ސުޕްރީމް ކޯޓުގެ ފަނޑިޔާރުން ވަކިކުރަން ރައްޔިތުންގެ މަޖިލީހުން ނިންމާ ނަމަ، އެކަމުގައި އެންމެ ފަހު ބަސް ބުނަންޖެހޭނީ ރައްޔިތުން ކަމަށް ނިންމައި، މަޖިލީހުން އެގޮތަށް ނިންމައި ހާލަތުގައި ރައްޔިތުންގެ ވޯޓަކަށް ދާންޖެހޭގޮތަށް، ރާއްޖޭގެ ވެރިކަމުގެ ނިޒާމު ބަދަލުކުރުމަށް އިދިކޮޅު އެމްޑީޕީން ގެންނަން ނިންމާފައިވާ ބޮޑު ބަދަލުގެ ސިޔާސަތު އެ ޕާޓީގެ ކޮންގްރެސް އިން ފާސްކޮށްފިއެވެ.

މި ސިޔާސަތު ފާސްކުރީ ކޮންގްރެސްގައި ތިއްބެވި 563 މެންބަރުންގެ ތެރެއިން 520 މެންބަރުން ވޯޓު ދެއްވައިގެންނެވެ.

މި ބަދަލާއެކު ރާއްޖޭގެ ވެރިކަމުގެ ނިޒާމަށް އެމްޑީޕީން ގެންނަން ބޭނުންވާ ބަދަލުތައް، ބޮޑު ބަދަލުގެ ކަރުދާހުގެ ގޮތުގައި، އެމްޑީޕީގެ ކޮންގްރެސްއަށް ހުށަހެޅުއްވީ އެ ޕާޓީގެ ރިޔާސީ ޕްރައިމަރީގައި ވާދަކުރައްވާ ކުރީގެ އިކޮނޮމިކް މިނިސްޓަރު އަދި އެ ޕާޓީގެ މަގުޗާޓު ކޮމިޓީގެ މުގައްރިރު ފައްޔާޒު އިސްމާއީލެވެ.

އެމްޑީޕީން ގެންނަން ބޭނުންވާ ބޮޑު ބަދަލަކީ، ވީހާވެސް ބޮޑަށް ރައްޔިތުންގެ ހިޔާލު ހޯދައިގެން ކަންކަން ނިންމޭ ގޮތަށް ގެންނަ ބަދަލެއްކަަން ފާހަގަކުރައްވައި، ފައްޔާޒު ހުށަހެޅުއްވި ބަދަލުތަކުގެ ތެެރެއިން ސުޕްރީމް ކޯޓުގެ ފަނޑިޔާރުން ވަކިކުރާގޮތަށް ގެންނަ ބަދަލަކީ، ފައްޔާޒު ވިދާޅުވި ގޮތުގައި، ސުޕްރީމް ކޯޓުގެ ފަނޑިޔާރުން އޯވަ ނައިޓަކުން ވަކިކުރަން މަޖިލީހަށް ލިބިފައިވާ ފުރުސަތު ނިންމާލުން ކަމަށެވެ.

"އެހެންވީމަ ސުޕްރީމް ކޯޓުގެ ފަނޑިޔާރަކު ވަކިކުރާ ކަމަށް ވަންޏާމު، މަޖިލީހުގެ ތިންބައިކޮށްފަ ދެބައިން ސުޕްރީމް ކޯޓުގެ ފަނޑިޔާރަކު ވަކިކުރަން ނިންމީމަ އޭގެ ފަހު ބަސް ބުނާ ބަޔަކަށް އަޅުގަނޑުމެން މި ބުނަނީ ވާން ޖެހޭނީ ރައްޔިތުންނޭ، މަޖިލީހުން އެ ނިންމާ ނިންމުން ރައްޔިތުން ބަލައިގަނެފިއްޔާ އެމީހަކު އެތަނުން ވަކިކުރެވޭނީ،"

ފައްޔާޒު ވިދާޅުވީ، އެ ބަދަލު ގެނައުމުން ސުޕްރީމް ކޯޓުގެ ފަނޑިޔާރުންނަށް މިނިވަންކަން ލިބިގެންދާނެ ކަމަށެވެ.

އެގޮތުން އެ އިރެއްގައި ހުންނަ ރައީސުލްޖުމްހޫރިއްޔާ ބޭނުންވެގެން އެމީހުން އެތަނުން ވަކި ނުކުރެވޭނެ ކަމާއި، މަޖިލީހަށް ބޭނުންވެގެން ވަކި ނުކުރެވޭނެކަން ފަނޑިޔާރުންނަށް އެނގިގެންދާނެ ކަމަށް ފައްޔާޒު ވިދާޅުވިއެވެ.

"ތިމަންނަމެން ވަކި ކުރެވޭނީ ރައްޔިތުން ބޭނުންވެގެންކަން އޭރުން އެނގޭނެ، އެހެކަަމަށް ވަންޏާ އަދުލު އިންސާފު ގާއިމުކުރުމަށް ވަރަށް ބޮޑު ބާރަކަށްވާނެ ކަމަށް ގަބޫލުކުރެވޭ،" އޭނާ ވިދާޅުވިއެވެ.