ޔޫރޯ 2020 ގެ ގަދަ 16 ގައި އިންގްލެންޑާއި ޖަރުމަނު ވާދަކުރާ މެޗުގެ ލައިވް ބްލޮގަށް "ވަން"ގެ ކިޔުންތެރިންނަށް މަރުހަބާ!

އިންގްލެންޑާއި ޖަރުމަނަކީ މިހާރު ދުނިޔޭގެ ފުޓުބޯޅައިގައި ގަދަ ދެ ބާރު. ޖަރުމަނާ އެއްވަރަށް އިންގްލެންޑަށް ތަށި ހޯދިފައި ނުވި ނަމަވެސް އިންގްލެންޑަކީ އަބަދުވެސް ތަރިންގެ ޓީމެއް. އެގައުމުގެ ވަރުގަދަ ފުޓުބޯޅަ ލީގާއެކު ޒުވާން ކުޅުންތެރިން އުފައްދައި އިންގްލެންޑުން ދަނީ ތަށްޓަކާ ގާތް ކުރަމުން. އަނެއްކޮޅުން ޖަރުމަނަކީ ދުނިޔޭގެ ޗެމްޕިއަންކަން ހަތަރު ފަހަރު، ޔޫރޯ ޗެމްޕިއަންކަން ތިން ފަހަރު ހޯދާފައިވާ ޓީމެއް. އެގައުމުގެ ފުޓުބޯޅަ ސިސްޓަމަކީ ދުނިޔޭގެ އެންމެ ވަރުގަދަ އެއް ސިސްޓަމް. އަބަދުވެސް ހުނަރުވެރި ކުޅުންތެރިން ޖަރުމަނުން ފެންނާނެ.

ޔޫރޯ 2020ގެ ގަދަ 16 އަށް ޖަރުމަނުން ދިޔައީ ގްރޫޕް އެފް، މަރުގެ ގްރޫޕުގެ ދެވަނަ ޓީމުގެ ގޮތުގައި. އެޓީމުން ވަނީ ގްރޫޕް ސްޓޭޖުގައި އެންމެ ފަހުގެ ޗެމްޕިއަން ޕޯޗުގަލް ބަލިކޮށް، ހަންގޭރީއާ އެއްވަރުކޮށްފައި. ޖަރުމަނުން ހަމައެކަނި ބަލިވީ ދުނިޔޭގެ ޗެމްޕިއަން ފްރާންސް އަތުން.

އިންގްލެންޑުން މިހާތަނަށް މުބާރާތުގައި ބަލިވެފައެއް ނުވޭ. އެޓީމުން ގްރޫޕް ސްޓޭޖުގައި ކްރޮއޭޝިއާއާއި ޗެކު ރިބަޕްލިކްވެސް ބަލިކޮށްފައި. އިންގްލެންޑަށް ތިން ޕޮއިންޓް ގެއްލުނީ ސްކޮޓްލޭންޑް އަތުން އެކަނި. އެ މެޗު އެއްވަރުވި ނަމަވެސް އިންގްލެންޑަށް ވަނީ ގްރޫޕް ޑީގެ އެއްވަނަ ލިބިފައި.

މިރޭގެ މެޗަށް ނުކުންނާނީ އިންގްލެންޑުގެ އަމިއްލަ ދަނޑުގައި، އެއީ ވެމްބްލީ ސްޓޭޑިއަމްގައި.

  • ޖަރުމަން

ޖަރުމަނާއި ސްޕެއިންއަކީ ޔޫރޯގައި އެންމެ ކާމިޔާބު ދެ ގައުމު. އެ ދެޓީމުންވެސް ތިން ފަހަރަށް ޔޫރޯ ކާމިޔާބު ކޮށްފައި. ޖަރުމަނުން އެންމެ ފުރަތަމަ ޔޫރޯ ކާމިޔާބުކުރީ 1972 ވަނަ އަހަރު ވެސްޓް ޖާމަނީގެ ގޮތުގައި އޮވެގެން. ފްރާންޒް ބެކައުންބާއޫގެ ކެޕްޓަން ކަމުގެ ދަށުގައި ޖަރުމަނުން އެ މުބާރާތް ކާމިޔާބުކުރި އިރު، އޭނާއަކީ ޖަރުމަނުގެ ފުޓުބޯޅަ ތާރީހު ދުށް އެންމެ މުހިއްމު ކުޅުންތެރިޔާ.

ދުނިޔޭގެ ފުޓުބޯޅައިގެ ގަދަ ބާރު ޖަރުމަނުން 1976 ވަނަ އަހަރު ޔޫރޯގެ ފައިނަލްވެސް ކުޅުނު. އަދި 1980 ވަނަ އަހަރު އަނެއްކާވެސް ޔޫރޯގެ ތަށި ހޯދި. އަބަދުވެސް އެއް ފަންތިއެއްގައި ގިނަ ދުވަސްތަކެއް ވަންދެން ޖަރުމަނު ފުޓުބޯޅަ ދަމަހައްޓާފައިވާކަން ފާހަގަވަނީ އެފަދަ ރެކޯޑުތަކުން. 1996 ވަނަ އަހަރު އަނެއްކާވެސް އެޓީމުން ޔޫރޯ ކާމިޔާބު ކުރި.

ކޯޗު ލޯއާއެކު 2012 ވަނަ އަހަރާއި 2016 ވަނަ އަހަރު ޔޫރޯ ސެމީ ފައިނަލް ޖަރުމަނުން ކުޅުނު ނަމަވެސް އެޓީމުން އަލުން ތަށި ހޯދުމާ އެންމެ ގާތަށް ޖެހިލީ 2008 ވަނަ އަހަރު. ވަރުގަދަ ސްޕެއިނާ ދެކޮޅަށް ކުޅުނު ވާދަވެރި ފައިނަލް މެޗުން ހިތްދަތި ގޮތަކަށް ބަލިވީ 1-0 އިން.

ގްރޫޕް ސްޓޭޖުގެ ނަތީޖާތައް:

ޖަރުމަނު 0-1 ފްރާންސް

ޖަރުމަން 4-2 ޕޯޗުގަލް

ޖަރުމަން 2-2 ހަންގޭރީ

  • އިންގްލެންޑް

ޔުރޯގެ ތަށި އިންގްލެންޑަށް އަދި ހޯދިފައެއް ނުވޭ. ޔޫރޯގައި އިންގްލެންޑަށް ތަށްޓާ އެންމެ ގާތަށް ވެސް ދެވުނީ ތިންވަނައާ ހަމައަށް. އެއީ 1968 ވަނަ އަހަރާއި 1996 ވަނަ އަހަރު. 1996 ވަނަ އަހަރުގެ ޔޫރޯ މުބާރާތް އިންގްލެންޑުގައި ބާއްވައި، އެ ޔޫރޯއަކީ އިންގްލެންޑަށް އުންމީދު ބޮޑުކޮށް އޮތް މުބާރާތެއް ނަމަވެސް އެ މުބާރާތުގައި ވެސް ސެމީން އިންގްލެންޑް ކެޓީ ހިތްދަތި ގޮތަކަށް. އެ މުބާރާތުގެ ބަދުނަސީބު ހަނދާންތައް އެންމެ ބޮޑަށް ގުޅިފައި ވަނީ މިހާރު އިނގިރޭސި ކޯޗުކަމުގައި ހުރި ގެރެތު ސައުތުގޭޓާ.

ޖަރުމަނާ ދެކޮޅަށް ކުޅުނު ސެމީ ފައިނަލް މެޗުގެ ފުރިހަމަ ވަގުތު ހަމަވިއިރު ނަތީޖާ އެއްވަރު ވެފައި އޮތުމުން ނަތީޖާ ނެރުނީ ޕެނެލްޓީ ޖަހައިގެން. ދެޓީމުންވެސް ފުރަތަމަ ފަސް ޕެނެލްޓީ ކާމިޔާބުކޮށް ޕެނެލްޓީ ޝޫޓްއައުޓް ދިގުލައިގެން ދިޔަ އިރު، ހަވަނަ ޕެނެލްޓީ ޖަރުމަނުން ވެއްދި ނަމަވެސް، އިންގްލެންޑަށް ވީ ނާކާމިޔާބު. އެ ފަހަރު އިންގްލެންޑަށް ނާކާމިޔާބުވި ޕެނެލްޓީ ޖެހީ މިހާރުގެ ކޯޗު ގެރެތު ސައުތު ގޭޓު.

2004 ވަނަ އަހަރާއި 2012 ވަނަ އަހަރުގެ ޔޫރޯގެ ކުއާޓާއަށް އިންގްލެންޑް ދިޔަ ނަމަވެސް 2008 ވަނަ އަހަރުވެސް ކެޓީ ގަދަ 16 އިން.

ގްރޫޕް ސްޓޭޖުގެ ނަތީޖާތައް:

އިންގްލެންޑް 1-0 ކްރޮއޭޝިއާ

އިންގްލެންޑް 0-0 ސްކޮޓްލޭންޑް

އިންގްލެންޑް 1-0 ޗެކު ރިޕަބްލިކް