ޑޮލަރުގެ ބްލެކްމާކެޓް ހުއްޓުމަކަށް ގެނެސް ޑޮލަރުގެ އަގު ދަށްކުރުމަށް ސަރުކާރުގެ މާލީ ނިޒާމަށް ބަދަލު ގެނައުމަށްޓަކައި ސަރުކާރުން ގާނޫނުތަކާއި ގަވާއިދުތަކަށް ގެނައި ބަދަލުން ޑޮލަރުގެ ދަތިކަމަށް ކުޑަވެސް ހައްލެއް ނާންނަ ކަމަށް އެމްޑީޕީގެ ޗެއާޕާސަން، ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ޑޮލަރުގެ މައްސަލައަށް ހައްލެއް ނާންނަކަން ފާހަގަކުރައްވައި، ސޯޝަލް މީޑިއާގައި މިއަދު ކުރެއްވި ޕޯސްޓެއްގައި ރައީސް ނަޝީދު ވިދާޅުވީ، ޑޮލަރުުގެ އަގު އަދިވެސް ދަނީ މައްޗަށް ކަމަށެވެ. އޭގެ އިތުރުން އަމިއްލަ ވިޔަފާރިތަކަށް ޓީޓީ ނުހެދިގެން ތަކެތި އިމްޕޯޓް ނުކުރެވިފައިވާ ކަމަށްވެސް ވިދާޅުވިއެވެ.

"ސަރުކާރުން އުއްމީދުކުރީ ސެޕްޓެމްބަރު ނިމޭއިރު 40 ޕަސެންޓް މާރުކުރަން މަޖުބޫރު ކުރުމާއި އަދި ބޭރުގެ ޓުއާ އޮޕަރޭޓަރުން އަތުން ޖީއެސްޓީއަށް މަޖުބޫރު ކުރުމުން 160 މިލިޔަން ޑޮލަރު ލިބޭނެ ކަމަށް މީގެން އެއްކަމެއްވެސް ނުވި،"

އޭގެ ބަދަލުގައި ރައްޔިތުންނަށް ދަނީ ދަތިވަމުން ކަމަށްވެސް ރައީސް ނަޝީދު ވިދާޅުވިއެވެ.

ނަޝީދު މިހެން ވިދާޅުވެފައިވާއިރު، ރާއްޖޭގެ ބޭރުފައިސާގެ ހާލަތު ރަނގަޅުކޮށް ފައިސާގެ ނިޒާމު ހަމައަކަށް އެޅުމަށްޓަކައި މާލިއްޔަތާބެހޭ ގާނޫނުތަކަށާއި ބޭރު ފައިސާ އާއި ޓެކްސްގެ ގާނޫނަކަށް މުހިއްމު އިސްލާހުތަކެއް ސަރުކާރުން ވަނީ ގެނެސްފައެވެ.