އިމިގްރޭޝަންގެ ކޮންޓްރޯލަރުގެ މަގާމުން ވަކިކުރި މުހައްމަދު ޝަމްއާން ވަހީދު 25 އަހަރަށް ޖަލަށް ލުމަށް ކުރިމިނަލް ކޯޓުން ކުރި ހުކުމް، އޭނާގެ ފަރާތުން ހައި ކޯޓުގައި އިސްތުއުނާފު ކޮށްފިއެވެ.

ޝައްމާންގެ މައްޗަށް ކުށް ސާބިތުވެ، 25 އަހަރަށް ޖަލަށް ލާން ކުރިމިނަލް ކޯޓުން ހުކުމް ކުރީ މިއަހަރުގެ ޖޫން މަހުގެ ނުވަ ވަނަ ދުވަހުއެވެ.

ޝަމްއާންގެ މައްޗަށް ދައުލަތުން ކުރީ ފޭރުމުގައި ބައިވެރިވުމުގެ ދެ ދައުވާ، ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ދެ ދައުވާ އަދި މަނީ ލޯންޑަރިންގެ އެއް ދައުވާއެވެ.

މަނީ ލޯންޑަރިންގެ ދައުވާ ސާބިތުވުމުގެ ސަބަބުން ޝަމްއާންގެ މައްޗަށް އިއްވާފައިވަނީ 15 އަހަރުގެ ޖަލު ހުކުމެކެވެ. ފޭރުމުގައި ބައިވެރިވިކަމުގެ ދައުވާ ސާބިތުވުމުގެ ސަބަބުން 8 އަހަރުގެ ޖަލު ހުކުމެއް އިއްވިއިރު، ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށް ސާބިތުވެފައިވާތީ އިއްވީ ދެ އަހަރުގެ ހުކުމެކެވެ.

ޝަމްއާންގެ ފަރާތުން މި މައްސަލަ ހައި ކޯޓުގައި އިސްތިއުނާފު ކޮށްފައިވާ އިރު، މި މައްސަލަ ހައިކޯޓަށް ބަލައިގަތްކަމެއް ސާފެއް ނޫނެވެ.

މަގާމުގެ ނުފޫޒު ނަހަމަ ގޮތުގައި ބޭނުންކޮށް، ބިދޭސީ މަސައްކަތްތެރީންގެ އަތުން ނާޖާއިޒު މަންފާ ހޯދަމުންދާކަމުގެ ތުހުމަތުގައި ފުލުހުން ޝަމްއާން ހައްޔަރުކޮށްފައިވަނީ މިދިޔަ އަހަރުގެ މާޗު މަހުގެ 22 ވަނަ ދުވަހުގެ ރޭގެ ވަގުތެއްގައެވެ. ޝަމްއާންގެ ބަންދާ މެދު ގޮތެއް ނިންމުމަށް މިދިޔަ އަހަރުގެ މާޗު 23 ވަނަ ދުވަހު ކުރިމިނަލް ކޯޓަށް ހާޒިރުކުރުމުން ވަނީ ބަންދަށް 15 ދުވަސް ޖަހައިފައެވެ.

ޝަމްއާންގެ ފަރާތުން ބަންދުގެ މައްސަލަ ހައިކޯޓަށް ހުށަހެޅުމުން އެ ކޯޓުގެ ރަޖިސްޓްރާ އެ މައްސަލަ ބަލައިނުގަތުމަށް މިދިޔަ އަހަރުގެ މާޗް މަހުގެ 28 ގައި ނިންމި ނަމަވެސް، ފަނޑިޔާރުންގެ މަޖިލީހަށް މައްސަލަ ހުށަހެޅުމުން ނިންމީ މައްސަލަ ބަލައިގަތުމަށެވެ. މައްސަލަ ބެލުމަށްފަހު ހައިކޯޓުންވެސް ނިންމީ ޝަމްއާން ޝަރީއަތް ނިމެންދެން ބަންދުކުރުމަށެވެ.

ޝަމްއާންގެ ފަރާތުން އެ ދެ އަމުރު ވެސް ސުޕްރީމް ކޯޓުގައި އިސްތިއުނާފު ކުރުމުން، ސުޕްރީމް ކޯޓުން އެ މައްސަލަ ބެލުމަށްފަހު މިދިޔަ އަހަރުގެ ޖޫން މަހުގެ 18 ވަނަ ދުވަހު ހުކުމްކުރީ ޝަރީއަތް ނިމެންދެން ޝަމްއާން ބަންދުކޮށްފައި ވަނީ ރަނގަޅަށް ކަމަށެވެ. ނަަމަވެސް މިދިޔަ އަހަރުގެ ޑިސެމްބަރު މަހުގެ 25 ވަނަ ދުވަހު ދައުލަތުން އެދިގެން ކުރިމިނަލް ކޯޓުން ވަނީ ޝަމްއާން ބަންދުން ދޫކޮށްލައިފައެވެ.

ކުރިމިނަލް ކޯޓުގައި މިދިޔަ އަހަރުގެ ނޮވެމްބަރުމަހުގެ ހަވަނަ ދުވަހު ބޭއްވި ޝަރީއަތުގައި އިފްތިތާހީ ބަޔާން ހުށަހަޅައިދެއްވަމުން ދައުލަތުން ބުނީ މި މައްސަލައިގެ ހާދިސާ ހިނގި ރޭގެ 11:30 އެހާކަންހާއިރު އިމިގްރޭޝަން ކޮންޓްރޯލާ ބިއުރޯގެ މުވައްޒަފުންތަކެއް، ރިސްކް ޑިޕާޓްމެންޓަށް އެނގުމެެއްނެތި ބިދޭސީއަކު ދިރިއުޅޭ ގެއަށް ގޮސް ރެއިޑު ޖެހި ކަމަށެވެ. ކޮންޓްރޯލާ ބިއުރޯގެ މުވައްޒަފުން އެ ރެއިޑު ޖަހާފައިވަނީ ރިސްކު ޑިޕާޓުމެންޓުގެ ހުއްދަނެތި ކަމަށާއި ނަމަވެސް އެ ރެއިޑު ޖަހާފައިވަނީ ޝަމްއާނަށް އެނގުމުގެ ތެރެއިން ކަމަށާއި އެކަން ދައުލަތުން ސާބިތުކޮށްދޭނެ ކަމަށެވެ.

ރެއިޑުގެ ތެރެއިން އިމިގްރޭޝަންގެ ޑިޓެންޝަނަށް ގެންދިޔަ ބިދޭސީއެއް ކަމަށްވާ މައިނުއްދީން އިމިގްރޭޝަންގެ ބެލުމުގެ ދަށުގައި ހުއްޓައި އެ ބިދޭސީ މީހާގެ ސްޕޮންސާގެ ނަމުގައި ސައްހަނޫން ލިޔުމެއް އުފައްދައި މައިނުއްދީން އެ ރޭގެ ދަންވަރު ބަންދުން ދޫކޮށްލާފައިވާކަމަށް ދައުލަތުން ބުނެފައިވެއެވެ. މައިނުއްދީން އަތުން 500،000 ރުފިޔާ އަތުލުމަށް ޝަމްއާން، ކޮންޓްރޯލާ ބިއުރޯގެ އެ މުވައްޒަފުންނަށް އެންގިކަމަށް ދައުލަތުން ބުނެފައިވެއެވެ. އެ ފައިސާ މައިނުއްދީން އަތުން އަތުލުމަށްފަހު ދެ ދުވަހުގެ ތެރޭގައި ރާއްޖެއިން ފުރައިގެން ނުގޮސްފިނަމަ އިތުރު ދަތިތަކެއް ކުރިމަތިކުރާނެކަމަށް ކޮންޓްރޯލާ ބިއުރޯގެ މުވައްޒަފުން، މައިނުއްދީން ކައިރީގައި ބުނިކަމަށް ދައުލަތުން ބުނެފައިވެއެވެ.

ކޮންޓްރޯލާ ބިއުރޯގެ މުވައްޒަފުން، މައިނުއްދީން އަތުން އަތުލާފައިވާ 500،000 ރުފިޔާގެ ތެރެއިން 400،000 ރުފިޔާ ޝަމްއާން ބަލައިގަނެފައިވާ ކަމަށް ދައުލަތުން ބުނެފައިވެއެވެ. އެ 400،000 ރުފިޔާގެ ތެރެއިން ބައެއް ފައިސާއިން ޝަމްއާން ވަނީ ދެ ސްޓޫޑެންޓު ލޯނަކަށް ފައިސާ ދައްކައި މަނީ ލޯންޑާކޮށްފައި ކަމަށް ދައުލަތުން ބުނެއެވެ. ޝަމްއާންގެ މައްޗަށް ދައުލަތުން ކުރާ ތިން ދައުވާ ސާބިތުކުރަން 80 ހެއްކެއް ހުށަހަޅާނެ ކަމަށް ދައުލަތުން ބުނެފައިވެއެވެ.

ދައުލަތުގެ އިފުތިތާހީ ބަޔާނަށް ރައްދު ދެއްވައި ޝަމްއާންގެ ގާނޫނީ ވަކީލު ނޫރުއްސަލާމް ވިދާޅުވެފައިވަނީ ދައުވާގައި ބަޔާންކުރާ ރެއިޑު ހިނގި ރޭ ލައްސާން ވަނީ ޝަމްއާނަށް ގުޅައި ބިދޭސީއަކު ވަގު ވިޔަފާރިކުރާކަމުގެ މައުލޫމާތު ލިބިފައިވާކަން އަންގައިފައި ކަމަށެވެ. ނަމަވެސް ޝައްމާން، ލައްސާނަށް އަންގާފައިވަނީ އެ މައުލޫމާތުގެ ސައްހަކަން ބެލުމަށް ކަމަށް ނޫރުއްސަލާމް ވިދާޅުވެފައިވެއެވެ. ޝަމްއާނަށް އެގޮތަށް އެންގި ނަމަވެސް ލައްސާން ވަނީ ރެއިޑުކުރި ގެއަށް ގޮސް ޝަމްއާނަށް ގުޅައިފައި ކަމަށާއި އެ ފޯނުކޯލުގައި ޝަމްއާން ވަނީ ލައްސާން އެތަނުގައި ހުރީ ކީއްވެގެންތޯ އަހައިފައި ކަމަށެވެ. އަދި އެ ވަގުތު ރެއިޑް ކުރަމުން ދިޔަ ގެއަށް އިމިގްރޭޝަންގެ ރިސްކު ޑިޕާޓްމެންޓް ފޮނުވާފައި ކަމަށެވެ.

ލައްސާން އެތަނަށް ދިޔައީ ޝަމްއާން އަންގައިގެން ނޫން ކަމަށާއި އެއީ ލައްސާން އަމިއްލައަށް އިސްނަގައިގެން ކުރި ކަމެއް ކަމަށް ނޫރުއްސަލާމް ވިދާޅުވެފައިވެއެވެ. ލައްސާނަކީ ދައުވާގައި ބަޔާންކުރާ ރެއިޑުގެ ކަންކަން ކުރި ފަރާތްކަމަށް ނޫރުއްސަލާމް ވިދާޅުވެފައިވެއެވެ. އަދި މިހާރު ފުލުހުންނަށް ވަކި ގޮތަކަށް ބަޔާން ދީގެން ދައުލަތުގެ ހެއްކަކަށް ވެގެން ހުރި ފަރާތެއް ކަމަށް ނޫރުއްސަލާމް ވިދާޅުވެފައިވެއެވެ. ހުރިހާ ކަމެއްގައި އަމަލީ ގޮތުން ބައިވެރިވީ ލައްސާން ކަމަށް ނޫރުއްސަލާމް ވިދާޅުވެފައިވެއެވެ.

ފުލުހުން ޝަމްއާންގެ ގެ ބަލައިފާސްކޮށް ހޯދި ފައިސާއަކީ ކިހިނެއް ހޯދި ފައިސާއެއްކަން ތަހުގީގަށް ކިޔައިދީފައިވާނެ ކަމަށެވެ. އަދި ގެއިން ފެނުނު ޑޮލަރަކީ ޝަމްއާންގެ ދެމަފިރިން ރާއްޖެއިން ބޭރަށް ބޭސްފަރުވާގެ ދަތުރަކަށް ދާތީ ހުރި ޑޮލަރު ކަމަށް ނޫރުއްސަލާމް ވިދާޅުވެފައިވެއެވެ. ޝަމްއާން، ސްޓޫޑެންޓް ލޯނަށް ފައިސާ ދެއްކި ގޮތްވެސް ތަހުގީގަށް ކިޔައިދީފައިވާނެ ކަމަށާއި އެއީ ސައްހަ ގޮތުގައި ހޯދި ފައިސާތަކެއްކަން ތަހުގީގަށް ކިޔައިދީފައިވާނެ ކަމަށެވެ.

ދައުލަތުން ބުނެފައިވާ ގޮތުގައި ރެއިޑުގެ ކަންކަމުގައި އުޅުނީ އެހެން ބައެއް ކަމަށާއި އެ މީހުން ޝަރީއަތުން ނުފެންނަކަމަށް ނޫރުއްސަލާމް ވިދާޅުވެފައިވެއެވެ. ހެކިންނަށް ނުފޫޒު ފޯރުވައިފާނެކަމަށް ބުނެ ޝަމްއާން ޝަރީއަތް ނިމެންދެން ބަންދުކުރި އިރު، އެ ހެކިން ޝަމްއާނާއެކު ބަންދުގައި އެފަހުން ތިބިކަން ނޫރުއްސަލާމް ފާހަގަކުރެއްވިއެވެ. އަދި ފުލުހުންގެ ނޫސް ބަޔާނުންނާއި ޕްރެސް ކޮންފަރެންސްތައް ބާއްވައިގެން ޝަމްއާންގެ އަބުރު ނަގާލިއިރު އޭނާ ހުރީ ދިފާއުގައި ބަހެއް ވިދާޅުވެވޭނެ ތަނެއްގައި ނޫން ކަމަށް ނޫރުއްސަލާމް ވިދާޅުވެފައިވެއެވެ.

މިދިޔަ އަހަރުގެ މާޗު މަހުގެ 22 ވަނަ ދުވަހުގެ ރޭ ޝަމްއާން ހައްޔަރުކުރުމަށްފަހު ފުލުހުން ނެރުނު ނޫސްބަޔާނެއްގައި ބުނެފައިވަނީ އިމިގްރޭޝަންގެ ބައެއް މުވައްޒަފުން، މަގާމުގެ ނުފޫޒު ނަހަމަ ގޮތުގައި ބޭނުންކޮށް، ބިދޭސީ މަސައްކަތްތެރީންގެ އަތުން ނާޖާއިޒު މަންފާ ހޯދަމުންދާކަމުގެ މައުލޫމާތު ލިބުމާ ގުޅިގެން އެ މައްސަލަތައް ތަހުގީގުކުރަމުން އަންނަ ކަމަށެވެ. މައްސަލައާ ގުޅިގެން އެ ރޭ ހިންގި އޮޕަރޭޝަނެއްގައި ގެއެއް ބަލައި ފާސްކޮށް، ތިން މީހަކު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް ފުލުހުން ބުނެފައިވެއެވެ. އަދި ހަމަ އެ ރޭ ފުލުހުން މީޑިއާތަކަށް ފޮނުވި މެސެޖެއްގައި ބުނެފައިވަނީ "އިމިގްރޭޝަންގެ ބައެއް މުވައްޒަފުން މަގާމުގެ ނުފޫޒު ނަހަމަ ގޮތުގައި ބޭނުންކޮށް، ބިދޭސީ މަސައްކަތްތެރިންގެ އަތުން ނާޖާއިޒް މަންފާ ހޯދަމުންދާ ކަމަށް ތުހުމަތު ކުރެވޭ މައްސަލައާ ގުޅިގެން ކުރީގެ ކޮންޓްރޯލާ ޖެނެރަލް އޮފް އިމިގްރޭޝަން ވަނީ މިރޭ ކޯޓު އަމުރެއްގެ ދަށުން ހައްޔަރުކޮށްފައި،" ކަމަށެވެ.

އެފަހުން ފުލުހުން ހަމަ އެ ރޭ ނެރުނު އިތުރު ނޫސްބަޔާނެއްގައި ބުނެފައިވަނީ އިމިގްރޭޝަންގެ ބައެއް މުވައްޒަފުން މަގާމުގެ ނުފޫޒު ނަހަމަ ގޮތުގައި ބޭނުންކޮށް، ބިދޭސީ މަސައްކަތްތެރިންގެ އަތުން ނާޖާއިޒު މަންފާ ހޯދަމުންދާ ކަމަށް ލިބިފައިވާ މައުލޫމާތާ ގުޅިގެން ހިންގާ ތަހުގީގުގައި މިހާތަނަށް ބެލިބެލުމުން، ގަވާއިދާ ހިލާފަށް އުޅެމުންދާ ބިދޭސީން ހޯދައި ޑިޓެއިންކުރުމުގެ ޒިންމާ އާއްމުކޮށް އާދަކުރަމުންދާ ޓާސްކް ފޯސް އަދި ރިސްކު މެނޭޖުމެންޓް ސެކްޝަނުގެ މުވައްޒަފުން ނޫން އިމިގްރޭޝަންގެ އެހެން ސެކްޝަންތަކުގައި މަސައްކަތްކުރާ މުވައްޒަފުންތަކެއް އެ މުވައްޒަފުންގެ މަގާމުގެ ނުފޫޒު ނަހަމަގޮތުގައި ބޭނުންކޮށް ބިދޭސީން ދިރިއުޅެމުންދާ ތަން ބަލައިފާސްކޮށް ހަދައިފައިވާކަން އެނގިފައިވާ ކަަމަށެވެ.

"އެ ގެއިން އިމިގްރޭޝަންގެ ބެލުމުގެ ދަށަށް ގެންދިޔަ ބިދޭސީން ގިނަ އަދަދެއްގެ ނަގުދު ފައިސާއާއެކު ގެންގޮސްފައިވެއެވެ. އަދި އޭގެ އެއް ދުވަސް ފަހުން އޭރުގެ ކޮންޓްރޯލާ ޖެނެރަލް އޮފް އިމިގްރޭޝަންގެ އަމުރަށް އެތަނުން 530،000 ދިވެހި ރުފިޔާއާއެކު އިމިގްރޭޝަންގެ ޑިޓެންޝަނަށް ގެންދެވުނު ބިދޭސީއަކު ދަންވަރުގެ ވަގުތެއްގައި ޑިޓެންޝަނުން ދޫކޮށްލާފައިވާކަން ތަހުގީގަށް އެނގިފައިވެއެވެ." ފުލުހުންގެ ބަޔާނުގައި ބުނެފައިވެއެވެ.

"މީގެ އިތުރުން، އިސްވެ ދެންނެވުނު ގެ ބަލައި ފާސްކުރުމުގައި އަމަލީގޮތުން ބައިވެރިވި އިމިގްރޭޝަން މުވައްޒަފުން ޑިޓެންޝަނުން ދޫކޮށްލި ބިދޭސީ މީހާއާ މަގުމަތިން ބައްދަލުކޮށް، އޭނާގެ އަތުގައި ހުރި ފައިސާތަކެއް ހޯދައި އެ ފައިސާތައް ހިފައިގެން، 2025 މާޗު 21 ވަނަ ދުވަހާ ހަމައަށް ކޮންޓްރޯލާ ޖެނެރަލް އޮފް އިމިގްރޭޝަންގެ މަގާމު އަދާކުރަމުން ދިޔަ މުހައްމަދު ޝަމްއާން ވަހީދު ދިރިއުޅޭ އިމާރާތަށް ވަދެފައިވާކަން ވެސް ތަހުގީގަށް އެނގިފައިވެއެވެ."

އެ މައްސަލައާ ގުޅިގެން ކޯޓު އަމުރެއްގެ ދަށުން ފަސް މީހުން ހުއްޓުވައި ބަލައިފާސްކޮށް އެ މީހުންގެ އަތުން އިލެކްޓްރޯނިކް ސާމާނުތައް ފުލުހުންގެ ބެލުމުގެ ދަށަށް ގެންގޮސްފައިވާނެ ކަމަށް ފުލުހުން ބުނެފައިވެއެވެ. އަދި ޝަމްއާން ދިރިއުޅޭ ގެ ބަލައިފާސްކޮށް ގިނަ އަދަދެއްގެ ފައިސާގެ އިތުރުން އިލެކްޓްރޯނިކް ސާމާނުތަކެއް ފުލުހުންގެ ބެލުމަށް ދަށަށް ގެންގޮސްފައިވާނެ ކަމަށް ވެސް ފުލުހުން ބުނެފައިވެއެވެ.

އޭގެ ތެރެއިން ބައެއް މީހުންގެ މައްޗަށް ކުށް ސާބިތުވާކަމަށް ކަނޑައަޅައި މިހާރު ވަނީ ހުކުމްކޮށްފައެވެ.