ގަތަރު ވޯލްޑް ކަޕް 2022 ގެ ގްރޫޕް ޑީގެ ދެވަނަ މެޗުގައި ފްރާންސާއި އޮސްޓްރޭލިއާ ވާދަކުރާ މެޗުގެ ލައިވް ބްލޮގަށް "ވަން"ގެ ކިޔުންތެރިންނަށް މަރުހަބާ!

ފްރާންސަކީ އެންމެފަހުގެ ދުނިޔޭގެ ޗެމްޕިއަނުން. އެޓީމުން މިފަހަރުގެ ވޯލްޑް ކަޕަށް ނުކުންނަނީ މޭމަތީގައި ޗެމްޕިއަން ބެޖު ޖަހައި، އެ ބެޖު ދިފާއުކުރުމަށް. ވޯލްޑް ކަޕްގެ ތާރީހުވެސް ބުރަވަނީ ފްރާންސް ކޮޅަށް. 2018 ވަނަ އަހަރުގެ ވޯލްޑް ކަޕް ތަށްޓަކީ ފްރާންސްގެ ދެވަނަ ވޯލްޑް ކަޕް ތަށި. ފްރާންސުން ވޯލްޑް ކަޕްގެ ތަށި ފުރަތަމަ ހޯދީ 1998 ވަނަ އަހަރު. ޒުވާން ތަރިންތަކަކާއެކު 1994 ވަނަ އަހަރު ވޯލްޑް ކަޕަށް ގޮސް، އެ މުބާރާތް ގެއްލުނު ނަމަވެސް ޒުވާން ކުޅުންތެރިންގެ ގޮތުގައި އަރައިގެން އައި ޒައިނުއްދީން ޒިދާން، ތިއަރީ އޮންރީގެ އިތުރުން ޑޭވިޑް ޓްރެޒެގޭ އަދި ލިލިއަމް ތުރާމް ފަދަ ކުޅުންތެރިންނާއެކު ފްރާންސުން 1998 ގެ ވޯލްޑް ކަޕް ކާމިޔާބު ކުރި

އަނެއްކޮޅުން ނުކުންނަ އޮސްޓްރޭލިއާއަށް މިއީ ހަތްވަނަ ވޯލްޑް ކަޕް. އެޓީމު ފުރަތަމަ ފެނިގެންދިޔައީ ވެސްޓް ޖަރުމަނުގައި ބޭއްވި ވޯލްޑް ކަޕް 1974 ގައި. އޭގެ ފަހުން އިންތިޒާރަކަށްފަހު އޮސްޓްރޭލިއާ ދެން ފެނިގެންދިޔައީ ވޯލްޑް ކަޕް 2006 ގައި. އެއަށްފަހު ކޮންމެ ވޯލްޑް ކަޕެއްގައި އޮސްޓްރޭލިއާ ފެނިގެންދޭ.

  • އޮސްޓްރޭލިއާ - އައިޑިން ހުރޫސްޓިޗް

އުމުރު: 26 އަހަރު

ކްލަބު: ހެލަސް ވެރޯނާ

ޔޫތު ކެރިއަރުގައި ވެސް ޖަރުމަނުގެ ޝާލްކޭ ފަދަ ޓީމުތަކަށް ކުޅުނު އެޓޭކިން މިޑްފީލްޑަރު ހުރޫސްޓިޗްގެ ސީނިއާ ކްލަބު ކެރިއަރު ފެށީ 2015 ވަނަ އަހަރު ނެދަލެންޑްސްގެ ގްރޯނިނެން އިން. އެއަށްފަހު އޭނާ ވަނީ 2020 ވަނަ އަހަރު ޖަރުމަން ބުންޑަލްސްލީގާގެ އެއިންޓްރެކްޓް ފްރެންކްފާޓްއަށް ސޮއިކޮށްފައި. އޭނާ ވަނީ އެ ކްލަބާއެކު މިދިޔަ ސީޒަނުގެ ޔޫރަޕާ ލީގު ކާމިޔާބުކޮށްފައި. މިސީޒަނުގައި ހުރޫސްޓިޗް ކުޅެމުން އަންނަނީ އިޓަލީގެ ހެލަސް ވެރޯނާއަށް. އޮސްޓްރޭލިއާ ސީނިއާ ގައުމީ ޓީމަށް 2017 ވަނަ އަހަރުން ފެށިގެން ކުޅެމުން އަންނަ ހުރޫސްޓިޗް ވަނީ 19 މެޗުން ތިން ގޯލު ކާމިޔާބުކޮށްދީފައި.

  • ފްރާންސް - ކިލިއަން އެމްބާޕޭ ލޮޓިން

އުމުރު: 23 އަހަރު

ކްލަބު: ޕީއެސްޖީ، ފްރާންސް

ކިލިއަން އެމްބާޕޭއަކީ ފުޓުބޯޅައިގެ ނުރައްކާތެރި ފޯވަޑެކެވެ. ގޯލު ޖެހުމުގެ ހުނަރުގެ އިތުރުން އެމްބާޕޭގެ ނުރައްކާ ބޮޑީ ބާރު ދުވެލީގެ ސަބަބުން. ކޮށްޓައި ނެއްޓުމަށް ހާއްސަ އެމްބާޕޭ ޒުވާން އުމުރު ހޭދަކުރީ ފްރާންސްގެ މޮނާކޯގައެވެ. އެކްލަބާއެކު ކްލަބު ކެރިއަރު ފެށި އެމްބާޕޭ އުމުރުން އެންމެ 18 އަހަރުގައި ލީގު ކާމިޔާބުކުރި. އެ އުމުރުގައި އެމްބާޕޭ ޗެމްޕިއަންސް ލީގުގައިވެސް ވިދާލި. ވިދުން ގަދަވެ، ޕީއެސްޖީން އޭނާ ގެންދިޔައީ 180 މިލިއަން ޔޫރޯގެ އަގުހުރި ޓްރާންސްފާއެއްގައި. ޕީއެސްޖީއާއެކު ޗެމްޕިއަންސް ލީގު ފައިނަލް ކުޅުނު އެމްބާޕޭއަކީ 2017 ވަނަ އަހަރު ގޯލްޑަން ބޯއީ. އުމުރުން 19 އަހަރު އެމްބާޕޭ ފްރާންސާއެކު 2018 ވަނަ އަހަރު ވޯލްޑް ކަޕް ހޯދީ ފައިނަލްގައި ގޯލު ޖަހައިގެން.