ޔޫއެފާ ނޭޝަންސް ލީގު އޭގައި ޖަރުމަނުން ކުޅުނު މެޗުގައި ގްރީސް ކައިރިން ބަލިވި އިރު، ނޯވޭ ކައިރިން ޕޯޗުގަލް މޮޅެއް ހޯދައިފިއެވެ.

ނޭޝަންސް ލީގު އޭގެ ގްރޫޕް ދޭއްގައި ޖަރުމަނަށް މިހާތަނަށް އަދި މޮޅެއް ހޯދިފައެއް ނުވެއެވެ. އާ ކޯޗު ޔާގަން ކްލޮޕާއެކު އެގައުމުން ކުޅުނު ފުރަތަމަ މެޗުގައި ނެދަލޭންޑްސް ކައިރިން އެއްވަރުވި އިރު، ރޭ އަމިއްލަ ގައުމުގައި ގްރީސް ކައިރިން ބަލިވީ 1-0 އިންނެވެ.

އެ ގްރޫޕުގައި ރޭ ނެދަލޭންޑްސްއިން ވަނީ ސާބިއާ ކައިރިން 2-1 އިން މޮޅުވެފައެވެ.

ނޭޝަންސް ލީގު ގްރޫޕް ހަތަރެއްގައި މިހާތަނަށް ކުޅުނު ދެމެޗުންވެސް މޮޅުވި ޕޯޗުގަލްއިން ރޭ ރަށުން ބޭރުގައި ނޯވޭ ބަލިކުރީ 2-1 އިންނެވެ. ރޭގެ މެޗުގައި ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ފެނިގެން ދިޔައީ ބެންޗުންނެވެ.

ޖަރުމަނުން ކުޅުނު މެޗުގެ ކުރީކޮޅުގައި އެޓީމުން ހަމަލާތައް ގިނަކޮށް ފެނުނު ނަމަވެސް ގޯލެއް ޖެހޭ ގޮތެއް ނުވިއެވެ. 25 ވަނަ މިނެޓުގައި ކެވިން ޝޭޑްގެ ހުރަހަކުން ޔޫނުސް އެބްނުތާލިބް ނުރައްކާ ކުރި އިރު، އޭގެ އިރުކޮޅެއްފަހުން ކަރީމް އަދެޔޭމީއަށް ލިބުނު ފުރުސަތުވެސް ވީ ބޭކާރެވެ.

ދެވަނަ ހާފުގައިވެސް ޖަރުމަނުން ނުރައްކާ ކުރިއެވެ. ބަންބޭސް ކޮންޓޭއާއި އެބްނުތާލިބާއި ޖޯޝުއާ ކިމިކްގެ ހަމަލާތައް ފެނުނު ނަމަވެސް، އެ ހުރިހާ ހަމަލާއެއްވެސް މަތަކުރީ ހަލް ސިޓީއަށް ކުޅެމުންދާ ގްރީސް ކީޕަރު ކޮންސްޓަންޓީނޯސް ޒޮލަކިސްއެވެ.

މެޗުގެ 74 ވަނަ މިނެޓުގައި އޮއިވަރާ އިދިކޮޅަށް ގްރީސް ލީޑު ނެގިއެވެ. އާސެނަލްގެ ކްރިސްޓޯސް ޒޮލިސް ނަގައިދިން ހުރަސް ކުޅުންތެރިއެއް ގައިގައި ޖެހި ވެއްޓުނީ ޑިމިޓްރިއޯސް ކޫބެލިސް ފަޔަށެވެ. އޭނާ ފަސޭހަކަމާއެކު ބޯޅަ ގޯލަށް ވައްދާލިއެވެ.

އޭގެފަހުން ސާގް ނަބެރީގެ ހަމަލާއެއް ފެނުނު ނަމަވެސް ޖަރުމަނަށް މެޗު އެއްވަރެއް ނުކުރެވުނެވެ.

ޕޯޗުގަލްއާއި ނޯވޭގެ ކުރިމަތިލުން ފުރަތަމަވެސް ފެނުނީ ވާދަވެރިކޮށެވެ. އާލިން ހާލަންޑްގެ ބާރު ހަމަލާއެއް ޕޯޗުގަލް ކީޕަރު ޑިއޯގޯ ކޮސްޓާ މަތަކުރި އިރު، އަނެއްކޮޅުން ޖޮއާއޯ ނެވޭސް ބޮލުން ފޮނުވާލި ބޯޅަ ދިޔައީ ބޭރަށެވެ.

މެޗުގެ 17 ވަނަ މިނެޓުގައި ޕޯޗުގަލްއިން ލީޑު ނެގިއެވެ. ޕެޑްރޯ ނެޓޯ ކަނޑާލި ހުރަސް، އޭރިއާ ރޮނގުމަތިން ކަހަލަ ގޮތަކަށް ގޯލްގެ ކަނަށް ނިންމާލީ ޖޮއާއޯ ފެލިކްސްއެވެ.

އެހެން ނަމަވެސް ހާފު ނިމެން ދަނިކޮށް ނޯވޭއިން އިތުރަށް ނުރައްކާ ކުރިއެވެ. ނަތީޖާއެއްގެ ގޮތުން އެޓީމުގެ ތަރި ހާލަންޑް ވަނީ ދެވަނަ ހާފުގެ ކުރީކޮޅުގައި މެޗު އެއްވަރު ކޮށްފައެވެ. ހާލަންޑް ވަނީ ނޯވޭއަށް ކުޅުނު 57 މެޗުގައި 65 ގޯލް ޖަހައިފައެވެ.

އެ ގޯލަށް އިރުކޮޅެއްވެސް ނުވަނީސް ޕޯޗުގަލްއިން މެޗުން މޮޅުވި ގޯލް ޖެހީ ނޯވޭގެ ކީޕަރު އޯޔާން ނައިލޭންޑް އަތުން ހެދުނު ގޯހެއްގެ ބޭނުން ހިފައިގެންނެވެ. އެ ގޯލް ޖަހައިދިނީ ކޮންސާލޯ ރާމޯސްއެވެ.