މިހާރުގެ ސަރުކާރުގެ ސިޔާސަތުތަކުގެ ސަބަބުން ގައުމު ބޮޑު އަނދަވަޅަކާ ދިމާއަށް ދަތުރުކުރަމުންދާ ކަމަށާއި، ދިވެހި ރައްޔިތުންނަށް ދެން ވެސް ހެޔޮލަފާ އަދި ކާމިޔާބު ވެރިކަމެއް ކޮށްދެވޭނީ އެމްޑީޕީއަށް އެކަނިކަމަށް އެ ޕާޓީގެ ޗެއާޕާސަން، ކުރީގެ ރައީސް މުހައްމަދު ނަޝީދު މިރޭ ވިދާޅުވެއްޖެއެވެ.

އެމްޑީޕީގެ ފަސްވަނަ ކޮންގްރެސް ފެށުމަށް މިރޭ ބޭއްވި ޖަލްސާގައި ވާހަކަދައްކަވަމުން ނަޝީދު ވިދާޅުވީ ރާއްޖެ މިއަދު ދެކޭ ޒަމާނީ ތަރައްގީއާއި އިޖުތިމާއީ ރައްކާތެރިކަމުގެ ބިންގަލަކީ އެމްޑީޕީގެ ވެރިކަމުގައި ކޮށްދީފައިވާ ބުރަ މަސައްކަތްތައް ކަމަށެވެ. އެގޮތުން، ދައުލަތަށް ޓެކްސްގެ ނިޒާމު ތައާރަފްކޮށް އާމްދަނީ ހަތް ބިލިއަނުން 40 ބިލިއަން ރުފިޔާއަށް އިތުރުކުރެވުނީ އެ ޕާޓީގެ އިގްތިސޯދީ ހަރުދަނާ ސިޔާސަތުންކަމަށް ނަޝީދު ވިދާޅުވިއެވެ.

ނަޝީދު ވިދާޅުވީ ދޮށީ އުމުރުގެ މީހުންނާއި ޔަތީމުންގެ އިނާޔަތްތަކާއި، ރަށްރަށް ދަތުރުފަތުރުގެ ވިއުގައަކުން ގުޅާލުމާއި، ކޮވިޑް-19 ގެ ބަލިމަޑުކަމުން ގައުމު ސަލާމަތްކުރުމުގެ އިތުރުން، ހިލޭ ފުރަތަމަ ޑިގްރީ އަދި މިނިމަމް ވޭޖު ތައާރަފްކުރުމަކީ ރައްޔިތުންގެ ލާބައަށް އެމްޑީޕީން ކޮށްދިން މުހިންމު ކަންކަން ކަމަށެވެ.

"މި ޕާޓީއަކީ ދެންވެސް ދިވެހިންނަށް ހެޔޮގޮތް ހޯދައިދޭނެ ޕާޓީ" ނަޝީދު ވިދާޅުވިއެވެ.

މިހާރުގެ ޕީއެންސީ ސަރުކާރަށް ފާޑުވިދާޅުވަމުން ނަޝީދު ވިދާޅުވީ ގައުމުގެ މިސްރާބު ހުރީ ނުރައްކާތެރި ދިމާއަކަށް ކަމަށާއި، މި ސަރުކާރު ބަދަލުކުރުން ލާޒިމުވެފައިވާ ކަމަށެވެ. އަދި ރާއްޖޭގެ ސަލާމަތާއި ހަމަޖެހުން ގުޅިފައިވަނީ ހާރިޖީ ގޮތުން އަވަށްޓެރި ގައުމުތަކާ ގުޅުން ބަދަހިކުރުމުގެ މައްޗަށްކަމަށް ނަޝީދު ވިދާޅުވިއެވެ.

ނަޝީދު ވިދާޅުވީ، ރާއްޖޭގެ ޖިއޮގްރަފީ އޮތްގޮތުން އިންޑިއާއާ އެކު ގާތް ގުޅުމެއް ބޭއްވުމަކީ އެހެން އެއްވެސް ގައުމަކަށް ބަދުބަހެއް ބުނުން ނޫން ކަމަށާއި އެއީ ގައުމުގެ ހަގީގީ މަސްލަހަތު ކަމަށެވެ.