ކެޕްޓަން އަދި ތަރި ކްރިސްޓިއާނޯ ރޮނާލްޑޯއާއި މިހާރު ގައުމީ ޓީމުގެ ކޯޗު، ޖޯޖް ޖީސަސްއާ ދެމެދު ޖެހުނު މައްސަލަ ހައްލުކުރަން ޕޯޗުގަލްގެ ފުޓުބޯޅަ އިދާރާއިން މަސައްކަތް ފަށާފައިވާ ކަމަށް ނޫސްތައް ބުނެފިއެވެ.

ޕޯޗުގަލުން ރޮނާލްޑޯއާ ނުލައި ޑެންމާކު ބަލިކޮށްފައިވާ އިރު، އެ މެޗުގެ އެއް ދުވަސް ކުރިން ރޮނާލްޑޯ ގައުމީ ޓީމު ދޫކޮށްލީ ކުއްލިއަކަށެވެ. ގައުމީ ޓީމު ދޫކޮށްލުމަށްފަހު ރޮނާލްޑޯގެ ރަސްމީ ސޯޝަލް މީޑިއާގައި ބުނީ ކޯޗުގެ ޕްރެސްއާ ގުޅިގެންނާއި، ޕޯޗުގަލް ފެޑަރޭޝަނުގެ ރައީސާ ދެއްކި ވާހަކަތަކަށްފަހު ގައުމީ ޓީމުގެ ކޭމްޕް ދޫކޮށްލަން ނިންމާފައިވާ ކަމަށެވެ. އަދި ކުރިއަށް އޮތް ދުވަސްތަކުގައި ޕޯޗުގަލްގެ ރައްޔިތުންނަށް އެކަމުގެ ހަގީގަތް ހާމަކުރާނެ ކަމަށާއި، އަބަދުވެސް ގައުމީ ޓީމަށް 100 ޕަސެންޓް ދީފައިވާނެ ކަމަށް ރޮނާލްޑޯ ބުންޏެވެ.

ޑެންމާކު މެޗުގެ ކުރިން ބޭއްވި ޕްރެސްގައި ޖޯޖް ޖީސަސްއާ އަމާޒުވި އެއް ސުވާލަކީ އޭގެ ކުރިން މެޗުގައި ރޮނާލްޑޯ ނާރުވައި، ބެންޗުގައި ބޭންދީ ކީއްވެތޯއެވެ. އަދި އެ މެޗަށް ނެރެން ރޮނާލްޑޯ ވާމް އަޕް ކުރި ނަމަވެސް ފުރުސަތު ނުދިނީ ކީއްވެތޯ ނޫސްވެރިން ސުވާލުކުރިއެވެ.

ޖަވާބުގައި ޖޯޖް ޖީސަސް ފާހަގަކުރީ އޭނާއަށް ވަކި ކުޅުންތެރިޔަކަށްވުރެ މުހިއްމީ ޓީމު ކަމަށާއި، ކޮންމެ ނިންމުމެއް ނިންމާނީ އަމިއްލަ ވިސްނުމަށް ކަމަށެވެ. އަދި ފުޓުބޯޅައިގައި ކިތަންމެ ބޮޑު ޝަހުސިއްޔަތެއް ނަމަވެސް، ވަކި ހާއްސަ ކަންކަމެއް ފަހިކޮށް ނުދެވޭނެ ކަމަށްވެސް އޭނާ ބުންޏެވެ.

އެ ހިސާބުން ރޮނާލްޑޯ ހިތްހަމަނުޖެހިފައިވާ އިރު، ޕޯޗުގަލްގެ ނޫސްތަކުން އަނެއް ދުވަހު ބުނީ އެއީ ހިތި ނިމުމެއް ކަމަށެވެ. މި ސީޒަނަށްފަހު ފުޓުބޯޅަ ހުއްޓާލަން އުޅޭ ކަމަށް އުމުރުން 41 އަހަރުގެ ރޮނާލްޑޯ ކުރިން ފާހަގަކޮށްފައިވާ އިރު، ޕޯޗުގަލްގެ ނޫސްތަކުން ސިފަކުރީ އޭނާގެ ޕޯޗުގަލް ކެރިއަރު މިހާ ހިސާބުން ނިމިފައިވާ ކަމަށެވެ.

ޕޯޗުގަލްގެ ނޫސްތަކުން ބުނީ މިހާރު ރޮނާލްޑޯއާއި ފެޑަރޭޝަން މަޝްވަރާއަކަށް ދާން މަސައްކަތް ކުރާ ކަމަށެވެ. އެ މަޝްވަރާއަށް ދާން މަސައްކަތް ކުރި ނަމަވެސް، އެކަމަށް އަދިވެސް ޗެލެންޖްތަކެއް އެބަހުއްޓެވެ. އެގޮތުން ނޫސްތަކުން ބުނީ ރޮނާލްޑޯއަށް އަލުން ގައުމީ ޓީމުން ފުރުސަތު ދޭނަމަ، ގައުމީ ޓީމު ކުއްލިއަކަށް ދޫކޮށްލުމުން އެކަމުގެ އަދަބު ދޭނެ ކަމަށެވެ.

އެއީ ފެޑަރޭޝަންގެ އުސޫލުތަކުގައި ބުނާ ގޮތަށެވެ. ފެޑަރޭޝަނުގެ އުސޫލުތައް ބުނާ ގޮތުން ކުއްލިއަކަށް ވަކި އެއްޗެއް ނާންގައި ގައުމީ ޓީމު ދޫކޮށްލައިފިނަމަ، ޖޫރިމަނާކޮށް ސަސްޕެންޝަންވެސް ކުރަން ޖެހެއެވެ. އެހެންކަމުން ރޮނާލްޑޯއަށްވެސް އެ ފިޔަޅުތައް އަޅާނެ ކަމަށް ބެެލެވެއެވެ.

މިދިޔަ ވޯލްޑް ކަޕަށްފަހުވެސް ރޮނާލްޑޯ ގައުމީ ޓީމުން ރިޓަޔާކުރާނެ ކަމަށް ބައެއް ވާހަކަތައް ދެކެވުނެވެ. އެހެންނަމަވެސް ރޮނާލްޑޯ ބުނީ ގައުމީ ޓީމުން ބޭނުންވާނަމަ ކުޅެން ތައްޔާރު ކަމަށެވެ. އަދި ކުޅެނީ އެކަމަށް ގައުމީ ޓީމު ބޭނުންވާތީ ކަމަށެވެ.

އިތުބާރު ނޫސްތަކުން ބުނީ ގައުމީ ޓީމު ކެރިއަރުގެ ނިމުން ހަޑިކޮށް ދާން ރޮނާލްޑޯ ބޭނުން ނުވާ ކަމަށެވެ. އަދި އަލުން ޓީމަށް އަނބުރާ ދިއުމަށް ކޯޗާވެސް މަޝްވަރާކުރަން ރޮނާލްޑޯ ތައްޔާރު ކަމަށް ނޫސްތައް ފާހަގަކޮށްފައިވެއެވެ.

ރޮނާލްޑޯ މީގެ ކުރިން 2022 ވަނަ އަހަރު ވޯލްޑް ކަޕް ތެރޭގައި އޭރުގެ ކޯޗު ފެނާންޑޯ ސަންޓޯސްއާވެސް ހިޔާލު ތަފާތުވެފައިވެއެވެ. އެއީ ބެންޗް ކުރުމުންނެވެ. އަދި ހަމަ އެ އަހަރުގެ ވޯލްޑް ކަޕްގެ ކުރިން މެންޗެސްޓާ ޔުނައިޓެޑަށް ކުޅުނު އިރު، އޭރު އެ ކްލަބުގައި ހުރި ކޯޗު އެރިކް ޓެން ހާގަށްވެސް ރޮނާލްޑޯ ވަނީ ފާޅުގައި ފާޑުކިޔައިފައެވެ.