މިއަހަރު ބާއްވާ ރައްޔިތުންގެ މަޖިލީހުގެ އިންތިހާބުގެ އެމްޑީޕީގެ ޓިކެޓު އިތުރު ތިން ކެންޑިޑޭޓަކަށް ކަށަވަރުވެއްޖެއެވެ.
އެމްޑީޕީން މިއަދު ކުރި އިއުލާނެއްގައި ބުނީ އެ ޕާޓީގެ ޓިކެޓު ކަށަވަރުވި ތިން ކެންޑިޑޭޓުންނަކީ، އެ ޕާޓީގެ ޕާލިމެންޓްރީ ގްރޫޕުގައި މިހާރުވެސް ހިމެނިވަޑައިގަންނަވާ ދެ މެމްބަރެއް ކަމަށްވާ ކުޅުދުއްފުށި އުތުރު ދާއިރާގެ މެމްބަރު ޔާސިރު އަބްދުއްލަތީފު، ދިއްދޫ ދާއިރާގެ މަޖިލިސް އަބްދުﷲ ވަހީދުގެ އިތުރުން މާފަންނު އުތުރު ދާއިރާގެ ޓިކެޓު ލިބިވަޑައިގަތް އިފްހާމް ހުސެއިން ކަމަށެވެ.
އެމްޑީޕީން މިދިޔަ މަހުގެ ތިންވަނަ ދުވަހު ބުނެފައިވަނީ އެ ޕާޓީގެ ޓިކެޓު ޕްރައިމަރީއަކާ ނުލައި 35 ކެންޑިޑޭޓަކަށް ކަށަވަރުވެފައިވާ ކަމަށެވެ. އޭގެ ތެރޭގައި އެމްޑީޕީގެ ޕާލިމެންޓްރީ ގްރޫޕުގެ 15 މެމްބަރަކު ހިމެނިވަޑައިގަންނަވާ ކަމަށް އެ ފަހަރު ބުނެފައިވެއެވެ.
އެފަހުން ޖެނުއަރީ މަހުގެ 15 ވަނަ ދުވަހު އެމްޑީޕީން ބުނެފައިވަނީ އިތުރު 10 ކެންޑިޑޭޓަކަށް، ޕްރައިމަރީއަކާ ނުލައި އެ ޕާޓީގެ މަޖިލިސް ޓިކެޓު ކަށަވަރުވެފައިވާ ކަމަށެވެ. އޭގެ ތެރޭގައި ޕާލިމެންޓްރީ ގްރޫޕުގައި ހިމެނިވަޑައިގަންނަވާ ތިން މެމްބަރަކު ހިމެނޭ ކަމަށެވެ.
- ގެމަނަފުށި ދާއިރާގެ މެމްބަރު އަހުމަދު ސައީދު
- ހެންވޭރު އުތުރު ދާއިރާގެ މެންބަރު އިބްރާހިމް މުއިއްޒު
- ހުޅުމާލެ ދާއިރާގެ މިހާރުގެ މެންބަރު އަލީ ނިޔާޒު، ނިޔާޒަށް ޓިކެޓް ލިބިފައިވަނީ ކުރެންދޫ ދާއިރާއަށް ވާދަކުރެއްވުމަށް
- ގައްދޫ ދާއިރާއަށް ފެނަކަ ކޯޕަރޭޝަންގެ ކުރީގެ މެނޭޖިން ޑިރެކްޓަރު އަހުމަދު ސައީދު (މައިފޫނާ)
- ކަނޑިތީމު ދާއިރާއަށް އަމީން ފައިސަލް
- އިނގުރައިދޫ ދާއިރާއަށް ސަލީމް ހުސައިން
- ހުރާ ދާއިރާއަށް ޝާތިރު އަބްދުއްރަހްމާން
- ދަނގެތި ދާއިރާއަށް ރުގިއްޔާ މުހައްމަދު
- މުލަކު ދާއިރާއަށް މޫސާ ޝިޔާމް އަބްދުއްރަހްމާން
- ގަމު ދާއިރާއަށް އަބްދުﷲ ޝަރީފް
- ހޯރަފުށި ދާއިރާގެ މެމްބަރު އަހުމަދު ސަލީމް
- ވައިކަރަދޫ ދާއިރާގެ މެމްބަރު ހުސެއިން ޒިޔާދު
- މަކުނުދޫ ދާއިރާގެ މެމްބަރު މުހައްމަދު ރާއީ
- މިލަންދޫ ދާއިރާގެ މެމްބަރު އަލީ ރިޒާ
- ފުނަދޫ ދާއިރާގެ މެމްބަރު މުހައްމަދު ޝާހިދު
- ދުވާފަރު ދާއިރާގެ މެމްބަރު އިސްމާއީލް އަހުމަދު
- ހިންނަވަރު ދާއިރާގެ މެމްބަރު ޖީހާން މަހުމޫދު
- ދިއްގަރު ދާއިރާގެ މެމްބަރު އިކްރާމް ހަސަން
- ދާންދޫ ދާއިރާގެ މެމްބަރު ޔައުގޫބު އަބްދުﷲ
- ފުވައްމުލަކު މެދު ދާއިރާގެ މެމްބަރު ހުސެއިން މުހައްމަދުދީދީ
- ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް
- ހިތަދޫ ދެކުނު ދާއިރާގެ މެމްބަރު އިބްރާހީމް ނާޒިލް
- ގަލޮޅު ދެކުނު ދާއިރާގެ މެމްބަރު މީކާއީލް އަހުމަދު ނަސީމް
- ހެންވޭރު ދެކުނު ދާއިރާގެ މެމްބަރު ހުސެއިން ޝަމީމް
- މާފަންނު ހުޅަނގު ދާއިރާގެ މެމްބަރު މުހައްމަދު ފަލާހު
އެމްޑީޕގެ މަޖިލިސް ޕްރައިމަރީ ބޭއްވުމަށް ހަމަޖެހިފައިވަނީ އަންނަ ހޮނިހިރު ދުވަހުގައެވެ.
އެމްޑީޕީގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި މަޖިލީހުގެ މާފަންނު ހުޅަނގު ދާއިރާގެ މުހައްމަދު ފަލާހު ވިދާޅުވީ އެމްޑީޕީ މަޖިލިސް ޕްރައިމަރީގައި ކެންޑިޑޭޓުންގެ ގޮތުގައި 149 ކެންޑިޑޭޓުން ވާދަކުރާނެ ކަމަށެވެ. އަދި 40 ދާއިރާއަކަށް ވޯޓު ނެގުމުގެ ކަންތައްތައް ކުރިއަށްދާނެ ކަމަށް ވިދާޅުވިއެވެ. ޕްރައިމަރީގައި ވޯޓުލުމަށް 95 ރަށެއްގައި ވޯޓު ފޮށި ބަހައްޓާނެ ކަމަށާއި މާލޭގައި ބަހައްޓާނީ 27 ފޮށި ކަމަށް އޭނާ ވިދާޅުވިއެވެ.
އަތޮޅުތެރޭގައި ވޯޓުލާ ކަރުދާސް ހުންނާނީ ކަޅު ކުލައިން ކަމަށާއި މާލޭގައި ވޯޓުލާ ކަރުދާސް ހުންނާނީ ހުދު ކުލައިން ކަމަށް ފަލާހު ވިދާޅުވިއެވެ. އަދި ވިދާޅުވީ މާލޭގައި ވޯޓުލާ ދެ ލިސްޓު އޮންނާނެ ކަމަށާއި އެއީ މާލެއަށް ރަޖިސްޓްވެފައި އޮތް ލިސްޓަކާއި ރަށްރަށުގައި އޮންނަ ލިސްޓު ކަމަށެވެ.
އެމްޑީޕީގެ މަޖިލިސް ޕްރައިމަރީގައި ވޯޓުލުމުގެ ހައްގު 25،325 މީހުންނަށް ލިބިގެންވާ ކަމަށް އޭނާ ވިދާޅުވިއެވެ.
ޚަބަރު 
ޚަބަރު 
ޚަބަރު 
ޚަބަރު