އެމްއެމްޕީއާރުސީގެ ބޮޑު ހިޔާނާތުގެ ތެރެއިން ވ. އާރަށަށް ކުއްޔަށް ދިނުމާ ގުޅޭ ޔާނާތުގެ މައްސަލައިގައި ކުރީގެ މަޖިލިސް މެންބަރު ޔޫސުފް ނައީމްގެ މައްޗަށް ދައުލަތުން ކުރާ ދައުވާގައި ވަކީލަކު އައްޔަންކުރަން 10 ދުވަހުގެ މުއްދަތެއް ކުރިމިނަލް ކޯޓުން ދީފިއެވެ.

މި މައްސަލައިގައި ރައީސް ޔާމީންގެ މައްޗަށް ދައުވާކުރަނީ، އާރަށް ޓޫރިޒަމަށް ދޫކުރުމުގެ ތެރެއިން ރިޝްވަތުގެ ގޮތުގައި އެއް މިލިއަން ޑޮލަރު ނަގައި އެ ފައިސާ ލޯންޑާ ކުރި ކަމުގެ ކުށުގެ ތުހުމަތުގައެވެ. ޔޫސުފް ނައީމުގެ މައްޗަށް ކުރަނީ ރައީސް ޔާމީނަށް ރިޝްވަތު ދިން ކަމުގެ ކުށުގެ ދައުވާއެވެ.

މި ދައުވާތަކުގައި މީގެ ކުރިން ކުރިމިނަލް ކޯޓުން ހުކުމް ކުރިއެވެ.

އެގޮތުން ރައީސް ޔާމީންގެ މައްޗަށް 11 އަހަރު ދުވަހުގެ މުއްދަތަށް ޖަލަށްލައި ފަސް މިލިއަން ޑޮލަރުން ޖޫރިމަނާ ކުރުމަށް ހުކުމް ކުރިއެވެ. އެއީ މަނީ ލޯންޑަރިންގެ ކުށުގެ ދައުވާގައި ހަތް އަހަރާއި ރިޝްވަތު ގަބޫލުކުރުމުގެ ކުށުގެ ދައުވާ ސާބިތުވެފައިވާ ކަމަށް ކަނޑައަޅައި، އިއްވި ހަތަރު އަހަރުގެ ޖަލު ހުކުމެކެވެ.

މި މައްސަލައިގައި ޔޫސުފް ނައިމުގެ މައްޗަށް ކުރީ ތިން އަހަރާއި ދެ މަހާއި 12 ދުވަހަށް ޖަލަށް ލުމުގެ ހުކުމެކެވެ. ނަމަވެސް މި މައްސަލައިގެ އިސްތިއުނާފު މަތީ ކޯޓު ތަކުގެ މަރުހަލާތަކުން ގޮސް، ކުރިމިނަލް ކޯޓުގެ ހުކުމް ބާތިލުކޮށް އެ މައްސަލަ އަލުން ބަލަން ސުޕްރީމް ކޯޓުން ކުރިމިނަލް ކޯޓަށް އެންގިއެވެ.

އެކަމާ ގުޅިގެން އަހަރެއްގެ މެދުކެނޑުމަކަށްފަހު އާ ރަށު މައްސަލަ މި ވަނީ އިއްޔެ ކުރިމިނަލް ކޯޓުގައި ފަށައިފައެވެ.

މި މައްސަލައިގައި އިއްޔެގެ އަޑުއެހުމުގައި އޮތީ ރައީސް ޔާމީންގެ މައްޗަށް ކުރާ ދައުވާތައް ކުރިއަށް ގެންދިއުމެވެ. ނަމަވެސް މިއަދުގެ އަޑުއެހުމުގައި ކުރިއަށްދިޔައީ ޔޫސުފް ނައީމުގެ މައްސަލައިގެ އަޑުއެހުމެކެވެ. މިއަޑުއެހުމުގައި މައްސަލަ ބައްލަވާ ގާޒީ އަލީ ނަދީމު ވަނީ ހައިކޯޓުގެ ހުކުމާއެކު، މައްސަލަ މިހާރު އޮތް ހިސާބު ދެފަރާތަށް ސާފުކޮށްދެއްވައިފައެވެ.

މި އަޑުއެހުމުގައި ހައިކޯޓުގެ ނިންމުމަށް އަލިއަޅުވާލައްވައި ދައުލަތުގެ ވަކީލު ވިދާޅުވީ، ދައުލަތުން އެދެނީ ކުށުގެ އުންސުރުތަކާ މެދު ޔޫސުފް ނައީމް ފާހަގަކުރި ކަންކަމަށް ދެފަރާތަށް ވެސް ބަހުސް ކުރުމުގެ ފުރުސަތު ދެއްވުމަށްފަހު މައްސަލައިގެ ގޮތެއް ނިންމުމަށެވެ.

ނަމަވެސް މިއަދުގެ އަޑުއެހުމުގައި ޔޫސުފް ނައީމް ވަނީ އޭނާއަށް ވަކީލަކު އައްޔަނު ކުރުމުގެ ފުރުސަތެއް ދެއްވުމަށް އެދިވަޑައިގެންފައެވެ. އެހެންކަމުން ގާޒީ ނިންމެވީ ވަކީލަކު އައްޔަނުކުރުމަށް 10 ދުވަހުގެ މުއްދަތެއް އޭނާއަށް ދެއްވުމަށެވެ.

އެހެންކަމުން ދެން މި މައްސަލައިގެ އަޑުއެހުމެއް އޮންނާނީ އެ މުއްދަތަށްފަހު ކަމަށް ވިދާޅުވެ މިއަދުގެ އަޑުއެހުން ނިނމަވާލެއްވިއެވެ.