ނިމިދިޔަ ފުޓުބޯޅަ އަދި ފުޓްސަލް ސީޒަނަށް ބަލައިގެން ދޭ ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ އެވޯޑު ހަފުލާ، މި ހަފުތާ ބުރާސްފަތި ދުވަހުގެ ރޭ ބާއްވަން ނިންމައިފިއެވެ.

އެފްއޭއެމްއިން ބުނެފައި ވަނީ މިމަހުގެ އަށްވަނަ ދުވަހުގެ ރޭ ބާއްވާ އެވޯޑު ހަފުލާގައި ރާއްޖޭގެ ފުޓުބޯޅައާއި ފުޓްސަލްގެ ދާއިރާއިން އެކިއެކި ގޮތްގޮތުން ފާހަގަކުރެވުނު ކުޅުންތެރިންނާއި ކޯޗުން އަދި ޓީމުތަކުގެ ކާމިޔާބީ ފާހަގަކޮށް، އެ ފަރާތްތަކުގެ އަގު ވަޒަންކުރާނެ ކަމަށެވެ.

އެފްއޭއެމްއިން ބުނީ އެވޯޑު ހަފުލާގައި ރާއްޖޭގެ އެންމެ މޮޅު ފިރިހެން އަދި އަންހެން ފުޓްސަލް އަދި ފުޓުބޯޅަ ކުޅުންތެރިޔާގެ އިތުރުން އެންމެ މޮޅު ބިދޭސީ ކުޅުންތެރިޔާ، އެންމެ އުންމީދީ ކުޅުންތެރިޔާ، އެންމެ މޮޅު ގޯލްކީޕަރު، މިދިޔަ ސީޒަނުގައި އެންމެ ގިނަ ގޯލް ޖެހި ކުޅުންތެރިޔާއާއި އެންމެ މޮޅު ކޯޗާއި ރެފްރީވެސް ހޮވާނެ ކަމަށެވެ. އަދި އެންމެ މޮޅު ކްލަބާއި އެންމެ މޮޅު ރީޖަނަލް ކްލަބު ވަކިން ހޮވަން ނިންމާފައިވާ އިރު، ސަޕޯޓަރުންގެ މެދުގައި އެންމެ މަގުބޫލު ކުޅުންތެރިޔާވެސް ހޮވަން ނިންމާފައިވެއެވެ.

ކުރިން އެންމެ މޮޅު ގޯލް ހޮވަން އިއުލާނުކުރި ނަމަވެސް، އެފްއޭއެމްއިން ފަހުން މީޑިއާއަށް ދިން މައުލޫމާތުގައި އެ އެވޯޑު ހިމަނާފައެއް ނުވެއެވެ.

އެފްއޭއެމްއިން އިތުރަށް ބުނީ އެވޯޑުގެ ބޭނުމަކީ ފުޓުބޯޅައާއި ފުޓްސަލްގެ ފެންވަރު މަތިކޮށް، ކުޅުންތެރިންގެ މެދުގައި ވާދަވެރިކަމާއި ހިތްވަރު އާކުރުން ކަމަށެވެ. އަދި ކުޅިވަރުގައި ހަރަކާތްތެރިވަ ފަރާތްތަކުގެ މަސައްކަތުގެ އަގުވަޒަންކުރުމަކީ ކުރިއެރުމަށް މުހިއްމު ކަމެއް ކަމަށްވެސް އެފްއޭއެމްއިން ފާހަގަކޮށްފައިވެއެވެ.

އެފްއޭއެމްއިން ސީޒަނުގެ ކުރިން އެވޯޑު އިއުލާނު ކޮށްފައިވާ އިރު، އެވޯޑްސް ކޮމިޓީގެ ޗެއާމަނަކަށް ހަމަޖައްސާފައި ވަނީ ކުރީގެ މަޝްހޫރު ގޯލްކީޕަރު އަދި ކާމިޔާބު ކޯޗު، މައުރޫފް އަހުމަދު (މާއްޓޭ)އެވެ.

މީގެ ކުރިން އެފްއޭއެމްއިން ފުޓުބޯޅައަށް ހާއްސަކޮށް އެންމެފަހުން އެވޯޑު ދީފައި ވަނީ 2018 ވަނަ އަހަރުއެވެ. އޭރު އެވޯޑު ދެމުންދިޔައީ މޯލްޑިވްސް ފުޓްބޯލްއާ ގުޅިގެންނެވެ.

އޭގެފަހުން އެފްއޭއެމްއިން ފުޓުބޯޅައަށް ހާއްސަ އެވޯޑް ހަފުލާއެއް ބާއްވާފައި ނުވާ އިރު، އެންމެ މޮޅު ފުޓުބޯޅަ ކުޅުންތެރިޔާ ހޮވީ 2022 ވަނަ އަހަރު ބާއްވަން ފެށި މޯލްޑިވްސް ސްޕޯޓްސް އެވޯޑު ގައެވެ. ސްޕޯޓްސް މިނިސްޓްރީން ބާއްވާ އެ ހަފުލާގައި އެންމެފަހުން ހޮވި، އެންމެ މޮޅު ފުޓުބޯޅަ ކުޅުންތެރިޔަކީ ކްލަބު އީގަލްސްގެ އަހުމަދު ރިޒުވާން (ރިޒޭ) އެވެ.