ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ބައި-އިލެކްޝަނަށް ކުރިމަތިލުމަށް އިލެކްޝަންސް ކޮމިޝަން (އީސީ) އިން ހުޅުވާލި މުއްދަތު މިއަދު ހަމަވި އިރު، ކުރިމަތިލާފައިވަނީ ދެ ކެންޑިޑޭޓުން ކަމަށް އެ ކޮމިޝަނުން ބުނެފިއެވެ.

އީސީން މިއަދު ބުނީ، ބައި-އިލެކްޝަނަށް ކުރިމަތިލުމުގެ މުއްދަތު މިއަދު 15:00 އަށް ހަމަވެފައިވާ އިރު، އެ މުއްދަތުގެ ތެރޭގައި ފޯމު ހުށަހަޅާފައިވަނީ އެމްޑީޕީ އާއި ޕީއެންސީގެ ކެންޑިޑޭޓެއް ކަމަށެވެ.

ހިތަދޫ އުތުރު ދާއިރާގެ ބައި-އިލެކްޝަންގައި އެމްޑީޕީގެ ފަރާތުން ވާދަކުރައްވަނީ އައްޑޫ ސިޓީގެ ކުރީގެ މޭޔަރު އަބްދުﷲ ސޯދިގު (ސޯބެ) އެވެ. ޕީއެންސީގެ ފަރާތުން ވާދަކުރައްވަނީ އަހުމަދު ސައީދު (ސޮޑާ) އެވެ.

ހިތަދޫ އުތުރު ދާއިރާގެ ބައި-އިލެކްޝަން ބާއްވަން އީސީން ނިންމާފައިވަނީ އަންނަ މަހުގެ ހަ ވަނަ ދުވަހުއެވެ.

ހިތަދޫ އުތުރު ދާއިރާގެ ގޮނޑި ހުސްވީ، އެ ދާއިރާގެ މެންބަރުކަމުގައި ހުންނެވި މުހައްމަދު ސިނާންގެ މައްޗަށް ސާބިތު ދަރަންޏެއް ސުޕްރީމް ކޯޓުން ސާބިތުވުމުންނެވެ.