އެމްޑީޕީގެ ޗެއާޕާސަން އިންތިހާބު ކުރީގެ ރައީސް މުހައްމަދު ނަޝީދު ކާމިޔާބު ކުރައްވައިފިއެވެ.

މި އިންތިހާބުގެ ވޯޓުލުން ކުރިއަށް ގެންގޮސްފައިވަނީ މިއަދު މެންދުރު 2:30 އިން ފެށިގެން މިރޭ 9:00 އަށެވެ. މި އިންތިހާބުގައި ވޯޓުލުމުގެ ހައްގު 48،912 މީހަކަށް ލިބިގެންވެއެވެ. މި އިންތިހާބުގައި ޖުމްލަ 241 ވޯޓު ފޮށި ބަހައްޓާފައިވެއެވެ. އޭގެ ތެރޭގައި ރާއްޖޭގެ ރަށްތަކުގައި ބެހެއްޓި 240 ފޮއްޓާއި ލަންކާގައި ބެހެއްޓި ފޮށި ހިމެނެއެވެ.

މި އިންތިހާބުގައި ރައީސް ނަޝީދާ ވާދަކުރެއްވީ ގަލޮޅު ދެކުނު ދާއިރާގެ މަޖިލިސް މެމްބަރު މީކާއީލް އަހުމަދު ނަސީމެވެ.

ނަޝީދު މި އިންތިހާބަށް ނުކުންނެވީ، "ދަ ޑިމޮކްރެޓްސް" ގައި ހުންނެވުމަށްފަހު އަލުން އެމްޑީޕީއާ ގުޅިވަޑައިގެން، "ބޮޑު ބަދަލު" ގެ ނަމުގައި އިސްލާހީ މެނިފެސްޓޯއަކާއެކުގައެވެ.

އިންތިހާބުގެ ވަގުތީ ނަތީޖާ އެމްޑީޕީން ރަސްމީކޮށް އިއުލާނު ކުރުމުގެ ކުރިން، މިހާތަނަށް ލިބިފައިވާ ނަތީޖާތަކުން ނަޝީދު ވަނީ ބޮޑު ކުރިއެރުމެއް ހޯއްދަވާފައެވެ. މި ކާމިޔާބީ ފާހަގަކުރުމަށްޓަކައި މިރޭ އާޓިފިޝަލް ބީޗުގައި ބާއްވާ ހަރަކާތަށް އެއްވުމަށް އެމަނިކުފާނު ވަނީ މިހާރު މެމްބަރުންނަށް ދައުވަތު ދެއްވާފައެވެ.

ނަޝީދުގެ ކެމްޕޭން ބިނާކޮށްފައިވަނީ އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއިލާ ގުޅިގެން، 2028 ވަނަ އަހަރުގެ ރިޔާސީ އިންތިހާބަށް އެމްޑީޕީ ތައްޔާރުކުރުމުގެ މައްޗަށެވެ. އެގޮތުން 2028 ގައި އެމްޑީޕީގެ ރިޔާސީ ކެންޑިޑޭޓެއްގެ ގޮތުގައި ފައްޔާޒް ނެރުއްވައި، އެމަނިކުފާނަށް ވެރިކަން ހޯދައިދިނުމަކީ ނަޝީދުގެ މައިގަނޑު އެއް އަމާޒެވެ.

މި ތަސައްވުރުގެ ދަށުން، ރާއްޖޭގެ ވެރިކަން ހިންގުމުގެ ނިޒާމަށް ބަދަލުތަކެއް ގެނައުމަށްވެސް ވަނީ ހުށަހަޅާފައެވެ. އޭގެ ތެރޭގައި ދައުލަތުގެ އެންމެ މަތީވެރިޔާ އާއި ސަރުކާރު ހިންގާ ވެރިޔާއަކީ ވަކި ދެ މަގާމަކަށް ހެދުން ހިމެނެއެވެ. މި ހުށަހެޅުމުގައިވާ ގޮތުން ސަރުކާރުގެ ވެރިޔާ ހޮވާނީ ރައްޔިތުންގެ ސީދާ ވޯޓަކުންނެވެ. ނަޝީދު ވަނީ ސަރުކާރު ހިންގުމުގެ އެންމެ އިސްވެރިޔާގެ މަގާމަށް ފައްޔާޒަށް ތާއީދުކުރައްވާނެ ކަމަށާއި، ދައުލަތުގެ އެންމެ މަތީވެރިޔާގެ މަގާމަށް އެމަނިކުފާނު ޝައުގުވެރިވާކަން ހާމަކުރައްވާފައެވެ.