ރާއްޖޭގެ ފަތުރުވެރިކަމުގެ 54 އަހަރުގެ ތާރީހުގައި މިހާތަނަށް އުފެއްދި ޖުމްލަ އެސެޓާ އެއްވަރުގެ އަގުހުރި އިންވެސްޓްމެންޓެއް ރަސްމާލޭގެ އީގަލް ހިލްސް މަޝްރޫއުން ގާއިމުވެގެންދާނެކަމަށް ޓްރާންސްޕޯޓް އެންޑް އިކޮނޮމިކް މިނިސްޓަރު މުހައްމަދު ސައީދު މިރޭ ވިދާޅުވެއްޖެއެވެ.

ރައީސް އޮފީހާއި، ޕީއެސްއެމް ގުޅިގެން ބާއްވާ "އަހާ" ފޯރަމްގެ އަށްވަނަ ޕްރޮގްރާމުގައި ވާހަކަދައްކަވަމުން ސައީދު ވިދާޅުވީ، 2040 ވަނަ އަހަރާ ހަމައަށް ރާއްޖެއަކީ ފުރިހަމައަށް ތަރައްގީވެފައިވާ ގައުމަކަށް ހެދޭނީ އިގްތިސޯދީ އޮނިގަނޑު މުޅިން އެހެން ހަރުފަތަކަށް ގެންގޮސްގެން ކަމަށެވެ. އަދި ހަމައެކަނި މިހާރު އޮތް ޓޫރިޒަމް މޮޑެލްގެ ތެރެއިން އެ ލަނޑުދަނޑި ހާސިލުނުކުރެވޭނެ ކަމަށާއި، ބޮޑެތި ބިޔަ މަޝްރޫއުތައް ރާއްޖެއަށް އަންނަން މަޖުބޫރުކަމަށް މިނިސްޓަރު ވިދާޅުވިއެވެ.

"އީގަލް ހިލްސް ޕްރޮޖެކްޓުން އެކަނި އެއް މިލިއަން ޓޫރިސްޓުން އެބަ އިތުރުވޭ. އެއާޕޯޓު ތަރައްގީ ކުރީ ހަތަރެއް ނުވަތަ ފަސް މިލިއަން އެރައިވަލް ނިއަ ޓާމްގައި އެޗީވްކުރުމަށްޓަކައި" ސައީދު ވިދާޅުވިއެވެ.

ސައީދު ވިދާޅުވީ، ރާއްޖޭގައި މިހާރު ހިންގާ 170 ރިސޯޓުން ސީދާ ގޮތެއްގައި އިގްތިސޯދަށް ވަންނަނީ 1.7 ބިލިއަން ޑޮލަރު ކަމަށެވެ. މުޅި ގައުމުގެ އިގްތިސޯދު އެންމެ ދާއިރާއަކަށް ބަރޯސާވެފައި އޮތުމަކީ ނުރައްކަލެއްކަން ފާހަގަކުރައްވައި މިނިސްޓަރު ވިދާޅުވީ، އީގަލް ހިލްސްގެ މަޝްރޫއު ކުރިއަށްދާނީ ރާއްޖޭގެ ގުދުރަތީ ވެއްޓާ ގުޅޭގޮތަށް އިގްތިސޯދު ޑައިވާސިފައި ކުރުމުގެ އަމާޒުގައި ކަމަށެވެ.

މީގެއިތުރުން، ބިންތައް ދިގު މުއްދަތަށް ކުއްޔަށް ދިނުމަކީ ރާއްޖޭގައި މުޅިން އަލަށް ކުރާކަމެއް ނޫންކަން ފާހަގަކުރައްވައި ސައީދު ވިދާޅުވީ، 2013 އިން 2018 އަށް އޮތް ވެރިކަމުގައި އެއް ބިލިއަން ޑޮލަރު އިންވެސްޓްކޮށްގެން ހިއްކާ ބިމުގެ 30 ޕަސެންޓް މިލްކުވާ ގޮތަށް (ފްރީހޯލްޑް އުސޫލުން) ހެދި ކަމަށެވެ.

އަދި އޭގެ ފަހުން އައި ސަރުކާރުން އެ ގާނޫނު ބަދަލުކޮށް، 99 އަހަރަށް ބިން ކުއްޔަށް ދެވޭ ގޮތް ހަމަޖެއްސި ކަމަށާއި، މިހާރު ވެސް ރާއްޖޭގެ 54 ރިސޯޓެއް އެ އުސޫލުން ދޫކޮށްފައިވާކަމަށް ސައީދު ވިދާޅުވިއެވެ.

އީގަލް ހިލްސް ކުންފުންޏާ ހަވާލުކޮށްގެން ރަސްމާލޭގެ 500 ހެކްޓަރުގެ ބިމުގައި ހިންގާ 20 ބިލިއަން ޑޮލަރުގެ "މޯލްޑިވްސް ވޯޓާފްރޮންޓް އެންޑް މެރީނާ" މަޝްރޫއުގެ ކޮމާޝަލް އެއްބަސްވުމުގައި ސޮއިކުރީ މިދިޔަ މަހުގެ ފަހުކޮޅުގައެވެ.

މި މަޝްރޫއާ ގުޅުވައިގެން އިދިކޮޅު ފަރާތްތަކުން ފާޅުކުރަމުންދާ ކަންބޮޑުވުންތަކަށް ރައްދު ދެއްވަމުން މިނިސްޓަރު ސައީދު ވިދާޅުވީ، އެއީ ރައްޔިތުންގެ މެދުގައި ބިރުވެރިކަން އުފެއްދުމަށް ސިޔާސީ ގޮތުން ދައްކާ ވާހަކަތަކެއް ކަމަށެވެ. އަދި މި މަޝްރޫއު ކާމިޔާބުވުމަކީ އިދިކޮޅު ސިޔާސީ ފަރާތްތަކުގެ ކުރިމަގަށް އެޅޭނެ ބޮޑު ހިޔަންޏެއްކަމަށް މިނިސްޓަރު ވިދާޅުވިއެވެ.