ބުރްކީނާ ފާސޯއަށް ކުރިމަތިވި އުނދަގޫތަކާއެކުވެސް އާޖެންޓީނާއަށް ގޮސް މެޗު ކުޅެފައިވުމަކީ ފުޓުބޯޅައަށް އޮތް ލޯބި ދައްކުވައިދިން ކަމެއް ކަމަށް އާޖެންޓީނާގެ ކޯޗު ލިއޮނެލް ސްކަލޯނީ ބުނެފިއެވެ.

އާޖެންޓީނާގެ ބްވެނޯސް އައިރޭސްގައި ރޭ ކުޅުނު މެޗުގައި ބުރްކީނާ ފާސޯ ކައިރިން 2022 ވަނަ އަހަރު ދުނިޔޭގެ ޗެމްޕިއަން އާޖެންޓީނާ މޮޅުވީ 7-0 ގެ ނަތީޖާއަކުންނެވެ. އެމެޗަށް ބުރްކީނާ ފާސޯއަށް ދެވުނީ ކިރިޔާއެވެ. އެއީ ޓީމު ތެރޭގައި ދިމާވި މައްސަލަތަކެއްގެ ސަބަބުންނެވެ. ބުރްކީނާ ފާސޯއަށް އާޖެންޓީނާއަށް ދެވުނީ އެންމެ ފަސް ގަޑިއިރު ކުރިންނެވެ. އެއީ ބައެއް ސީނިއާ ކުޅުންތެރިންވެސް ނުލައެވެ.

ބުރްކީނާ ފާސޯއިން މޮރޮކޯގެ ކަސަބްލަންކާއިން މިދިޔަ މަހު 30 ވަނަ ދުވަހު އާޖެންޓީނާއަށް ދާން މަސައްކަތް ކުރި ނަމަވެސް، އެ ޗާޓަރު ފްލައިޓް ވަނީ ކުރިއާލައި އެންގުމެއް ނެތި ކެންސަލް ވެފައެވެ. އެ މައްސަލައިގެ އިތުރުން މެޗުތަކަށް ދޭން ޖެހޭ ބޯނަސް ފައިސާއެއްގެ މައްސަލައިގައި ބައެއް ކުޅުންތެރިން އާޖެންޓީނާއަށް ދާން ދެކޮޅު ހެދި ކަމަށް ނޫސްތައް ބުނެފައިވެއެވެ. އަދި ކޮމާޝަލް ފްލައިޓެއްގައި ފަހުން ބުރްކީނާ ފާސޯއިން އާޖެންޓީނާއަށް ޓީމު ގެންދަން އުޅުމުން އެކަމުގައިވެސް ބައެއް ކުޅުންތެރިން ހިތްހަމަ ނުޖެހުނު ކަމަށް ނޫސްތައް ބުނެއެވެ.

އެ ކަންކަމުގައި ބައެއް ސީނިއާ ކުޅުންތެރިން ގައުމީ ޓީމު ބޮއިކޮޓް ކުރި ނަމަވެސް، ބުރްކީނާ ފާސޯއިން ވަނީ މެޗު ކުޅެން ބޭނުންވެ، 23 އަހަރުން ދަށުގެ ކުޅުންތެރިން ކުއްލިއަކަށް ގައުމީ ޓީމަށް ނަގައިގެން މެޗަށް ގޮސްފައެވެ.

އާޖެންޓީނާގެ ލައުޓާރޯ މާޓިނޭޒް ފުރަތަމަ ގޯލް ޖެހި އިރު، އޭނާ އަތުން އޭގެ ކުރިން ޕެނަލްޓީއެއް ނާކާމިޔާބުވިއެވެ. މޯމޯނީ ޑިއާލޯ އަތުން ބައިކޮޅަށްވެސް ގޯލެއްވެސް ވަދެފައިވާ އިރު، ޖިއާންލޫކާ ޕްރެސްޓިއާނީއާއި ނިކޯ ޕާޒްގެ އިތުރުން ހޫލިއަން އަލްވަރޭޒް ވަނީ މެޗުގައި ގޯލް ޖަހައިފައެވެ. ދެވަނަ ހާފުގައި އަނެއް ދެ ގޯލް ޖެހީ ފްރާންކޯ މަސްޓަންޓުއޯނޯއާއި ގިލިއާނޯ ސިމިއޯނީއެވެ.

މެޗަށްފަހު އާޖެންޓީނާ ކޯޗު ސްކަލޯނީ ބުނީ ބުރްކީނާ ފާސޯ އޮތް އުނދަގޫ ހާލަތުގައިވެސް މެޗަށް ނުކުމެ ކުޅެން ނިންމުމަމީ އެގައުމަށް ލިބުނު ފުރިހަމަ ފުރުސަތެއްގެ ބޭނުން ހިފުން ކަމަށާއި، ފެނިގެން ދިޔައީ ގައުމު ތަމްސީލުކުރުމުގައި ނަމޫނާ ދެއްކިތަން ކަމަށެވެ. އަދި އެކަމުގައި ބުރްކީނާ ފާސޯއަށް އިހުތިރާމުކުރާ ކަމަށްވެސް ސްކަލޯނީ ބުނެފައިވެއެވެ.

ބުރްކީނާ ފާސޯގެ މަސައްކަތަށް ފީފާއިންވެސް ވަނީ ތައުރީފުވެސް ކޮށްފައެވެ.