އިންޑިއާގެ ކަލްކަތާގެ ސޯލްޓް ލޭކް ސްޓޭޑިއަމްގައި މިރޭ ކުޅުނު އެކުވެރިކަމުގެ މެޗުގައި ބްރެޒިލުން އިންޑިއާ ބަލިކޮށްފިއެވެ.

މިފަހަރު އިންޓަނޭޝަނަލް ބްރޭކްގައި ބްރެޒިލުން އިންޑިއާގައި އެކުވެރިކަމުގެ މެޗެއް ކުޅެން ރޭވި ހިސާބުން އެ މެޗުގެ ވާހަކަތައް ވަނީ މީޑިއާގައި ގަދަވެފައެވެ. މިރޭގެ މެޗު ވެގެންދާނީ އިންޑިއާ ފުޓުބޯޅަ ތާރީހުގައިވެސް އެގައުމުގައި ކުޅެވުނު އެންމެ ބޮޑު މެޗަށެވެ. މިހާތަނަށް ފަސް ފަހަރު ވޯލްޑް ކަޕް ހޯދާފައިވާ ބްރެޒިލަކީ މިހާރުވެސް ފީފާ ރޭންކިންގެ ގަދަ 10 ގެ ތެރޭގައި ހިމެނޭ ޓީމެކެވެ.

މިރޭ ބްރެޒިލުން 4-0 އިން އިންޑިއާ ބަލިކުރި ނަމަވެސް އިންޑިއާގެ ފަރާތުން ވަނީ ރަނގަޅު ހިތްވަރެއް ފެނިފައެވެ. ހާއްސަކޮށް ބްރެޒިލާ ކުޅުނު މެޗަކަށް ބަލާ އިރު، އިންޑިއާއިން އޮގަނައިޒްކޮށް ޑިފެންސް ކޮށް، ބައެއް އެޓޭކްތަކަށްވެސް ކައުންޓާ ފުރުސަތުތަކުގައި މަސައްކަތް ކުރިއެވެ.

ބަދަލުތަކާއެކު އެންޗެލޮޓީ ފުރަތަމަ 11 ނެރެފައިވާ އިރު، ބްރެޒިލަށް ލީޑު ނަގައިދިނީ އެސްޓެވާއޯ ވިލިއަމްްއެވެ. އޭގެފަހުން ހާފު ނިމުމުގެ ކުރިން ޕެޑްރޯ ގޯލް ޖެހި އިރު، ދެވަނަ ހާފުގައި ބްރެޒިލްގެ ގޯލްތައް ޖެހީ ސަމެއުލް ލީނޯއެވެ.

"މެޗު ހުޅުވާލަން އުނދަގޫވި. އެކަމަކު އެސްޓެވާއޯގެ ގޯލާއެކު ދެން އިތުރު ފުރުސަތުތައް ތަނަވަސްވެ، މެޗު ފަސޭހަވި. އަހަރެމެންނަށް މި އިންޓަނޭޝަނަލް ބްރޭކަކީ ގައުމީ ޓީމަށް ރަނގަޅު ފުރުސަތެއް. މިއީ އަލުން ގައުމީ ޓީމެއް އެކުލަވާލަން މި ކުރާ މަސައްކަތަށް ލިބުނު ރަނގަޅު މެޗުތަކެއް. މިރޭގެ މެޗުގައި އިންޑިއާ ރަނގަޅަށް އޮގަނައިޒްކޮށް ކުޅުނު، އެކަމަށް ތައުރީފުކުރަން ޖެހޭ،" ބްރެޒިލްގެ ކޯޗު ކާލޯ އެންޗެލޮޓީ މެޗަށްފަހު ބުންޏެވެ.

މެޗުގައި އިންޑިއާގެ ކީޕަރު ގްރަޕްރީތު ސިންހް ސަންދޫގެ ބައެއް ގޯސްތައް ފެނުނު ނަމަވެސް، އިންޑިއާ ކޯޗު ހާލިދު ޖާމިލް ވަނީ މެޗަށްފަހު އޭނާގެ ދިފާއުގައި ވާހަކަ ދައްކައިފައެވެ. އަދި އިންޑިއާގެ ޑިފެންސް ރަނގަޅު ކަމަށް ފާހަގަކޮށް އޭނާ ބުނީ މެޗަށް ނެރުނީ މުޅިން އާ ހަތަރު ޑިފެންޑަރުން ކަމަށާއި، އެހެންކަމުން ރަނގަޅުކުރަން ޖެހޭ ކަންކަން ހުރި ކަމަށެވެ. އެހެން ނަމަވެސް ޓީމުގެ ކުޅުމަށް ތައުރީފުކުރަން ޖެހޭ ކަމަށް ޖާމިލް ފާހަގަކުރިއެވެ.