އައްޑޫ އާއި ފުވައްމުލަކުގެ ފެނާއި ނަރުދަމާއާ އެމްޑަބްލިއުއެސްސީން ރަސްމީކޮށް ހަވާލުވެއްޖެ

އައްޑޫ ސިޓީއާއި ފުވައްމުލަކު ސިޓީގެ ފެނާއި ނަރުދަމާގެ ހިދުމަތްތަކާ މާލެ ވޯޓާ އެންޑް ސުވަރޭޖް ކޮމްޕެނީ (އެމްޑަބްލިއުއެސްސީ) އިން ރަސްމީކޮށް ހަވާލުވެއްޖެއެވެ.

އެމްޑަބްލިއުއެސްސީގެ މެނޭޖިން ޑިރެކްޓަރު ހުސައިން ފަހުމީ އެކްސްގައި މިއަދު ކުރެއްވި ޕޯސްޓެއްގައި ވިދާޅުވި ގޮތުގައި، މިދިޔަ ބުރާސްފަތި ދުވަހު އެ ކުންފުނިން ވަނީ އެ ދެ ސިޓީއާ ހަވާލުވެ، އޮޕަރޭޝަނަލް ހިދުމަތްތައް ފަށައިފައެވެ.

މި ބަދަލާ ގުޅިގެން އެމްޑަބްލިއުއެސްސީއާއި ފެނަކަ ކޯޕަރޭޝަނާ ދެމެދު ވަނީ ފްރޭމްވޯކް އެއްބަސްވުމެއް އެކުލަވާލައި ސޮއިކޮށްފައެވެ. ފަހުމީ ވިދާޅުވި ގޮތުގައި، މި އެއްބަސްވުމުގެ ދަށުން އައްޑޫ ސިޓީގެ ހުޅުދޫ އަދި މީދޫ ހިމެނޭހެން، އެ ދެ ސިޓީގެ ފެނާއި ނަރުދަމާއާ ގުޅުންހުރި އެންމެހައި އިންފްރާސްޓްރަކްޗަރާއި ވަސީލަތްތައް އެމްޑަބްލިއުއެސްސީއަށް ބަދަލުކުރުމުގެ މަސައްކަތް މިހާރު ވަނީ އެއްކޮށް ފުރިހަމަކޮށްފައެވެ.

މި ހިދުމަތްތައް އެމްޑަބްލިއުއެސްސީއާ ހަވާލުކޮށްފައިވަނީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ކޯޕަރޭޓް ދާއިރާ އިސްލާހުކުރުމަށް ކަނޑައަޅުއްވާފައިވާ ސިޔާސަތުގެ ދަށުންނެވެ.

ފަހުމީ ފާހަގަކުރެއްވި ގޮތުގައި، މި ނިޒާމުތައް އިތުރަށް ހަރުދަނާކޮށް، ރައްޔިތުންނަށް މެދުކެނޑުމެއްނެތި، އިތުބާރުހުރި އަދި ފެންވަރު ރަނގަޅު ހިދުމަތެއް ކަށަވަރުކޮށްދިނުމަށްޓަކައި ފަންނީ އެސެސްމަންޓްތަކެއް ވަނީ ހަދައިފައެވެ. އަދި އެ އެސެސްމަންޓްތަކަށް ބިނާކޮށް، ދެ ސިޓީގެ ހިދުމަތުގެ ފެންވަރު މަތިކުރުމަށާއި އޮޕަރޭޝަނަލް ހިންގުން ހަރުދަނާކުރުމުގެ އަމަލީ މަސައްކަތްތައް މިހާރު ދަނީ ކުރަމުންނެވެ.

މި ބަދަލުގެ ދަށުން، ކަމާގުޅޭ އޮޕަރޭޝަންތަކާއި، އިންފްރާސްޓްރަކްޗަރާއި ވަސީލަތްތައް ފެނަކައިން ވަނީ އެމްޑަބްލިއުއެސްސީއާ ހަވާލުކޮށްފައެވެ. މީގެ އިތުރުން، ހިނގަމުންދާ މަޝްރޫއުތަކާއި، ކަސްޓަމަރުންގެ ރެކޯޑުތަކާއި، އެއްބަސްވުންތަކާއި، އިންވެންޓްރީ އަދި އެހެނިހެން ޒިންމާތައް ވެސް، ކަނޑައެޅިފައިވާ އުސޫލުތަކުގެ ދަށުން ޔަގީންކުރުމަށްފަހު އެ ކުންފުންޏާ ހަވާލުކުރެވޭނެއެވެ.