ޕޯޗުގަލްގެ ކެޕްޓަން އަދި ތަރި ކްރިސްޓިއާނޯ ރޮނާލްޑޯއާ އެއްވެސް މައްސަލައެއް ނެތް ކަމަށް ކޯޗު ޖޯޖް ޖީޖަސް ބުނި ނަމަވެސް، އޭނާ ގައުމީ ޓީމުގެ ސްކޮޑު ދޫކޮށްލިކަން ރަސްމީކޮށް އިއުލާނު ކޮށްފިއެވެ.

ޕޯޗުގަލްއިން މާދަމާ ރޭ ޑެންމާކާ ދެކޮޅަށް ކުޅެން އޮތް އިރު، އެމެޗުގެ ޕްރި މެޗު ޕްރެސް ކޮންފަރެންސްގައި މިއަދު ކޯޗު ޖޯޖް ބުނީ ރޮނާލްޑޯ އެންމެފަހުން މެޗުގައި ބެންޗް ކުރީ މާކުރިން ރާވައިގެން ކަމަށެވެ. އަދި މާދަމާ ރޭ ޑެންމާކާ ދެކޮޅަށް ކުޅޭ މެޗުގައިވެސް ރޮނާލްޑޯ ފަށާނީ ބެންޗުން ކަމަށާއި، އެއީ އެއްވެސް މައްސަލައެއް އޮވެގެން ނޫން ކަމަށް އޭނާ ބުންޏެވެ.

އެހެން ކޯޗު ކިޔައިދިނުމުގެ ކުރިން ބައެއް ނޫސްތަކުން ވަނީ ރޮނާލްޑޯ، ޕޯޗުގަލްގެ ކޭމްޕް ދޫކޮށް ނުކުމެގެންދާ މަންޒަރު ފެންނަ ވީޑިއޯތަކެއް އާންމުކޮށްފައެވެ. ބައެއް އިތުބާރު ނޫސްތަކުން އެހެން ބުނި ނަމަވެސް، ކޯޗު ޖޯޖް ވަނީ އެކަން އިންކާރު ކޮށްފައެވެ.

ކުރިން އަލް ނަސްރުގައިވެސް ރޮނާލްޑޯއަށް ކޯޗުކަން ކޮށްދިން ޖޯޖް ޕްރެސްގައި ރޮނާލްޑޯގެ ހާލަތު ތަފުސީލުކޮށްދިންތާ މާގިނައިރެއް ނުވެ، ރޮނާލްޑޯގެ ރަސްމީ ސޯޝަލް މީޑިއާގައި ބުނީ ކޯޗުގެ ޕްރެސްއާ ގުޅިގެންނާއި، ޕޯޗުގަލް ފެޑަރޭޝަނުގެ ރައީސާ ދެއްކި ވާހަކަތަކަށް ފަހު ގައުމީ ޓީމުގެ ކޭމްޕް ދޫކޮށްލަން ނިންމާފައިވާ ކަމަށެވެ. އަދި ކުރިއަށް އޮތް ދުވަސްތަކުގައި ޕޯޗުގަލްގެ ރައްޔިތުންނަށް އެކަމުގެ ހަގީގަތް ހާމަކުރާނެ ކަމަށާއި، އަބަދުވެސް ގައުމީ ޓީމަށް ދިޔައީ 100 ޕަސެންޓް ދެމުން ކަމަށް ރޮނާލްޑޯ ބުންޏެވެ.

ރޮނާލްޑޯ ބުނީ މިވަގުތު އޭނާ ގައުމީ ޓީމަށް ކާމިޔާބަށް އެދޭ ކަމަށެވެ. އެހެން ބުނި ނަމަވެސް، 41 އަހަރުގެ ރޮނާލްޑޯ ގައުމީ ޓީމުން ރިޓަޔާކުރި ކަމަށް ބުނެފައެއް ނުވެއެވެ.

ރޮނާލްޑޯ މި ސީޒަނަށްފަހު ފުޓުބޯޅަ ހުއްޓާލާނެކަމަށް ބުނެފައިވާ އިރު، މިދިޔަ ވޯލްޑް ކަޕަށްފަހު ގައުމީ ޓީމުން ރިޓަޔާކުރާނެ ކަމަށް ބައެއް ވާހަކަތައް ދެކެވުނެވެ. އެހެން ނަމަވެސް ރޮނާލްޑޯ ބުނީ ގައުމީ ޓީމުން ބޭނުންވާނަމަ ކުޅެން ތައްޔާރު ކަމަށެވެ. އަދި ކުޅެނީ އެކަމަށް ގައުމީ ޓީމު ބޭނުންވާތީ ކަމަށެވެ.

ރޮނާލްޑޯ މީގެ ކުރިން 2022 ވަނަ އަހަރު ވޯލްޑް ކަޕް ތެރޭގައި އޭރުގެ ކޯޗު ފެނާންޑޯ ސަންޓޯސްއާވެސް ހިޔާލު ތަފާތުވެފައިވެއެވެ. އެއީ ބެންޗް ކުރުމުންނެވެ. އަދި ހަމަ އެހަރު ވޯލްޑް ކަޕްގެ ކުރިން މެންޗެސްޓާ ޔުނައިޓެޑަށް ކުޅުނު އިރު، އޭރު އެ ކްލަބުގައި ހުރި ކޯޗު އެރިކް ޓެން ހާގަށްވެސް ރޮނާލްޑޯ ވަނީ ފާޅުގައި ފާޑު ކިޔައިފައެވެ.