ޕްރޮގްރެސިވް ކޮންގްރެސް ކޯލިޝަންގެ މަޖިލިސް އިންތިހާބުގެ ޕްރައިމަރީގެ ވޯޓުލުން ފަށައިފިއެވެ.

މިއަދު ހެނދުނު 10:00 ގައި ޕްރައިމަރީގެ ވޯޓުލުން ފަށާފައިވާއިރު 73 ދާއިރާއެއްގެ ޓިކެޓަށް 283 މީހަކު އެ ޕްރައިމަރީގައި ވާދަކުރެއެވެ. ވޯޓުލުން މިއަދު ހަވީރު 5:00 އާ ހަމައަށް ކުރިއަށް ދާނެ ކަމަށް އެ ކޯލިޝަނުން ވަނީ ބުނެފައެވެ.

މިހާރު ފަށައިގެން ކުރިއަށްދާ ޕްރައިމަރީގައި 227 ވޯޓު ފޮށި ބަހައްޓާފައި ވެއެވެ. މާލޭގައި ވޯޓު ފޮށިތައް ބަހައްޓާފައިވާ ތަންތަނަކީ:

  • ކަލާފާނު ސްކޫލު
  • ޖަމާލުއްދީން ސްކޫލު
  • ތާޖުއްތީ ސްކޫލު
  • ވިލިމާލޭ ޔޫތް ސެންޓަރު
  • ކާމިލްދީދީ ސްކޫލު (ހުޅުމާލޭ)
  • ރެހެންދި ސްކޫލު (ހުޅުމާލޭ)

އޭގެ އިތުރުން، އަތޮޅުތެރޭގެ މީހުން ވޯޓު ލުމަށް ވޯޓު ވޮށިތައް ބަހައްޓާފައި ހުރީ ހެންވޭރު ދަނޑުގައެވެ.

މިއަދު ބާއްވާ ޕްރައިމަރީގައި 71،597 މީހުންނަށް ވޯޓު ލުމުގެ ހައްގު ލިބިގެންވާ ކަމަށް ވެސް އެ ކޯލިޝަނުން ބުނެފައިވެއެވެ.