ގދ. ތިނަދޫއަކީ ސިޓީއެއްގެ ގޮތުގައި ކަނޑައެޅީ ގާނޫނާ ހިލާފަށް ކަމަށް ތުހުމަތު ކުރެވޭ މައްސަލައިގައި ތިނަދޫގެ މޭޔަރު ސައުދު އަލީގެ މައްޗަށް ކޮށްފައިވާ ދައުވާތަކުގެ އަޑުއެހުންތައް މާދަމާ ފެށުމަށް ކްރިމިނަލް ކޯޓުގައި ތާވަލުކޮށްފިއެވެ.

ޕްރޮސެކިއުޓާ ޖެނެރަލް (ޕީޖީ) އޮފީހުން ސައުދުގެ މައްޗަށް ދެ ދައުވާއެއް ކުރުމަށް ނިންމައި، ކްރިމިނަލް ކޯޓަށް ހުށަހަޅާފައިވަނީ މިދިޔަ އޮގަސްޓް މަހުގެ 31 ގައެވެ. ސައުދުގެ މައްޗަށް ކޮށްފައިވަނީ އެނގިހުރެ ސައްހަ ނޫން ލިޔުމެއް ދިނުމާއި ރަސްމީ އިދާރާއަކަށް ދޮގު މައުލޫމާތު ދިނުމުގެ ކުށުގެ ދައުވާއެވެ.

ސައުދުގެ މައްޗަށް ކޮށްފައިވާ އެނގިހުރެ ސައްހަ ނޫން ލިޔުމެއް ދިނުމާއި ރަސްމީ އިދާރާއަކަށް ދޮގު މައުލޫމާތު ދިނުމުގެ ކުށުގެ ދައުވާގެ އަޑުއެހުންތައް ކްރިމިނަލް ކޯޓުގައި ތާވަލުކޮށްފައިވަނީ މާދަމާ ހެނދުނު 9:00 ގައި ފަށާގޮތަށެވެ.

އެނގިހުރެ ސައްހަ ނޫން ލިޔުމެއް ދިނުން:

މި ދައުވާ ސައުދު އަލީއަށް ކުރަނީ އެ ސިޓީގެ އާބާދީ 10,000 ފުރިހަމަވާ ރަށެއް ގޮތުގައި ދެއްކުމުގެ ގޮތުން، ސައުދު ސޮއިކުރައްވައި ފޮނުއްވި ހުވަދު އަތޮޅު ދެކުނުބުރީ ތިނަދޫ ކައުންސިލްގެ އިދާރާގެ ސިޓީއާ އެކު ލޯކަލް ގަވާމަންޓު އޮތޯރިޓީއާ ހިއްސާ ކުރި އާބާދީ ލިސްޓުގައި މަރުވެފައިވާ މީހުންގެ މައުލޫމާތާއި ސައްހަކަން ކަށަވަރު ނުކުރެވޭ މައުލޫމާތު ހިމަނާފައިވާތީއެވެ.

އަދި އެ ލިސްޓުގައި ހިމެނޭ އެންމެންގެ އައިޑީ ކާޑު ނަންބަރު ހިމެނޭ ސައްހަ ލިސްޓެއް ހިއްސާ ކުރުމަށް ލޯކަލް ގަވާމަންޓް އޮތޯރިޓީން އެދުމުން، ސައުދު ސޮއިކުރައްވައި ފޮނުއްވި ހުވަދުއަތޮޅު ދެކުނުބުރީ ތިނަދޫ ކައުންސިލްގެ ސިޓީއާއެކު ލޯކަލް ގަވާމަންޓު އޮތޯރިޓީއާ ހިއްސާކުރި އާބާދީ ލިސްޓުގައި އެހެން ރަށްރަށުގައި ރަޖިސްޓްރީވެފައިވާ މީހުންގެ މައުލޫމާތާއި އެއް ނަންތަކެއް ތަކުރާރުކޮށް ހިމަނައި، ގދ. ތިނަދޫގެ އާބާދީއަކީ 10,150 މީހުން ކަމަށް ބުނެ، ސައްހަ ނޫން ލިސްޓެއް ލޯކަލް ގަވާމެންޓް އޮތޯރިޓީއާ ހިއްސާކޮށްފައިވާތީއެވެ.

މި މައްސަލަ ސާބިތުވެއްޖެނަމަ އޭނާއަށް 1 އަހަރާއި 7 މަހާއި 6 ދުވަހުގެ ޖަލު ހުކުމެއް އަންނާނެއެވެ.

ރަސްމީ އިދާރާއަކަށް ދޮގު މައުލޫމާތު ދިނުން:

މި ދައުވާ އޭނާގެ މައްޗަށް ކޮށްފައިވަނީ މި މައްސަލައިގެ ތަހުގީގުގައި، ގދ. ތިނަދުއަށް ސިޓީއެއްގެ ދަރަޖަ ހޯދުމަށް އެ ކައުންސިލުން ދައުލަތުގެ އިދާރާތަކަށް ހުށަހެޅި އާބާދީ ލިސްޓުތައް ހިއްސާ ކުރުމަށް ފުލުހުން އެ ކައުންސިލްގައި އެދުމުން، އެ ލިސްޓުތައް ފޯރުކޮށްނުދީ، ސައުދު ސޮއިކުރައްވައި ފޮނުއްވި ހުވަދުއަތޮޅު ދެކުނުބުރީ ތިނަދޫ ކައުންސިލުގެ ފެކްސް މެސެޖުން، ގދ. ތިނަދޫ ކައުންސިލުން ސިޓީއެއްގެ ދަރަޖަ ހޯދުމަށް ދައުލަތުގެ އިދާރާތަކަށް ލިސްޓެއް ފޮނުވިކަން ރެކޯޑު ކުރެވިފައިނުވާ ކަމަށް ބުނެ ފުލުހަށް ދޮގު މައުލޫމާތު ދީފައިވާތީއެވެ.

މި މައްސަލަ ސާބިތުވެއްޖެނަމަ އޭނާއަށް 4 މަހާއި 24 ދުވަހުގެ ޖަލު ހުކުމެއް އަންނާނެއެވެ.

ތިނަދޫއަކީ ސިޓީއެއްގެ ގޮތުގައި ކަނޑައެޅީ ގާނޫނާ ހިލާފަށް ކަމަށް ވިދާޅުވެ، ރައްޔިތުންގެ މަޖިލީހުގެ ތިނަދޫ އުތުރު ދާއިރާގެ މެންބަރު ސައުދުﷲ ހިލްމީ ވަނީ އެ މައްސަލަ މަޖިލީހަށާއި ލޯކަލް ގަވާމެންޓް އޮޓޯރިޓީއަށްވެސް ހުށަހަޅުއްވައިފައެވެ. މެންބަރު ސައުދުﷲ ތުހުމަތު ކުރައްވާފައިވާ ގޮތުގައި ތިނަދޫގެ އާބާދީގައި ގާނޫނުގައިވާ އަދަދަށް މީހުން ހަމަވާ ކަމަށް ބުނެފައިވަނީ އޮޅުވާލައިގެންނެވެ.

ތިނަދޫ ސިޓީއެއްގެ ގޮތުގައި ހަމަޖެއްސެވީ ކުރީގެ ރައީސް އިބްރާހީމް މުހައްމަދު ސޯލިހުގެ ވެރިކަމުގައި 2023 ވަނަ އަހަރުގެ އޮގަސްޓް މަހުގެ 20 ވަނަ ދުވަހުއެވެ.

މި ދައުވާތަކަކީ ސިޔާސީ ދައުވާތަކެއް ކަމަށް ސައުދު ވިދާޅުވެފައިވާ އިރު، އަމިއްލަ ކުންފުންޏަކަށް ގދ. ތިނަދޫ ސިޓީން ބިންތަކެއް ދޫކުރި މައްސަލައިގައި ވެސް ސައުދުގެ މައްޗަށް ދައުވާކުރަން ޕީޖީ އޮފީހަށް ފޮނުވަން އެންޓި ކޮރަޕްޝަން ކޮމިޝަން (އޭސީސީ) އިން ވަނީ މިދިޔަ މަހު ނިންމައިފައެވެ. އެ މައްސަލައިގައި ސައުދުގެ އިތުރުން ތިން ކައުންސިލަރެއްގެ މައްޗަށް ވެސް ދައުވާކުރަން ފޮނުވުމަށް ވަނީ ނިންމައިފައެވެ.