އޭޝިއާ ފުޓުބޯޅައިގެ މައި އިދާރާ، އޭއެފްސީންވެސް ގައުމުތަކުގެ މެދުގައި ނޭޝަންސް ލީގެއް ބާއްވަން މިދިޔަ އަހަރު ޑިސެމްބަރު މަހު ނިންމާފައިވާ އިރު، އެ މުބާރާތުގެ ތެރޭގައި ވޯލްޑް ކަޕާއި އޭޝިއަން ކަޕްގެ ކޮލިފިކޭޝަން ސިސްޓަމެއް ހިމަނަން އޭއެފްސީން ކަރުދާހެއް ހުށަހަޅަން ނިންމާފައިވާ ކަމަށް ނޫސްތައް ބުނެފިއެވެ.

އީއެސްޕީއެންއިން ބުނީ އޭއެފްސީން ވިސްނަނީ ކޮންމެ ދެ އަހަރަކުން އެއް އަހަރު، ގައުމީ ޓީމުތަކުގެ މެދުގައި ނޭޝަންސް ލީގު މުބާރާތް ކުޅުމަށް ކަމަށެވެ. އެއީ ކޮންމެ ހަތަރު އަހަރަކުން އެއް އަހަރު ބާއްވާ އޭޝިއަން ކަޕާއި ވޯލްޑް ކަޕްގެ ކޮލިފިކޭޝަން، ނޭޝަންސް ލީގު ތެރެއިން ކުރިއަށް ގެންދެވޭނެ ކަހަލަ ގޮތަކަށް ކަންކަން ރޭވުމަށެވެ.

އީއެސްޕީއެންއިން ބުނީ އޭއެފްސީން ހުށަހަޅަން ތައްޔާރުކޮށްފައިވާ ޕްރޮޕޯސަލްގައިވާ ގޮތުން ނޭޝަންސް ލީގަށް ޓީމުތައް ބަހާނީ ތިން ޓަޔާއަށް ކަމަށެވެ. އެގޮތުން އޭއެފްސީގެ ޕްލޭންގައި ރޭންކިންނަށް ބަލައި ފުރަތަމަ ޓަޔާގައިވެސް 18 ޓީމު ހިމެނޭ އިރު، ދެވަނަ ޓަޔާގައިވެސް ހިމެނޭނީ 18 ޓީމެވެ. ދެން ބާކީ ޓީމުތައް ކުޅޭނީ ތިންވަނަ ޓަޔާގައެވެ. އީއެސްޕީއެންއިން ބުނީ އޭއެފްސީގެ ނޭޝަންސް ލީގަކީވެސް ޕްރޮމޯޝަނާއި ރެލިގޭޝަނުގެ ފުރުސަތު އޮންނާނެ މުބާރާތަކަށް ހަދަން ނިންމާފައިވާ ކަމަށެވެ.

އޭއެފްސީ ނޭޝަންސް ލީގުގެ ޕައިލެޓް މުބާރާތެއް، 2028-29 ވަނަ އަހަރުން ފެށިގެން ކުރިއަށްގެންދަން ނިންމާފައިވާ އިރު، ރަސްމީކޮށް ކޮލިފިކޭޝަން ހިމަނައިގެން މުބާރާތް ފަށަން ނިންމާފައިވަނީ 2030 ވަނަ އަހަރު ކަމަށްވެސް ނޫސްތައް ބުނެއެވެ. އަދި އެ މުބާރާތަކީ ޒޯންތަކަށް ބަހައިގެން ކުޅޭނެ މުބާރާތެއް ނޫން ކަމަށްވެސް ރިޕޯޓުތައް ބުނެއެވެ.

މީޑިއާތަކުން ބުނީ އޭއެފްސީން ނޭޝަންސް ލީގަށް، ވޯލްޑް ކަޕް ކޮލިފިކޭޝަން އެއްކުރާ ހިސާބުން ކޮންމެ ގައުމެއްވެސް ކޮލިފިކޭޝަން ފުރަތަމަ ބުރުގައި ހޯމް ހަ މެޗާއި އަވޭ ހަ މެޗު ކުޅޭނެއެވެ. އަދި އޭއެފްސީން ގެންނަން ބޭނުންވާ ބަދަލާއެކު ނޭޝަންސް ލީގުގެ ޓަޔާ ވަންގެ އެއްވަނަތައް ކަމަށްވާ ހަ ޓީމަށް ސީދާ ވޯލްޑް ކަޕުން ޖާގަ ދޭނެ ކަމަށްވެސް ރިޕޯޓުތައް ބުނެއެވެ.

އިތުރަށް އީއެސްޕީއެންއިން ބުނީ އޭއެފްސީން ވިސްނަނީ ޓަޔާ ވަންގެ ހަތްވަނައާއި 10 ވަނަ އާ ދެމެދުގެ ޓީމުތަކުގެ މެދުގައި އިތުރު ރައުންޑް ރޮބިން ޕްލޭ އޮފް ބުރެ ކުޅެ، އިތުރު ކޮލިފިކޭޝަން ދެ ޖާގަ ގައުމުތަކަށް ދިނުމަށެވެ. އަދި ތިންވަނަ ޓީމު އިންޓަ ކޮންޓިނެންޓަލް ޕްލޭ އޮފް އަކަށް ދާ ގޮތަށް ވަނީ ވިސްނައިފައެވެ.

މިހާރު އޭއެފްސީގެ ވޯލްޑް ކަޕް ކޮލިފިކޭޝަން އޮންނަ ގޮތުން، ފުރަތަމަ ކޮލިފައިން ޕްލޭ އޮފް ފޭސްތަކަކަށްފަހު ތިންވަނަ ބުރަށް ދާ ޓީމުތައް ހަ ޓީމުގެ ތިން ގްރޫޕެއްގައި ވާދަކުރެއެވެ. އަދި ކޮންމެ ގަދަ ދެ ޓީމަކަށް ސީދާ ޖާގަ ލިބޭ އިރު، ތިންވަނައަށް ދާ އެންމެ ރަނގަޅު ދެ ޓީމު ހަތަރު ވަނަ ފޭސްއަކަށް ދާނެއެވެ. އަދި އެ ފޭސްއިން އިތުރު ޓީމުތަކަށް ފުރުސަތު ލިބޭނެއެވެ.

އޭޝިއަން ކަޕްގެ ކޮލިފިކޭޝަންވެސް ހަމަ ނޭޝަންސް ލީގު ތެރެއިން ކުރިއަށް ގެންދަން އޭއެފްސީން ވިސްނާ ކަމަށް ނޫސްތައް ބުނެފައިވާ އިރު، އެ މުބާރާތުގެ ކޮލިފިކޭޝަނުގައި ކޮންމެ ގައުމަކުން ފުރަތަމަ ކުޅޭނީ ހޯމް ތިން މެޗާއި އަވޭ ތިން މެޗު ކަމަށް ޕްރޮޕޯސަލްގައި ބުނެއެވެ.

ނޫސްތަކުން ބުނީ އޭއެފްސީގެ ވިސްނުމަކީ އަބަދުވެސް ނޭޝަންސް ލީގުގެ ނޮކްއައުޓަށް ދާނީ ޓަޔާ ވަންގައި ހިމެނޭ ގަދަ އަށް ޓީމު ކަމަށެވެ. އަދި ސެމީ ފައިނަލާއި ފައިނަލް ކުޅޭނީ ސެންޓްރަލް ވެނިއުއެއްގައި ކަމަށެވެ. އެއީ މިހާރު ނޭޝަންސް ލީގު ބާއްވަމުންދާ ޔޫއެފާއިންވެސް އެކަން ކުރަމުންދާ އާންމު އުސޫލެކެވެ. ހަބަރުތައް ބުނީ އޭއެފްސީން ފުރަތަމަ ވިސްނީ ޔޫއޭފާގައި އޮންނަހެން ކޮލިފިކޭޝަންތަކާއި ނޭޝަންސް ލީގު ވަކި ކުރުމަށް ކަމަށެވެ. އެހެން ނަމަވެސް އެއީ ހަރަދު ބޮޑު ސިސްޓަމަކަށްވާތީ ނޭޝަންސް ލީގަކީ ކޮލިފިކޭޝަނަކަށް ހަދަން ނިންމާފައިވާ ކަމަށްވެސް ނޫސްތައް ބުނެއެވެ.

ނޭޝަންސް ލީގުގެ ކޮންސެޕްޓް ޔޫރަޕުގައި ފަށައިގެން ކުރިއަށް ގެންދާ އިރު، އެއީ އިންޓަނޭޝަނަލް ބްރޭކްތަކުގައި ވާދަވެރި މެޗުތަކެއް ކުދި ގައުމުތަކަށްވެސް ލިބެން މަގުފަހިވާ ފޯމެޓެކެވެ. އޭޝިއާއާއި އެފްރިކާއިންވެސް އެ ފޯމެޓަށް ފީފާ އެކުވެރިކަމުގެ މެޗުތައް ޕްލޭންކުރަން ވިސްނާ އިރު، އޭރުން ރާއްޖެ ފަދަ ގައުމުތަކަށްވެސް އިންޓަންޝޭނަލް ބްރޭކުގައި ސަރަހައްދީ އެއް ފެންވަރުގެ ގައުމުތަކާ ފަސޭހައިން ގިނަ މެޗުތައް ކުޅެން ލިބޭނެއެވެ.