ގަތަރު ވޯލްޑް ކަޕް 2022 ގެ ގްރޫޕް އީގެ ފުރަތަމަ މެޗުގައި ޖަރުމަނާއި ޖަޕާން ވާދަކުރާ މެޗުގެ ލައިވް ބްލޮގަށް "ވަން"ގެ ކިޔުންތެރިންނަށް މަރުހަބާ!

ހަތަރު ވޯލްޑް ކަޕެއް ކާމިޔާބު ކޮށްފައިވާ ޖަރުމަނީ ދުނިޔޭގެ ފުޓުބޯޅައިގެ އެންމެ ކާމިޔާބު އެއް ޓީމު. އެންމެފަހުން 2014 ވަނަ އަހަރު ޖަރުމަނުން ވޯލްޑް ކަޕް ނެގި ނެގުމާއި، އެގައުމުގެ ފުޓުބޯޅަ ސިސްޓަމުގެ ކާމިޔާބުކަމަކީ ޖަރުމަނުގެ ކާމިޔާބީގެ ހެކިތައް. އަބަދުވެސް ތަރިން އުފެއްދުމުގެ ނިޒާމެއް ޖަރުމަނުން ގާއިމު ކޮށްފައިވާ އިރު، އެޓީމުން މިފަހަރުގެ ވޯލްޑް ކަޕަށް ނުކުންނާނީ 2018ގެ ހިތި ތަޖުރިބާ ހަނދާން ނައްތާލުމަށް. މިއަހަރުގެ ކުރިން 2018 ވަނަ އަހަރު ރަޝިއާގެ މޮސްކޯގައި ބޭއްވި ވޯލްޑް ކަޕަށް ޗެމްޕިއަން ޓީމުގެ ގޮތުގައި ނުކުތް ޖަރުމަނު ކަޓައިގެން ދިޔައީ ގްރޫޕް ސްޓޭޖުން.

އެންމެފަހުގެ ހަތް ވޯލްޑް ކަޕުގައިވެސް ޖަޕާނުން އޭޝިއާ ތަމްސީލު ކޮށްފައިވޭ. އެގައުމުން ވަނީ ހަތަރު ފަހަރު އޭޝިއަން ކަޕް ކާމިޔާބުކޮށް ރެކޯޑު ހަދާފައި. 2002 ވަނަ އަހަރުގެ ވޯލްޑް ކަޕާއި 2010 ވަނަ އަހަރުގެ ވޯލްޑް ކަޕްގެ އިތުރުން އެންމެފަހުން ރަޝިއާގައި ބޭއްވި 2018 ވަނަ އަހަރުގެ ވޯލްޑް ކަޕްގެ ގަދަ 16 އަށް ޖަޕާނު ދަތުރު ކުރި.

  • ޖަޕާން - ހަޖިމޭ މޮރިޔަސޫ

އުމުރު: 54 އަހަރު

ޖަޕާނުގެ ގައުމީ ޓީމަށްވެސް ކުރިން ކުޅެފައިވާ ހަޖިމޭ މޮރިޔަސޫއަކީ ފުޓުބޯޅަ އާއިލާއެއްގެ ކޯޗެއް. ހަޖިމޭ މިޑްފީލްޑަރެއްގެ ގޮތުގައި ކްލަބު ކެރިއަރު އެއްކޮށް ކަހަލަ ގޮތަކަށް ހޭދަކުރީ ސަންފްރެސޭ ހީރޯޝީމާގައި. އެ ކްލަބަށް އޭނާ ވަނީ 14 އަހަރު ދުވަހުން 250 އަށްވުރެ ގިނަ މެޗު ކުޅެދީފައި. ކުޅުންތެރިއެއްގެ ގޮތުގައި ހަޖިމޭ މަޝްހޫރު ނޫން ނަމަވެސް އޭނާ ވަނީ ގައުމީ ޓީމަށްވެސް 35 މެޗު ކުޅެފައި.

2012 ވަނަ އަހަރު ކޯޗިން ކެރިއަރަށް ނުކުމެ ހަޖިމޭ ފުރަތަމަ މަސައްކަތް ކުރީ އޭނާގެ ކްލަބު ސަންފްރެސޭ ހީރޯޝީމާގައި. އެ ކްލަބާއެކު 2017 ވަނަ އަހަރާ ހަމައަށް މަސައްކަތް ކޮށް ދެން ހަވާލުވީ ގައުމީ ޒުވާން އަދި ސީނިއާ ޓީމާ. މިހާރުވެސް ހަޖިމޭ ހުރީ އެ ދެ މަގާމުގައި.

  • ހާންސީ ފްލިކް

އުމުރު: 57 އަހަރު

ހާންސީ ފްލިކަކީ ޖަރުމަނުގެ ގައުމީ ޓީމު ދަންނަ ކޯޗެއް. އެޓީމަށް އާ މޫނެއްވެސް ނޫން. ކުޅުންތެރިއެއްގެ ގޮތުގައި މިޑްފީލްޑަރަކަށް ބަޔާން މިއުނިކަށްވެސް މެޗުތަކެއް ކުޅެދިން ފްލިކަކީ 2006-2014 އިން ޖަރުމަނުގެ ކޯޗުކަމުގައި ޔޮކިމް ލޯގެ އެސިސްޓެންޓް. އޭގެ ފަހުން ބަޔާން މިއުނިކްގައި ނިކޯ ކޮވަކްގެ އެސިސްޓެންޓަކަށްވެސް ފްލިކް ހުރުމަށްފަހު، އެ ކްލަބުގެ ކޯޗުކަމާ ހަވާލުވެ، ޖަރުމަނު ލީގާއި ޗެމްޕިއަންސް ލީގު އަދި ޖަރުމަނު ކަޕް ނަގައި ޓްރެބަލް ފުރިހަމަ ކުރި. ފްލިކް ޖަރުމަނާ ހަވާލުވީ މިދިޔަ އަހަރު.