އިނގިރޭސި ޕްރިމިއާ ލީގުގެ މެންޗެސްޓާ ސިޓީ، ފައިނޭންޝަލް އުސޫލުތަކުން ބޭރުގައި ހިންގާފައިވާ ކަމަށް ބުނާ 115 މައްސަލަ އެ ކްލަބުގެ މައްޗަށް ސާބިތުވެފައިވާ ކަމަށް މައްސަލަ ބެލި މިނިވަން ކޮމިޝަނުން ނިންމާފައިވާ އިރު، ނިންމުން އިސްތިއުނާފު ކޮށްފައިވާކަން އެ ކްލަބުން ޔަގީން ކޮށްދީފިއެވެ.

ސިޓީން މިދިޔަ ސީޒަން ހުސް އަތާ ނިންމާލި ނަމަވެސް، އޭގެ ކުރިން ހަތް ސީޒަނުގެ ތެރެއިން ހަ ސީޒަނުގެ ލީގު ނެގިއެވެ. އަދި 2022-23 ވަނަ އަހަރު ސިޓީން ޗެމްޕިއަންސް ލީގުވެސް ހޯދާފައިވާ އިރު، އެ ކްލަބުން ފައިނޭންޝަލް އުސޫލުތަކާ ހިލާފުވި މައްސަލަތައް އޮތުމުން، އެކަމަށް ފިޔަވަޅު ނޭޅި ކާމިޔާބީތައް ހޯދާތީ ފާޑުކިޔުން އަމާޒުވެފައިވެއެވެ.

ސިޓީގެ 115 މައްސަލައެއް މިނިވަން ކޮމިޝަނުން ބަލަން ފެށީ 2023 ވަނަ އަހަރު ފެބްރުއަރީ މަހުގައެވެ. އެ މައްސަލަތަކަކީ 2009 ވަނަ އަހަރުން ފެށިގެން 2018 ވަނަ އަހަރާ ދެމެދު ސިޓީން ހިންގާފައިވާ މުއާމަލާތްތަކުގެ މައްސަލަތަކެކެވެ.

މިނިވަން ކޮމިޝަނާ ހަވާލާދީ ޕްރިމިއާ ލީގުން ނެރުނު ސްޓޭޓްމެންޓްގައި ބުނެފައި ވަނީ މައްސަލަތައް ސާބިތުވުމުގެ އިތުރުން އެ މައްސަލަ ތަހުގީގުކުރުމަށް ސިޓީން އެއްބާރުލުން ނުދޭކަންވެސް ސާބިތުވެފައިވާ ކަމަށެވެ. ކޮމިޝަނުން ރަސްމީކޮށް ބުނެފައިވަނީ ސިޓީން އެތައް ވަގު އެއްބަސްވުންތަކެއް ހަދައި، ސްޕޮންސަރުންނާއި ޕާޓްނަރުންގެ ފަރާތުން ލިބޭ އާމްދަނީއާއި ކްލަބުން ކުރި ހަރަދުތަކުގެ ތަފްސީލުތައްވެސް ބޮޑުކޮށް އޮޅުވާލާފައިވާ ކަމަށެވެ.

ކޮމިޝަނުން ބުނެފައިވަނީ ސިޓީން ލިބުނު އާމްދަނީއާއި ހަރަދުގެ ތަފްސީލު 900 މިލިއަން ޕައުންޑްގެ އަދަދަކަށް އޮޅުވާލާފައިވާ ކަމަށެވެ.

އެ ނިންމުން އިސްތިއުނާފުކުރުމަށް އިއްޔެގެ ނިޔަލަށް ސިޓީއަށް ދީފައިވާ އިރު، އެ ކްލަބުން ބުނެފައި ވަނީ މިނިވަން ކޮމިޝަނުގެ ތަހުގީގުގައި ގިނަ އޮޅުންތަކެއް އެބަހުރި ކަމަށެވެ. އަދި ބައެއް ޕޮއިންޓްތަކުގައި ބަލާފައިވަނީ ގަވާއިދާ ހިލާފަށް ކަމަށާއި، ފެކްޓްތަކުގައިވެސް އޮޅުންތައް ހުރި ކަމަށްވެސް އެ ކްލަބުން ބުންޏެވެ.

ސިޓީގެ މައްސަލައިގައި މިއަދު އިނގިރޭސި އެފްއޭއިން ބުނެފައި ވަނީ އެ އިދާރާއިންވެސް އެ މައްސަލަތައް ސީރިއަސް މައްސަލަތަކެއްގެ ގޮތުގައި ނަގާ ކަމަށާއި، އެކަމުގައި ފިޔަވަޅުތައް އަޅާނެކަން ޔަގީންކުރަން މަސައްކަތް ކުރާނެ ކަމަށެވެ. އަދި މައްސަލައިގެ ގޮތުން އިތުރު ތަހުގީގުތައް ކުރަންވެސް ތައްޔާރު ކަމަށް އިނގިރޭސި އެފްއޭއިން ބުންޏެވެ. އެފްއޭއިން ބުނީ ސިޓީގެ އެ އަމަލުތަކަކީ މުޅި ގައުމުގެ ފުޓުބޯޅައަށް އަސަރުކުރާނެ ކަމެއް ކަމަށެވެ.