ދުބާއީން ފުރައިގެން އިސްރާއީލުގެ ތެލް އަވީވަށް ދަތުރުކުރި ފްލައިދުބާއީގެ ފްލައިޓެއްގެ ކޮކްޕިޓް ތެރޭގައި ކޯ-ޕައިލެޓް ދިން ހަމަލާއަކުން ސަލާމަތްވެ، ފަސިންޖަރުންގެ ފުރާނަ ސަލާމަތްކުރީ އެންމެން މަރުވާން ދޫކޮށްނުލެވޭނެކަމަށް ހިތަށްއެރުމުން ކަމަށް އެ ފްލައިޓުގެ ކެޕްޓަން ބުނެފިއެވެ.

މިދިޔަ ބުދަ ދުވަހު ހިނގި މި ހާދިސާގައި ޒަހަމްވި އިންޑިއާގެ މުމްބާއީއަށް ނިސްބަތްވާ ކެޕްޓަން ސްމިތު މަޗްޗަރ މިހެން ބުނީ، އަބޫދާބީގެ ހޮސްޕިޓަލެއްގައި ފަރުވާ ހޯދަމުންދަނިކޮށް އިންޑިއާގެ ބޮޑުވަޒީރު ނަރެންދުރަ މޯދީއާ ވީޑިއޯ ކޯލް މެދުވެރިކޮށް ވާހަކަދައްކަމުންނެވެ.

މި ކޯލްގައި މޯދީ ވަނީ ކެޕްޓަން ދެއްކި ހިތްވަރަށާއި، އެހެން މީހުންގެ ފުރާނަ ސަލާމަތްކުރުމަށް އަމިއްލަ ފުރާނަ ނުރައްކަލަށް ހުށަހެޅިކަމަށްޓަކައި ތައުރީފުކުރައްވައިފައެވެ.

ފްލައިދުބާއީގެ ބޯއިން 737 މެކްސް 8 މަރުކާގެ ފްލައިޓް އެފްޒެޑް1073 ގައި 174 ފަސިންޖަރުންނާއެކު 34،000 ފޫޓުމަތިން ދަތުރުކުރަމުން ދަނިކޮށް، އޮމާނަށް ނިސްބަތްވާ ކޯ-ޕައިލެޓް ވަނީ ކެޕްޓަނަށް ވަޅިން ހަމަލާދީ ބޯޓު ވައްޓާލަން މަސައްކަތްކޮށްފައެވެ.

ގާޑިއަން ނޫހުން ރިޕޯޓުކޮށްފައިވާ ގޮތުގައި، މި ހަމަލާއާއެކު ބޯޓު ވަނީ ދެ މިނެޓު ތެރޭގައި 17،000 ފޫޓު ތިރިއަށް ވެއްޓިފައެވެ. މި ވަގުތު ބޯޓު ތެރޭގައި ތިބި ކުޑަކުދިންނާއި ބޮޑެތި މީހުން ބިރުން ހަޅޭއްލަވަމުން ދިޔަ ކަމަށް މަންޒަރު ދުށް މީހުންނާ ހަވާލާދީ މީޑިއާތަކުން ރިޕޯޓުކޮށްފައިވެއެވެ. ނަމަވެސް، ގިނަ ޒަހަމްތަކަކާއެކުވެސް ކެޕްޓަން މަޗްޗަރ ވަނީ ކޮކްޕިޓުގެ ދޮރު ހުޅުވައިފައެވެ. އެއާއެކު ފަސިންޖަރުންނާއި އޮފް-ޑިއުޓީގައި ތިބި ކްރޫން ކޮކްޕިޓަށް ވަދެ، ހެޑްފޯނު ނަރު ބޭނުންކޮށްގެން ހަމަލާދިން ކޯ-ޕައިލެޓް ބަނދެ ކޮންޓްރޯލްކުރިއެވެ. އޭގެ ފަހުން އެހެން ޕައިލެޓަކު ބޯޓާ ހަވާލުވެ، ސައުދީ އަރަބިއްޔާގެ އަސްކަރީ މަރުކަޒަކާ ޖެހިގެން އޮންނަ ތަބޫކް އެއާޕޯޓަށް ވަނީ އިމަޖެންސީގައި ބޯޓު ޖައްސައިފައެވެ.

މި ހާދިސާއާ ގުޅޭގޮތުން ކެޕްޓަން މަޗްޗަރ ބުނި ގޮތުގައި، އޭނާ މަސައްކަތްކުރީ އަމިއްލަ ފުރާނަ ސަލާމަތްކުރުމަށެވެ. “އަހަރެން މަސައްކަތްކުރީ ފުރާނަ ސަލާމަތްކުރަން، އެކަމަކު އެންމެން މަރުވާން ދޫކޮށްނުލެވޭނެކަން ހިތަށްއެރި،” އޭނާ ބުންޏެވެ.

ބޯޓު ތެރޭގައި ހުރި ޑޮކްޓަރަކު ވަނީ ކެޕްޓަނަށް ފުރަތަމަ އެހީ ފޯރުކޮށްދީފައެވެ. މި ހާދިސާގައި އެއްވެސް ފަސިންޖަރަކަށް ސީރިއަސް އަނިޔާއެއް ލިބިފައިނުވާ ކަމަށް ކަމާބެހޭ ފަރާތްތަކުން ވަނީ ބުނެފައެވެ. ބޯޓު ސަލާމަތުން ޖެއްސުމާއެކު، ފަސިންޖަރުން ވަނީ ކެޕްޓަނަށާއި އެހީތެރިވި މީހުންނަށް ޝުކުރު އަދާކޮށްފައެވެ.

ފްލައިދުބާއީން ނެރުނު ބަޔާނެއްގައި ބުނެފައިވަނީ، ކޮކްޕިޓް ތެރޭގައި ހަމަނުޖެހުމެއް ހިނގި ކަމަށާއި، ބޯޓު ސަލާމަތްތެރިކަމާއެކު ޖެއްސީ ޑިއުޓީގައި ތިބި ކްރޫންގެ މަސައްކަތުން ކަމަށެވެ. މި ހާދިސާއާ ގުޅިގެން ސައުދީ އަރަބިއްޔާގެ ކަމާބެހޭ ފަރާތްތަކުން ކޯ-ޕައިލެޓް ހައްޔަރުކޮށް ތަހުގީގު ފަށާފައިވާއިރު، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވިދާޅުވި ގޮތުގައި ހަމަލާދިން މީހާއަކީ ހަރުކަށި ފިކުރުގެ މީހެކެވެ. އަދި އިސްރާއީލުގެ އޮފިޝަލުންނާ ހަވާލާދީ ސީބީއެސް ނިއުސްއިން ރިޕޯޓުކޮށްފައިވާ ގޮތުގައި މިއީ ޓެރަރިސްޓް ހަމަލާއެއް ކަމަށް ބެލެވެއެވެ. ނަމަވެސް، ހަމަލާދިން ސީދާ ސަބަބު ރަސްމީ އެއްވެސް ފަރާތަކުން އަދި ކަށަވަރުކޮށްދީފައެއް ނުވެއެވެ. މި މައްސަލަ މިހާރު ދަނީ އެމެރިކާއާއި، ޔޫއޭއީ އަދި އޮމާންގެ އިތުރުން އިސްރާއީލުގެ ކަމާބެހޭ ފަރާތްތައް ގުޅިގެން ތަހުގީގުކުރަމުންނެވެ.