އިންޑިއާގެ ކުޅިވަރަށް ލޯބިކުރާ ރައްޔިތުންނަށް އެންމެ މުހިއްމީ ކްރިކެޓް ނަމަވެސް، ފުޓުބޯޅައަށް ލޯބިކުރާ އެތައް ބަޔަކު ފެންނަ ކަމަށް ބްރެޒިލްގެ ކޯޗު، ކާލޯ އެންޗެލޮޓީ ބުނެފިއެވެ.

މިފަހަރު އިންޓަނޭޝަނަލް ބްރޭކްގައި ބްރެޒިލުން އިންޑިއާގައި އެކުވެރިކަމުގެ މެޗެއް ކުޅެން ރޭވި ހިސާބުން އެ މެޗުގެ ވާހަކަތައް ވަނީ މީޑިއާގައި ގަދަވެފައެވެ. މިރޭގެ މެޗު ވެގެންދާނީ އިންޑިއާ ފުޓުބޯޅަ ތާރީހުގައިވެސް އެގައުމުގައި ކުޅެވޭ އެންމެ ބޮޑު މެޗަށެވެ. މިހާތަނަށް ފަސް ފަހަރު ވޯލްޑް ކަޕް ހޯދާފައިވާ ބްރެޒިލަކީ މިހާރުވެސް ފީފާ ރޭންކިންގެ ގަދަ 10 ގެ ތެރޭގައި ހިމެނޭ ޓީމެކެވެ.

ފުޓުބޯޅައިގެ ތަޖުރިބާކާރު ކޯޗު އެންޗެލޮޓީ މީގެ ކުރިން ބްރެޒިލާ ގުޅޭ ގޮތުން ވާހަކަދައްކަމުން ބުނީ ބްރެޒިލަކީ ފުޓުބޯޅައިގެ ސަގާފަތެއް އޮތް ގައުމެއް ނޫން ކަމަށެވެ. އުމުރުން 67 އަހަރުގެ އެންޗެލޮޓީ ޕްރި މެޗު ޕްރެސްގައިވެސް އެވާހަކައަށް ބާރު ލިބޭ ގޮތަށް ވަނީ ވާހަކަދައްކައިފައެވެ.

"ކްރިކެޓަކީ އިންޑިއާގެ ސަގާފަތުގެ ބައެއް. ފުޓުބޯޅައަކީ އިންޑިއާ ރައްޔިތުންނަށް އެންމެ މުހިއްމު ކުޅިވަރެއް ނޫން. އެކަމަކު އޭގެ މާނައަކީ އިންޑިއާ ފުޓުބޯޅައަށް ލޯބި ނުކުރޭކޭ ނޫން. އަހަރެމެން ވަރަށް އުފާވޭ، މިގައުމުގައި ކުޅެ، ހުނަރު ދައްކާލަން ފުރުސަތު ލިބޭތީ. މިއީ ތާރީހީ މެޗަކަށް ވާނެ،" ކްލަބު ފުޓުބޯޅައިގައިވެސް ފާހަގަކޮށްލެވޭ ގިނަ ކާމިޔާބީތަކެއް ހޯދާފައިވާ އެންޗެލޮޓީ ބުންޏެވެ.

އެންޗެލޮޓީ އިތުރަށް ބުނީ އިންޑިއާ ގައުމީ ޓީމުގެ ކޮލިޓީއަށް އިހުތިރާމުކުރަން ޖެހޭނެ ކަމަށާއި، ޕެނަމާ ކައިރިން 1-1 އިން އެއްވަރުކުރުން އެއީ ވަރުގަދަ ނަތީޖާއެއް ކަމަށެވެ.

އެންޗެލޮޓީ، މިދިޔަ އަހަރު މޭ މަހު ބްރެޒިލާ ހަވާލުވެފައިވާ އިރު، އެންޗެލޮޓީ ހަވާލުވީ ބްރެޒިލް އަލުން ފޯމަކަށް އެޅުވުމަށެވެ. އެޓީމުން 2002 ވަނަ އަހަރަށްފަހު ވޯލްޑް ކަޕް ކާމިޔާބު ކޮށްފައި ނުވާ އިރު، އަދި އެ ލެވެލްއަށް ޓީމު ގެންދެވިފައެއް ނުވެއެވެ. އެންޗެލޮޓީ ބުނީ އެކަމަށް ވަގުތު ނެގުން އެއީ މައްސަލައެއް ނޫން ކަމަށާއި، އޭނާއަކީ ކަންކަމުގައި ކެތްތެރިވާ ކޯޗެއް ކަމަށެވެ.