މުޅި ރާއްޖެއަށް ހުޅުވާލައިގެން އަތޮޅުތަކުގެ ރަށްތަކަށް ބާއްވާ ރާއްޖޭގެ އެންމެ ބޮޑު، އެންމެ ފޯރިގަދަ ފުޓްސަލް މުބާރާތް، ގޯލްޑަން ފުޓްސަލް ޗެލެންޖް 2024 ގެ ޕާޓްނަރެއްގެ ގޮތުގައި ގިޒްމޯ ހަމަޖައްސައި، އެއްބަސްވުމުގައި ސޮއިކޮށްފިއެވެ.

ގޯލްޑަން ފުޓްސަލް ޗެލެންޖް 2024، މިމަހުގެ 15 ވަނަ ދުވަހު ފެށުމަށް ތާވަލުކޮށްފައިވާ އިރު، ކުރީ އަހަރުތަކަށް ވުރެވެސް ފުރިހަމައަށް މިފަހަރު މުބާރާތް އިންތިޒާމުކުރުމަށް މިހާރުވެސް ގޯލްޑަން ފުޓްސަލް އެސޯސިއޭޝަނުން ދަނީ މަސައްކަތް ކުރަމުންނެވެ. 15 ވަނަ ދުވަހު މުބާރާތުގެ ކުޅުން ފެށުމަށް ތައްޔާރުވެފައި އޮތް ނަމަވެސް، 14 ވަނަ ދުވަހުގެ ރޭ ހާއްސަ ޗެރިޓީ މެޗެއް މިފަހަރުވެސް ކުޅެވިގެން ދާނެއެވެ.

ގޯލްޑަން ފުޓްސަލް ޗެލެންޖުގެ ޗެރިޓީ ޝީލްޑް މެޗުގައި މިފަހަރު ވާދަކުރާނީ އެންމެފަހުގެ ޗެމްޕިއަން ލ. ގަމާއި އޭގެ ކުރީ އަހަރުގެ ޗެމްޕިއަން، ތ. ތިމަރަފުއްޓެވެ.

ގިޒްމޯއާއެކު މިދިޔަ އަންގާރަ ދުވަހު ބޭއްވި ސޮއިކުރުމުގެ އިވެންޓްގައި ގިޒްމޯގެ ފަރާތުން ސޮއިކުރެއްވީ ހުސެއިން ވިޝާއު މުހައްމަދެވެ. ގޯލްޑަން ފުޓްސަލް އެސޯސިއޭޝަނުގެ ފަރާތުން އެއްބަސްވުމުގައި ސޮއި ކުރެއްވީ ނައިބު ރައީސް މުހައްމަދު ނިހާން (ޑޮނީ) އެވެ.

މިދިޔަ އަހަރުގެ ގޯލްޑަން ފުޓްސަލް ޗެލެންޖްގައިވެސް 102 ޓީމަކުން ބައިވެރިވެ ކުޅެފައިވާ އިރު، 250 އަށްވުރެ ގިނަ މެޗު ކުޅެވިގެންދިޔައެވެ. އެ ހުރިހާ މެޗެއްގެވެސް އިންތިޒާމު ފުރިހަމައަށް ގޯލްޑަން އެސޯސިއޭޝަނުން ކުރިއަށް ގެންގޮސްފައިވާ އިރު، މިފަހަރު މެޗުތައް އިތުރުވާނެއެވެ. އެގޮތުން، ކުރިއަށްއޮތް މުބާރާތުގައި 129 ޓީމަކުން ވާދަކުރާ އިރު، 320 މެޗު ކުޅެވިގެންދާނެއެވެ.

ފުޓްސަލް ކުޅުންތެރިންނަށް ރާއްޖޭގައި ތަނަވަސްކޮށްދޭ އެންމެ ރަނގަޅު ޕްލެޓްފޯމަކަށް މިހާރު ވަނީ ގޯލްޑަން ފުޓްސަލް ޗެލެންޖް ވެފައެވެ.

ގޯލްޑަން ފުޓްސަލް ޗެލެންޖްގެ މިދިޔަ ދެ އަހަރު އަދި މިއަހަރުގެ ވެސް އޮންލައިން މީޑިއާ ޕާޓްނަރަކީ "ވަން އޮންލައިން" އެވެ.