އެމްޑީޕީގެ "ރަށްވެހި ތަރައްގީ" ފޯރަމް: ކައުންސިލްތަކުގެ 76 މަޝްރޫއަކަށް އިންވެސްޓަރުން ހޯދަނީ

ލޯކަލް ކައުންސިލްތަކުން ރަށްރަށުގައި ހިންގުމަށް ކަނޑައަޅާފައިވާ ތަރައްގީގެ މުހިންމު މަޝްރޫއުތަކަށް އިންވެސްޓަރުން ހޯދުމުގެ ގޮތުން، އެމްޑީޕީން އިސްނަގައިގެން ބާއްވާ "ރަށްވެހި ތަރައްގީ" އިންވެސްޓްމަންޓް ފޯރަމް މިއަދު ފަށައިފިއެވެ.

މި ފޯރަމްގެ މައިގަނޑު މަގުސަދަކީ ކައުންސިލްތަކުން އެކުލަވާލާފައިވާ ޕްލޭންތަކަށް ބޭނުންވާ ފައިނޭންސް ހޯދުމުގައި އިންވެސްޓަރުންނާ ދެމެދު ފާލަމެއް އަޅައިދިނުމެވެ. މި ފޯރަމަށް ރާއްޖޭގެ 27 ރަށު ކައުންސިލަކާއި ސިޓީ ކައުންސިލްތައް ހިމެނޭހެން ޖުމްލަ 76 ޕްރޮޕޯސަލެއް ހުށަހަޅަން ވަނީ ހަމަޖެހިފައެވެ.

އެމްޑީޕީން ބުނީ، މީގެ ތެރެއިން އަގު ބަޔާންކޮށްފައިވާ 40 މަޝްރޫއުގެ ޖުމްލަ އިންވެސްޓްމަންޓް އަގު 306 މިލިއަން އެމެރިކާ ޑޮލަރަށް ވުރެ މައްޗަށް އަރާ ކަމަށެވެ. ހުށަހަޅާ ޕްރޮޕޯސަލްތަކުގެ ތެރެއިން މާލީ ގޮތުން އެންމެ ބޮޑު މަޝްރޫއެއް ހުށަހަޅަނީ ތިނަދޫ ސިޓީ ކައުންސިލުން ކަމަށް އެމްޑީޕީން ބުންޏެވެ. އެއީ ކާޑެއްދޫ އެއާޕޯޓު އިތުރަށް ތަރައްގީ ކުރުމާއި ރާއްޖޭގެ ދެކުނަށް ހާއްސަ ސީޕްލޭން ހަބެއް ގާއިމު ކުރުމުގެ ބިޔަ މަޝްރޫއު ކަމަށް އެމްޑީޕީން ބުންޏެވެ. މީގެ އިތުރުންވެސް ތިނަދޫގެ ތަރައްގީއަށް އަމާޒުކޮށް އިތުރު ފަސް މަޝްރޫއެއް އެ ކައުންސިލުން ވަނީ އެކުލަވާލައިފައެވެ.

މާލޭ ސިޓީ ކައުންސިލުން މި ފޯރަމަށް ހުށަހަޅާފައި ވަނީ މާލޭގެ ތިމާވެއްޓާއި ދުޅަހެޔޮކަމަށް އަމާޒުކުރެވިފައިވާ ކަންކަމެވެ. އެގޮތުން ކްލައިމެޓް ޕާކެއް ހެދުމާއި ވޯޓާފްރޮންޓް ކްލައިމްބިން ވޯލްއެއް އަދި ހާއްސަ ކަސްރަތު ސަރަހައްދެއް ތަރައްގީކުރުން ހިމެނެއެވެ.

އައްޑޫ ސިޓީ އާއި ފުވައްމުލަކު ސިޓީ ގުޅިގެން ސޯލާ ހޯމް ބެޓެރީ ސިސްޓަމްތައް ގާއިމުކުރުމުގެ މަޝްރޫއެއް ހުށަހަޅާފައިވާ އިރު، ކުޅުދުއްފުށީ ސިޓީ ކައުންސިލުން ހުށަހަޅާފައިވަނީ "ގޭދޮށު އިންޖީނުގެ" ނަމުގައި ސޯލާ ހަކަތަ އުފެއްދުމުގެ މަޝްރޫއެކެވެ.

މީގެ އިތުރުން، އައްޑޫ ސިޓީގައި ޒަމާނީ ކޮންވެންޝަން ސެންޓަރެއް ގާއިމުކުރުމުގެ މަޝްރޫއު ހިމެނޭ ގޮތަށް، އައްޑޫ އަދި ފުވައްމުލަކު ސިޓީ ކައުންސިލުން ޖުމްލަ އަށް މަޝްރޫއަކަށް އިންވެސްޓަރުން ހޯދުމުގެ މަސައްކަތް މި ފޯރަމްގެ ތެރެއިން ކުރިއަށް ގެންދާނެއެވެ.