ޔޫއެފާ ނޭޝަންސް ލީގު އޭގައި ސްޕެއިނުން މޮޅުވުމުގެ ރެކޯޑު ދަމަހައްޓަމުންދާ އިރު، އިންގްލެންޑުން ތަފާތު ބޮޑު ނަތީޖާއަކުން ކްރޮއޭޝިއާ ބަލިކޮށްފިއެވެ.

އިންގްލެންޑުން ރަށުން ބޭރުގައި ކްރޮއޭޝިއާ ކައިރިން 7-0 އިން މޮޅުވި އިރު، ސްޕެއިނުން ވަނީ އަމިއްލަ ދަނޑުގައި ޗެކް ރިޕަބްލިކް ކައިރިން 3-1 އިން މޮޅުވެފައެވެ. ސްޕެއިން މިވަގުތު އޮތީ އެ ގްރޫޕްގެ އެއްވަނައިގައެވެ. އެއީ ތިން މެޗުން ނުވަ ޕޮއިންޓާއެކުގައެވެ. ދެވަނައިގައި އިންގްލެންޑް އޮތީ ތިން މެޗުން ހަ ޕޮއިންޓާއެކުގައެވެ. ކްރޮއޭޝިއާއިންވެސް އެ ގްރޫޕުގައި މޮޅެއް ހޯދާފައި އޮތް އިރު، އެޓީމު އޮތީ ތިން ޕޮއިންޓާއެކުގައެވެ. ޗެކް ރިޕަބްލިކަށް އަދި ޕޮއިންޓެއް ނުލިބެއެވެ.

އިންގްލެންޑުން ނޭޝަންސް ލީގުގައި ހޯދި އެންމެ ތަފާތު ބޮޑު މޮޅާއެކު ރޭ ތާރީހު ލިޔެލި އިރު، އިންގްލެންޑުން ފުރަތަމަ ހާފުގައިވެސް ހަތަރު ގޯލް ޖެހިއެވެ. ހެރީ ކޭން އިންގްލެންޑަށް ލީޑު ނަގައިދިން އިރު، ޖޫޑް ބެލިންހަމްއާއި ބުކަޔޯ ސަކާއާއި އެންތަނީ ގޯޑަންވެސް އިންގްލެންޑަށް ގޯލްތައް ޖެހިއެވެ.

ފޯމުގައި ކުޅެމުންދިޔަ އިންގްލެންޑުން ދެވަނަ ހާފުގައިވެސް އެ ފެންވަރު ދަމަހައްޓާފައިވާ އިރު، ކޭންގެ އިތުރު ގޯލަކާއި ސަކާގެ އިތުރު ގޯލެއްވެސް ފެނިގެން ދިޔައެވެ. އަދި މޯގަން ރޮޖާސް ވަނީ އެންމެ ފަހުވަގުތު އިންގްލެންޑްގެ ހަތްވަނަ ގޯލް ޖަހައިފައެވެ.

ދުނިޔޭގެ ޗެމްޕިއަން ސްޕެއިނުން ރޭ ކުޅުނު މެޗަކީ އެޓީމަށް އުނދަގޫ މެޗެކެވެ. މެޗުގެ ފަހުކޮޅުގައި ސްޕެއިނަށް އިތުރު ފަސޭހައަކަށްވީ ކެޕްޓަން ލަޑިސްލޭވް ކްރޭޖީއަށް ދެއްކި ރަތް ކާޑަކާއެކުގައެވެ.

ރޭގެ މެޗުގައިވެސް ސްޕެއިން ވަނީ އަވަސް ލީޑެއް ނަގައިފައެވެ. ލެމީން ޔަމާލް މެޗުގެ ހަވަނަ މިނެޓުގައި ލީޑު ނެގި އިރު، އެއީ ޑެނީ އޮލްމޯއާއެކު ކުރި މަސައްކަތުން ތަނަވަސްކުރި ފުރުސަތެއްގައި ޖެހި ގޯލެކެވެ.

އޭގެފަހުން ސްޕެއިނުން މެޗު ޑޮމިނޭޓް ކުރަމުން ގޮސްފައިވާ އިރު، ހާފު ނިމުމުގެ ކުރިން ރޮޑްރީ ވަނީ އިތުރު ގޯލެއް ޖަހައިފައެވެ. ދެވަނަ ހާފުގައި ޖީރީ ސްލާމާ ޗެކަށް ގޯލެއް ޖަހައިދިން ނަމަވެސް، އެޓީމުގެ ކްރޭޖީއަށް 85 ވަނަ މިނެޓުގައި ރަތް ކާޑު ދެއްކިއެވެ. ސްޕެއިންގެ ފަހު ގޯލް އޭގެފަހުން ޖަހައިދިނީ މިކޭލް މެރީނޯއެވެ.