ބްރެޒިލާ ދެކޮޅަށް ކުޅެން އިންޑިއާއަށް ލިބޭ ފުރުސަތަކީ އަދިވެސް ގަބޫލުވެސް ކުރަން ދަތި ފުރުސަތެއް ކަމަށް އިންޑިއާގެ ކުރީގެ ކުޅުންތެރިޔާ އަދި ކޯޗު ހާލިދު ޖާމިލް ބުނެފިއެވެ.

މި ސަރަހައްދުގެ އެންމެ ވަރުގަދަ ގައުމުގެ ގޮތުގައި މިވަގުތު އޮތް އިންޑިއާއިން މިފަހަރު އިންޓަނޭޝަނަލް ބްރޭކަށް ރާވާފައި ވަނީ ވަރުގަދަ ކުރިމަތިލުންތަކެކެވެ. އެގޮތުން ޕެނަމާއާއި ބްރެޒިލްގެ އިތުރުން އުރުގުއާއީއާ އެޓީމުން ކުޅެން ތާވަލު ކޮށްފައިވާ އިރު، އެ ތިން ގައުމަކީވެސް މިދިޔަ ވޯލްޑް ކަޕުގައި ވާދަކުރި ގައުމުތަކެވެ.

އިންޑިއާއިން ޕެނަމާއާ ދެކޮޅަށް ކުޅުނު މެޗުގައި 1-1 އިން އެއްވަރުވެފައިވާ އިރު، ފަސް ފަހަރު ދުނިޔޭގެ ޗެމްޕިއަން ބްރެޒިލާ ދެކޮޅަށް ނުކުންނާނީ މިރޭއެވެ. އަދި އުރުގުއާއީއާ ދެކޮޅަށް ނުކުންނާނީ މިމަހުގެ ހަވަނަ ދުވަހުއެވެ.

ބްރެޒިލަކީ މިވަގުތުވެސް ދުނިޔޭ ރޭންކިންގެ ގަދަ 10 ގައި ހިމެނޭ ޓީމެކެވެ. އެހެންކަމުން މިއީ އިންޑިއާއިން ފީފާ ރޭންކިންގެ ގަދަ 10 ގައި ހިމެނޭ ގައުމަކާ ދެކޮޅަށް ކުޅޭ ފުރަތަމަ ފަހަރެވެ.

"ކުޅުނުއިރުވެސް އަހަރެމެން އަބަދުވެސް ބޭނުން ވަނީ ރަނގަޅު، ވަރުގަދަ ޓީމުތަކާ ދެކޮޅަށް ކުޅެން. އެކަމަކު އޭރުން ފެށިގެން މިއަދާ ހަމައަށް އައިރުވެސް، ކުޅުންތެރިއެއްގެ ގޮތުގައި އަދި ކޯޗެއްގެ ގޮތުގައިވެސް ބްރެޒިލާ ދެކޮޅަށް ނުކުންނަން ފުރުސަތު ލިބޭނެ ކަމަށް އުންމީދެއް ނުކުރަން. އެކަން ވާން އުޅޭކަން އަދިވެސް ގަބޫލެއް ނުކުރެވޭ،" ޖާމިލް ބުންޏެވެ.

ޖާމިލް ބުނީ ބްރެޒިލާ ދެކޮޅަށް ނުކުންނަ އިރު ޖެހިލުންވާނެ ކަމަށާއި، ޕްރެޝަރުވެސް ވާނެ ކަމަށެވެ. އަދި އެކަންކަން ނުވާ ކަމަށް ބުނުމަކީ ދޮގެއް ކަމަށްވެސް އޭނާ ބުންޏެވެ.

ޖާމިލް ބުނީ ބްރެޒިލާ ދެކޮޅަށް ކުޅޭއިރު، އެއްވެސް ގޯހެއް ހަދަން ޖާގަ ނުލިބޭނެ ކަމަށާއި، އެންމެ ބޮޑަށް ސަމާލުކަން ދޭން ޖެހޭނީ ކުދިކުދިން "ސިމްޕަލް" ކަންކަން ރަނގަޅަށް ކުރުމަށް ކަމަށެވެ. އަދި މާބޮޑަށް އިތުރު ކަންކަން ކުރަން އުޅެފިނަމަ، ބްރެޒިލް އޭގެ ފައިދާ ނަގާނެ ކަމަށްވެސް ޖާމިލް ބުންޏެވެ.

އިންޑިއާއާއި ބްރެޒިލް ރާއްޖެ ގަޑިން މިރޭ 7:00 ޖަހާއިރު ކުޅޭ މެޗުގައި ނުކުންނާނީ ކަލްކަތާގެ ސޯލްޓް ލޭކް ސްޓޭޑިއަމްގައެވެ.