ޔޫރޯ 2020 ގެ ގްރޫޕް ސީގެ ދެވަނަ މެޗުގެ ލައިވް ބްލޮގަށް "ވަން" ގެ ކިޔުންތެރިންނަށް މަރުހަބާ!

ޔޫރޯ 2020ގެ ގްރޫޕް ސީގެ ދެވަނަ މެޗުގައި މިރޭ ނެދަލޭންޑްސް ނުކުންނާނީ ޔޫކްރެއިންއާ ދެކޮޅަށް. ނެދަލޭންޑްގެ އަމިއްލަ ދަނޑު، ޔޯހަން ކްރައިފް އެރީނާގައި މެޗު ކުޅުން ވެގެންދާނީ ނެދަލޭންޑްސްއަށް ބޮޑު ހިތްހަމަޖެހުމަކަށް. ހާއްސަކޮށް އެގައުމުން ފުޓުބޯޅަ އަލުން ނަގައި ކޮޅަށް ޖެހުމަށް މިރޭ ކުޅޭ ފުރަތަމަ މެޗު ވަރަށް ބޮޑަށް މުހިއްމު ވާނެ.

މިރޭގެ މެޗު ތަފާތުވާނެ އެއް ސަބަބަކީ ގައުމީ ޓީމުގެ ދެ ލެޖެންޑުން ދެކޮޅުގެ ބެންޗުގައިވެސް އިރުޝާދު ދޭން ތިބުން. ފްރޭންކް ޑި ބޯއަކީ އެގައުމުގެ ގޯލްޑަން ޖެނެރާޝަންގެ ކެޕްޓަން. އަނެއްކޮޅުން އެންދްރޭސް ސެވްޗެންކޯއަކީ ޔޫކްރެއިންގެ ފުޓުބޯޅަ ތާރީހު ދުށް އެންމެ ކާމިޔާބު ކުޅުންތެރިޔާ.

  • ޔޯހަން ކްރައިފް އެރީނާއާއި އެމްސްޓަޑާމްގެ ބައެއް މައުލޫމާތު

ސިޓީ: އެމްސްޓެޑާމް

ސްޓޭޑިއަމް: ޔޯހަން ކްރައިފް އެރީނާ

ސަޕޯޓަރުންގެ ޖާގަ: 54،990 މީހުން

އުސޫލުތަކާއެކު ސަޕޯޓަރުން ވެއްދޭނެ ކަމަށް ބުނެފައިވާ އަދަދު: 12،000 މީހުން (25 ޕަސެންޓް)

އެމްސްޓަޑާމް

- 60 ޕަސެންޓް ދަތުރުތަކަށް ބޭނުން ކުރަނީ ބައިސްކަލް

- އެންމެ މަގުބޫލު މަންޒިލަކީ ކެނަލްސް ގެލޯ، ކެނަލްގައި 1500 ފާލަން ހުރަސްކޮށްފައިވޭ

- އަހަރަކު ގާތް ގަނޑަކަށް 17 މިލިއަން ފަތުރުވެރިން ޒިޔާރަތް ކުރޭ

ޔޯހަން ކްރައިފް އެރީނާ

- މަތި ކަހާލެވޭ ފުރާޅަކާއެކު ޔޫރަޕްގައި ބިނާކުރި ފުރަތަމަ ސްޓޭޑިއަމް

- 2018 ވަނަ އަހަރު ނަން ބަދަލުކުރީ ނެދަލެންޑްގެ ފުޓުބޯޅަ ލެޖެންޑް ޔޯހަން ކްރައިފްގެ ނަމާ ގުޅުވާފައި

- ނެދަލެންޑްގެ ވަރުގަދަ ކްލަބު އަޔެކްސްގެ ހޯމް ސްޓޭޑިއަމް

ޔޫރޯގައި ނެދަލެންޑްސް ފާހަގަކޮށްލެވެނީ ވަރުގަދަ ޓީމެއްގެ ގޮތުގައި. އެޓީމު ވަނީ ޔޫރޯގައި ނުވަ ފަހަރު ވާދަކޮށްފައި. އޭގެ ތެރެއިން ވެސް ނެދަލެންޑްސްއަށް ކާމިޔާބު ކުރެވުނީ އެންމެ މުބާރާތެއް. އެއީ 1988 ވަނަ އަހަރު ޖަރުމަނުގައި ބޭއްވި ޔޫރޯ. ފަހުގެ ތާރީހެއްގައި ނެދަލެންޑްސްގެ އެންމެ މާޔޫސީ ދުވަސްތަކަކީ 2014 ގެ ފަސް. ވޯލްޑް ކަޕް 2014ގެ ތިންވަނަ ހޯދުމަށްފަހު އެޓީމަށް ޔޫރޯ 2016 އަދި ވޯލްޑް ކަޕް 2018 އަށް ކޮލިފައި ވެވިފައެއް ނުވޭ.

އަނެއްކޮޅުން ޔޫރޯއަށް ޔޫކްރޭން ކޮލިފައިވީ ދެ ފަހަރު. އެއީ އެންމެފަހުން ކުޅުނު ދެ ޔޫރޯއަށް. ޔޫރޯ 2012، ޔޫރޯ 2016ގައި ވެސް ޔޫކްރޭން މުބާރާތާ އަލްވަދާއު ކިޔަން ޖެހުނީ ގްރޫޕު ސްޓޭޖުން. މިހާތަނަށް ޔޫކްރެއިން އާއި ނެދަލޭންޑްސް ވާދަކޮށްފައިވަނީ އެންމެ ދެ މެޗުގައި. އޭގެތެރެއިން 2008 ވަނަ އަހަރު ކުޅުނު އެކުވެރިކަމުގެ މެޗު ނެދަލޭންޑްސްއިން ކާމިޔާބު ކުރި ނަމަވެސް 2010 ގެ އެކުވެރިކަމުގެ މެޗު ނިމުނީ އެއްވަރުވެގެން.