްރެކްތަކުންނާއި ކޯޓުތަކުންވެސް ފެނިއްޖެއެވެ. ގާތްގަނޑަކަށް 45 ވަރަކަށް ގައުމުން، 43 ކުޅިވަރެއްގައި ވާދަކުރެއެވެ. އެއީ 469 އިވެންޓެއްގައެވެ. އޭޝިއާގެ އިތުރުން ދުނިޔޭގެ އެންމެ ވަރުގަދަ އެތުލީޓުން އޭޝިއަން ގޭމްސްއިން ފެނިގެން ދެއެވެ.

ޖަޕާނުގެ އައިޗީ- ނަގޯޔާގެ ބައެއް އިންތިޒާމުތަކަށް ފާޑުކިޔުންތައް ހުރި ނަމަވެސް، މިފަހަރުގެ އޭޝިއަން ގޭމްސްއަކީވެސް ޒުވާން ތަރިންގެ ގޭމްސްއެކެވެ. ހާއްސަކޮށް އޭޝިއާއިން އާ ޖީލެއް އުފައްދަމުން އަންނަކަން ސާފުވި އޭޝިއަން ގޭމްސްއެކެވެ. އެންމެ ކާމިޔާބު އެއް ގައުމު، ޗައިނާގެ ކޮންޓިންޖެންޓްގެ ތަފާސްހިސާބުންވެސް އެކަން ސާފުވެއެވެ.

ޗައިނާގެ އެވަރެޖް އުމުރަކީ 24 އެވެ. އެ ކޮންޓިންޖެންޓްގެ 548 އެތުލީޓުންނަކީ މުޅިން އަލަށް އޭޝިއަން ގޭމްސްގައި ވާދަކުރި އެތުލީޓުންނެވެ. އަދި ޗައިނާގެ ކޮންޓިންޖެންޓްގައި 2005 ވަނަ އަހަރުގެ ފަހުން އުފަންވި އެތުލީޓުންގެ ޕަސެންޓަކީ 27 އެވެ. އެއީ ބޮޑު އަދަދެކެވެ.

ޗައިނާގެ ކޮންޓިންޖެންޓް ---

މީގެ ކުރިންވެސް އޭޝިއަން ގޭމްސްގައި އުމުރުން ހަގު، ޒުވާން އެތުލީޓުން ވާދަކުރިތަން ފެނިގެން ގޮސްފައިވެއެވެ. އޭޝިއާއަކީ އެކަމަށް ހާއްސަ ބައްރެއްކަން ފާހަގަވެސް ވެއެވެ. 2014 ވަނަ އަހަރު އޭޝިއަން ގޭމްސްގައި 13 އަހަރު ދެކުނު ކޮރެއާ ސެއިލާ ކިމް ޑަ-ޖެއޮންއާއި 2018 ވަނަ އަހަރު ވާދަކުރި އިންޑޮނޭޝިއާގެ އުމުރުން 9 އަހަރުގެ ސްކޭޓްބޯޑަރު އަލީގީ ނޮވޭރީއަށްވެސް ސަމާލުކަން ހުއްޓިފައިވެއެވެ. އަދި 2022 ވަނަ އަހަރު ހަންޒޯގައި ބޭއްވި އޭޝިއަން ގޭމްސްގައިވެސް އުމުރުން 9 އަހަރުގެ ފިލިޕީންސް ސްކޭޓްބޯޑަރު ޕެރިސް އަލެގޭޑޯ ފާހަގަވި އިރު، އެފަހަރު ޗައިނާގެ ސްކޭޓްބޯޑަރު ސުއި ޗެންޒީ، 13 އަހަރުގައި ރަން މެޑަލް ހޯދިއެވެ.

އެއިރުން ފެށިގެންވެސް ޒުވާން ތަރިންގެ ބައިވެރިވުން އޭޝިއަން ގޭމްސްގައި ބޮޑު ނަމަވެސް، މިހާރު އެ ޓްރެންޑަށް އަދި ތަފާތު ބަދަލެއް އަންނަމުން އެބަދެއެވެ. މިހާރު ގައުމުތަކުން ޒުވާން އެތުލީޓުން ނެރެނީ ހަމައެކަނި ސްކޭޓިން ފަދަ ކުޅިވަރުތަކަށް އެކަންޏެއް ނޫނެވެ. މިހާރު ދުނިޔޭ ފެންވަރުގެ އެތުލީޓުންނާ ޕްރެޝަރުގައި ވާދަކުރުވަން ތައްޔާރުކޮށް، ސްވިމިންނާއި އެތުލެޓިކްސް، އީސްޕޯޓްސްގެ އިތުރުން އެހެން ބައެއް ކުޅިވަރުތަކަށްވެސް އުމުރުން ހަގު އެތުލީޓުން ނެރެން ފަށައިފިއެވެ. ގިނަ ތަޖުރިބާކާރުންގެ ނަޒަރުގައި އެކަން ވެގެންދާނީ އޭޝިއާއިން އޮލިމްޕިކްސް ފަދަ ބޮޑެތި މުބާރާތްތައް ޑޮމިނޭޓް ކުރުމަށް އަޅާ ފިޔަވަޅަކަށެވެ. މިފަހަރު އޭޝިއަން ގޭމްސްއިން ފެންނަ މަންޒަރަކީ ދުނިޔެއަށް ދޭ ބޮޑު މެސެޖެއް ކަމަށް ބެލެވިދާނެއެވެ. ކުޅިވަރުގެ އޮނިގަނޑުތައް ހަރުދަނާކޮށް، އޭޝިއާގެ ގިނަ ގައުމުތަކަކުން ވަނީ ޒުވާން ހުނަރު ދެނެގަންނަން ޕްލޭންތައް ފުރިހަމައަށް އެކުލަވައިލާފައިކަން ސާފުވެއެވެ.

އެގާރަ އަހަރުގެ ޗެމްޕިއަނަކާއެކު ތާރީހު ލިޔެލުން: 13 އަހަރުގައި ސްވިމިން ޕޫލްވެސް ފަތަހަކޮށްފި

11 އަހަރުގެ އޭޝިއަން ގޭމްސް ޗެމްޕިއަން ---

ކުރިންވެސް ފާހަގަކުރަމުން އައިހެން މިއީ ޒުވާނުންނަށްވުރެވެސް ހަގު އުމުރުގެ ތަރިން ފެނިގެންދާ އޭޝިއަން ގޭމްސްއެކެވެ. އުމުރުން 11 އަހަރުގައި ޖަޕާނުގެ ޔޫކީ ކުރިހާރާ ވަނީ އީސްޕޯޓްސް ރަން މެޑަލް ހޯދައިފައެވެ. ޕުޔޯ ޕުޔޯއިން އޭނާ ރަން މެޑަލް ހޯދީ ދެކުނު ކޮރެއާގެ ކޭންގް ޑޮންޝިން ފައިނަލުގައި ބަލިކޮށްގެންނެވެ. ފައިނަލާ ހަމައަށް ކުރި ދަތުރުގައި އުމުރުން ތިން ގުޑަ ބޮޑެތި ކުޅުންތެރިންނާވެސް ވާދަކުރިއެވެ.

ކުރިހާރާއަކީ އަދިވެސް ސްކޫލް ދަރިވަރެކެވެ. އޭނާ ބުނީ އީސްޕޯޓްސްއަށް ދޭ ވަގުތާއި ސްކޫލް ވަގުތު ބެލެންސްކުރުމަކީ ބޮޑު ޗެލެންޖެއް ކަމަށެވެ. އޭޝިއާގެ ޗެމްޕިއަންކަން ހޯދުނު ނަމަވެސް ކުރިހާރާ ބުނީ އޭނާގެ ހުވަފެނީ ވަޒީފާއަކީ ރޭލު ދުއްވުން ކަމަށެވެ.

ކުރިހާރާގެ ކާމިޔާބީއަކީ ބަހުސަކަށްވެސް ވެދާނެއެވެ. ބައެއް މީހުން ގަބޫލުކުރާ ގޮތުގައި އުމުރުން މާބޮޑެތި އެތުލީޓުންނާ ވާދަކުރަން ޒުވާން އެތުލީޓުން ނެރުމަކީ، އެ ޒުވާން އެތުލީޓުންނަށް ކުރިމަތިވާނެ އުނދަގޫ ޕްރެޝަރެކެވެ. އެ ބަހުސުގައި އެއީ މާބޮޑު ވިސްނުމެއް ވިސްނަން ޖެހޭ ކަމެއް ނޫން ކަމަށް ގަބޫލުކުރާ މީހުންނަށް ކުރިހާރާގެ ވާހަކަ ބޭނުންކުރެވިދާނެއެވެ.

ޖަޕާނުގެ އިތުރު ތަރިންވެސް މިފަހަރު ފެނިގެން ދިޔައެވެ. އުމުރުން އެންމެ 17 އަހަރުގެ ޝިން އޮހާޝީ ވަނީ ސްވިމިން ޕޫލުގައި އެންމެން ހައިރާން ކޮށްލައިފައެވެ. ފިރިހެން 200 މީޓަރު ބްރެސްޓްސްޓްރޯކް އޮހާޝީ ނިންމީ ދެމިންޓް، 04.83 ސިކުންތުންނެވެ. އެއީ ދުނިޔޭގެ ރެކޯޑެކެވެ. އޭނާއަކީ މިހާތަނަށް ދުނިޔޭގެ ތާރީހުގައިވެސް އެ އިވެންޓްގެ ޓައިމިން ދެމިނެޓް ފަސް ސިކުންތުންތަށްވުރެ އަވަހަށް ނިންމި ފުރަތަމަ އެތުލީޓެވެ.

އޮހާޝީ ވަނީ ބްރެސްޓްސްޓްރޯކްގެ 100 މީޓަރު އިވެންޓާއި ރިލޭ އިވެންޓުންވެސް ރަން މެޑަލް ހޯދައިފައެވެ.

ޖަޕާނުގެ އެ ހުނަރުވެރިންގެ ލިސްޓަށް ޔުމޭކީ ކޮޖީމާގެ ނަންވެސް އަންނާނެއެވެ. 17 އަހަރުގައި ޔުމޭކީ ވަނީ 400 މީޓަރު އިންޑިވިޖުއަލް މެޑްލޭ އިވެންޓް، ހަތަރު މިނެޓް، 7.02 ސިކުންތުން ނިންމައި ގޭމްސްގެ ރެކޯޑު ހަދައިފައެވެ. އެއީ ދުނިޔޭގެ ޖޫނިއާ ރެކޯޑަކާއެކުގައެވެ.

ޔުމޭކީ ރޭސް ނިންމާލި ހިސާބުން ބުނީ އޭނާ ވާދަކުރަން ތައްޔާރު ވަނީ ދުނިޔޭގައި މިހާރު ހުރި އެންމެ ވަރުގަދަ ފެތުންތެރިޔާ ލެއޯން މާޗަންޑާ ކަމަށެވެ. މާޗަންޑްވެސް ވަނީ ޔުމޭކީގެ ޓައިމިންނަށް ވިސްނަން ޖެހޭ ކަމަށް ބުނެފައެވެ.

ޖަޕާނުން އެކަންޏެއް ނޫނެވެ. ޗައިނާވެސް ހަމަ އެވަރެވެ. 13 އަހަރުގެ ޔޫ ޒިޑީ ވަނީ ފެތުމުގެ 200 މީޓަރު ބަޓަފްލައި، 200 މީޓަރު އިންޑިވިޖުއަލް މެޑްލޭ، 400 މީޓަރު އިންޑިވިޖުއަލް މެޑްލޭ އިވެންޓްގެ ރަން މެޑަލް ހޯދައިފައެވެ.

ޔޫ ގެ 200 މީޓަރު އިންޑިވިޖުއަލް މެޑްލޭ އިވެންޓަކީ ދުނިޔޭގެ ރެކޯޑެކެވެ. އަދި 200 މީޓަރު ބަޓަފްލައިއާއި 400 މީޓަރު އިންޑިވިޖުއަލް މެޑްލޭ އިވެންޓްގައި ޔޫ ވަނީ އޭޝިއަން ގޭމްސް ރެކޯޑު ހަދައިފައެވެ.

ޔޫ ގެ ކޯޗު ބުނެފައި ވަނީ އުމުރުން ހަ އަހަރުން ފެށިގެންވެސް އޭނާއަކީ ތަފާތު ފެތުންތެރިއެއް ކަމަށާއި، އޭރުން ފެށިގެން ހުއްޓުމެއް ނެތި ތަމްރީނުކުރަމުން އައިސްފައިވާ ކަމަށެވެ. ޔޫ ރެކޯޑުތަކަށްފަހު ބުނީ އޭނާއަކީ މާބޮޑު ގުދުރަތީ ހުނަރެއް ހުރި ކުއްޖެއް ނޫން ކަމަށާއި، ހާސިލުވި ކާމިޔާބީތައް ހާސިލުވީ އެތައް މަސައްކަތްތަކެއްގެ ސަބަބުން ކަމަށެވެ.

ސްވިމިން ޕޫލްގައި ވިދާލީ ހަމައެކަނި ޔޫ އެކަންޏެއް ނޫނެވެ. އުމުރުން 19 އަހަރުގެ ޗައިނާ ފެތުންތެރިޔާ ޒޭންގް ޒާންޝޫވެފައި ވަނީ މިހާތަނަށް އޭޝިއަން ގޭމްސްގެ ތާރީހުގައިވެސް އެންމެ ބޮޑު ތަފާތެއް ދެއްކި ޒުވާން އެތުލީޓަށެވެ. އޭނާ ވެގެން ގޮސްފައި ވަނީ އޭޝިއަން ގޭމްސްގެ ފެތުމުގެ އިވެންޓްގައި ހަތް ރަން މެޑަލް ހޯދި ފުރަތަމަ އެތުލީޓަށެވެ.

ޒޭންގް ޒާންޝޫ ---

ޒޭންގް ވަނީ 200 މީޓަރު، 400 މީޓަރު، 800 މީޓަރު، 1500 މީޓަރު ފްރީ ސްޓައިލް އިވެންޓުން ރަން މެޑަލް ހޯދައިފައެވެ. އޭގެ އިތުރުން އޭނާ ވަނީ ރިލޭ އިވެންޓްތަކުންވެސް ތިން ރަން މެޑަލް ހޯދައިފައެވެ. އެ ދަތުރުގައި ޒޭންގް ވަނީ 200 މީޓަރު އިވެންޓާއި 400 މީޓަރު އަދި 800 މީޓަރު ފްރީސްޓައިލް އިވެންޓުން އޭޝިއަން ގޭމްސްގެ ރެކޯޑު އާކޮށްފައެވެ.

ހަމައެކަނި ޕޫލަކުން ނޫނެވެ. އެތުލެޓިކްސް ޓްރެކުންވެސް ޒުވާން ތަރިން ފެނިގެން ގޮސްފައިވެއެވެ. އުމުރުން 17 އަހަރުގެ ޗެން ޔޫޖީ ވަނީ އަންހެން 100 މީޓަރު ދުވުން 11.06 ސިކުންތުން ނިންމައި އޭޝިއަން ގޭމްސްގެ ރެކޯޑެއް ހަދައިފައެވެ. އޭގެ އިތުރުން ޗައިނާގެ ޖެވެލިން އުކުންތެރިޔާ ޔޭން ޒީޔީއަކީވެސް އުންމީދީ އެތުލީޓެކެވެ.

އުމުރުން 18 އަހަރުގެ ޒީޔީ އަކީ މުޅި ދުނިޔޭގެވެސް އެންމެ އުންމީދީ އެއް ފީލްޑް އެތުލީޓެވެ.

އޭގެ އިތުރުން ތައިލެންޑްގް 20 އަހަރު އެތުލީޓް ޕުރިޕޯލް ބޫންސަން ވަނީ 100 މީޓަރު ދުވުން 9.90 ސިކުންތުން ނިންމައި، އޭޝިއަން ގޭމްސްގެ ރެކޯޑު މުގުރާލައިފައެވެ. އޭނާއަކީ މިދިޔަ 48 އަހަރުގައިވެސް އޭޝިއަން ގޭމްސްގައި ފެނިގެންދިޔަ ތައިލެންޑްގެ ފުރަތަމަ 100 މީޓަރު ޗެމްޕިއަނެވެ.

ދެކުނު ކޮރެއާގެ ފެތުންތެރިންވެސް ހަގު އުމުރުގައި ތަފާތު ދެއްކި އިރު، 16 އަހަރުގެ ކިމް ސިއުން-ވޮން ވަނީ ދެ މެޑަލް ހޯދައިފައެވެ. އަދި މީގެ ކުރިން އުމުރުން 15 އަހަރުގައި އޭޝިއަން ގޭމްސްއިން ދެ ލޯ މެޑަލް ހޯދި އިންޑިއާގެ ސްކުއޭޝް ތަރި އަންހަތު ސިންހް ވަނީ އުމުރުން 18 އަހަރުގައި މިފަހަރު ފައިނަލުގައި ވާދަކޮށްފައެވެ.

އަޒްރަގް ރެފިއުޖީ ކޭމްޕުން ވިދާލި 18 އަހަރުގެ ތަރި

ތަލާހް އަލް ހަސަން އަލް ހުނައިދީ ---

އޭޝިއަން ގޭމްސްއިން ފެނިގެންދާ ތަފާތު އެތުލީޓުންގެ ވާހަކަތަކުގެ ތެރެއިން ހާއްސަވި އަނެއް ނަމަކީ ރެފިއުޖީ ކޭމްޕުން ގޮސް ވާދަކުރި އެތިލީޓުންގެ ވާހަކައެވެ. ރެފިއުޖީ ޓީމުގެ ވާހަކައެވެ. އެއީ މެޑަލްތަކުގެ ވާހަކަ ނޫން ނަމަވެސް ހަޔާތުގެ އެކިއެކި ތަކުލީފްތަކުން އޭޝިއަން ގޭމްސްއާ ހަމައަށް ގޮސް، ބައެއް ތަރިން ވަނީ އުންމީދީ މަންޒަރުތައް ދައްކައިފައެވެ.

އުމުރުން 18 އަހަރުގެ ޓައިކްވޯންޑޯ އެތުލީޓް ތަލާހް އަލް ހަސަން އަލް ހުނައިދީ ވަނީ މިފަހަރު ގޭމްސްގައި ވިދާލައިފައެވެ. ޖޯޑަންގެ ތަލާހަކީ އަޒްރަގް ރެފިއުޖީ ކޭމްޕްގައި އުޅެބޮޑުވި އެތުލީޓެކެވެ.

ތަލާހް އޭޝިއަން ގޭމްސްއަށް ގޮސް ބުނީ އެއީ ހުވަފެނެއް ހަގީގަތަކަށް ވުން ކަމަށެވެ. އަދި ރެފިއުޖީ ކޭމްޕްގެ ހިތި ހަނދާންތަކުން އޭޝިއަން ގޭމްސްއަށް ދިޔުން އެއީ ތަފާތު އިހުސާސެއް ކަމަށް ތަލާހް ބުނެފައިވެއެވެ.

ގައުމުތަކުގެ ޕްލޭނަކީ ކޮބާ؟

ޒުވާން ހުނަރު ހޯދުމަށް މަގު ކޮށުމަކީ ކޮންމެ ގައުމެއްގެވެސް ކުޅިވަރު ކުރިއަރުވަން މަޖުބޫރު ކަމެކެވެ. އޭޝިއާގެ ގައުމުތަކަކީ އެކަން އެންމެ ރަނގަޅަށް ކުރަމުންދާ އެއް ގައުމުތައް ކަމަށްވީ އިރު، އެ ސިސްޓަމްތަކާއި ޕްލޭންތަކަކީ ރާއްޖެ ފަދަ ގައުމުތަކުންވެސް ސަމާލުކަން ދިނުން މުހިއްމު ކަމެކެވެ.

ޗައިނާ ފަދަ ގައުމުތަކުގައި ހުނަރު ފެނުމާއެކު، އެހިސާބުން ސްކޫލްތަކުން ފެށިގެންވެސް ވަކި ކޯޗުންގެ ދަށުން ސީރިއަސް ތަމްރީނުތަކެއް ހަދަމުން ދެއެވެ. އަދި ވަކި އުމުރަކަށް ނުބަލައި، ގައުމުތަކުން ޖޫނިއާއިން ސީނިއާއަށް ކުދިން ހާނަމުންދާ ދިޔުމަކީވެސް ޒުވާން ތަރިން އުފެދުމުގެ އެއް ހެއްކެވެ. 15، 16 އަދި 17 އަހަރުގައިވެސް ބައެއް ގައުމުތަކުން ވަނީ ކުދިން ސީނިއާ ޓީމަށް ނެރެފައެވެ. އެހެންކަމުން އެ ކުޅުންތެރިންނަށް ވާދަވެރި ތަފާތު މާހައުލެއް، ޒުވާން އުމުރުން ފެށިގެން ލިބިގެން ދެއެވެ.

އޭގެ އިތުރުން ޗައިނާ، ޖަޕާން އަދި ދެކުނު ކޮރެއާ ފަދަ ގައުމުތަކުން ސްކޫލް ކުދިން ވަކި އުމުރަކަށް ނުބަލައި ލޯކަލް ކްލަބުތަކަށް ފޮނުވައި، ރީޖަނަލް ޕްރޮގްރާމްތަކަށް ނެރެއެވެ. އަދި އެހިސާބުން ޖޫނިއާ ޓީމަށް ގޮސް ސީނިއާ ޓީމަށް ކުޅުންތެރިން ނެރެއެވެ. އަދި އެކަމުގައި ބެލެނިވެރިންގެ ޝާމިލުވުންވެސް ކުޅިވަރުގައި ބޮޑެވެ.

ކޮންމެއަކަސް، އޭޝިއަން ގޭމްސްގެ ވާހަކަތަކުން ފެންނަނީ އޭޝިއާ ގައުމުތަކުން ކުޅިވަރަށް ދޭ ސަމާލުކަމެވެ. ކުޅިވަރުގެ ކުރިމަގަށް ކުރާ އިންވެސްޓެވެ. އޮލިމްޕިކްސްގެ ޕޯޑިއަމްގައި އެގައުމުތައް ޑޮމިނޭޓް ކުރާނެއެވެ.