ފްލައިދުބާއީގެ ފްލައިޓެއް ހައިޖެކްކޮށް ޓެރަރިސްޓް ހަމަލާއެއް ދޭން އުޅުނު ކަމުގެ ތުހުމަތުކުރެވޭ އޮމާންގެ ކޯ-ޕައިލެޓާ ގުޅުން އޮންނަ ކަމަށް ބެލެވޭ ދެ ދިވެއްސަކު ޔޫއޭއީ ފުލުހުންގެ ތަހުގީގަށް ހާޒިރުކޮށްފިއެވެ.

ސަރުކާރުގެ އިސް ތަރުޖަމާނު މުހައްމަދު ހުސައިން ޝަރީފް (މުންދު) "ވަން" އަށް މިރޭ ވަނީ ޔޫއޭއީގައި ދެ ދިވެހި ޕައިލެޓުން ސުވާލުކުރުމަށް ދެ ދިވެހިން ފުލުހަށް ހާޒިރުކޮށްފައިވާކަން ކަށަވަރުކޮށްދެއްވައިފައެވެ.

"އެކަމުގެ އިތުރު ތަފްސީލުތައް އަޅުގަނޑުމެން އޮޅުންފިލުވަމުން މިދަނީ" މުންދު ވިދާޅުވިއެވެ.

"ވަން" އަށް އެނގިފައިވާ ގޮތުގައި އެ ދެ ޕައިލަޓުންނަކީ، ތުހުމަތުތައް ކުރެވޭ ހައްމާމް އަލް ހަމާނީއާ އެއް އިމާރާތެއްގައި އުޅޭ ބައެކެވެ.

ދުބާއީން ފުރައިގެން އިސްރާއީލުގެ ޓެލް އަވީވަށް ގާތްގަނޑަކަށް 174 ދަތުރުކުރަމުންދިޔަ ފްލައިދުބާއީގެ ބޯއިން 737 މެކްސް 8 މަރުކާގެ ބޯޓުގެ ކޮކްޕިޓް ތެރޭގައި ކެޕްޓަނަށް ކޯ ޕައިލެޓް ވަޅިން ހަމަލާދީ ބޯޓު ވައްޓާލަން މަސައްކަތްކޮށްފައެވެ.

މި ހަމަނުޖެހުމުގެ ތެރޭގައި ބޯޓުގެ އުސްމިން ވަނީ ކުއްލިއަކަށް ވަރަށް ބޮޑަށް ދަށްވެފައެވެ. ފްލައިޓް ޓްރެކިން ޑޭޓާތަކުން ދައްކާ ގޮތުގައި، ގާތްގަނޑަކަށް 34،000 ފޫޓު މަތިން ދަތުރުކުރަމުންދިޔަ ބޯޓު، ދެ މިނެޓަށް ވުރެ ކުރު ވަގުތުކޮޅެއްގެ ތެރޭގައި 16،600 ފޫޓަށް ތިރިކޮށްފައިވެއެވެ.

ބައެއް ފަސިންޖަރުން ބުނާ ގޮތުގައި 30 ސިކުންތުގެ ތެރޭގައި 14،000 އަށް ވުރެ ގިނަ ފޫޓަށް ތިރިވިއެވެ. މި ވަގުތު ބޯޓުގެ ތެރޭގައި ބޮޑު ހާސްކަމެއް އުފެދި، މަތީގައި ހުންނަ ކޮމްޕާޓްމަންޓްތައް ހުޅުވި، ކަރަންޓު ދިޔަ ކަމަށް ފަސިންޖަރުންނާ ހަވާލާދީ ފޮކްސް ނިއުސްއިން ރިޕޯޓުކޮށްފައިވެއެވެ. ބޯޓުގެ ކޮކްޕިޓުން ވަނީ އާންމު ކުއްލި ހާލަތް އަންގައިދޭ "ސްކުއޯކް 7700" ގެ ސިގްނަލް ފޮނުވާފައެވެ. އަދި އޭގެ ކުޑަ ވަގުތުކޮޅެއް ފަހުން، ހައިޖެކްކުރުން ނުވަތަ ގަވާއިދާ ހިލާފަށް ބޯޓަށް ނުފޫޒު ފޯރުވުން އަންގައިދޭ "ސްކުއޯކް 7500" ގެ ސިގްނަލްވެސް ފޮނުވާފައިވާ ކަމަށް އޭވިއޭޝަން ޑޭޓާތަކުން ދައްކައެވެ.

ބޯޓު ވެއްޓުނަނުދީ ސަލާމަތްވީ ޒަހަމްވެފައިވާ ކެޕްޓަން ކޮކްޕިޓްގެ ދޮރު ހުޅުވުމުން ފަސިންޖަރުން ވަދެ ކޯ ޕައިލެޓް އަތުލައިގަނެ، ބޯޓުގެ ކޮންޓްރޯލް ނެގުމުންނެވެ.

އޭބީސީ ނިއުސް އަދި ސީއެންއެން ފަދަ ނޫސްތަކުން ރިޕޯޓުކޮށްފައިވާ ގޮތުގައި، އުމުރުން 29 އަހަރުގެ އަލް-ހައްމާމީގެ އަތުން 2024 ވަނަ އަހަރު ހަރުކަށި ފިކުރުގެ ލިޔެކިޔުންތަކެއް ފެނިފައިވެއެވެ. އަދި އޭނާގެ ސޯޝަލް މީޑިއާ އެކައުންޓުތަކުގައި ޓެރަރިޒަމަށް ހިތްވަރުދޭ ފޮޓޯތައް ހުރި ކަމަށް ވެސް ރިޕޯޓުތަކުގައިވެއެވެ. މިކަމާ ގުޅިގެން އޭނާ ކުރިން ވަޒީފާ އަދާކުރި އޮމާން އެއާގެ ޓްރެއިނީ ޕައިލެޓެއްގެ މަގާމުން ދުރުކޮށް، އެހެން ވަޒީފާއަކަށް ބަދަލުކުރި ކަމަށް މަސްދަރުތަކާ ހަވާލާދީ މީޑިއާތަކުން ބުނެފައިވެއެވެ. މީގެ އިތުރުން، އޭނާ ސީރިއާގައި އުޅުނު ދުވަސްވަރު ހަރުކަށި ފިކުރުގެ އަސަރުކޮށްފައިވާ ކަމަށް އަލް އަރަބިއްޔާއިން ރިޕޯޓުކޮށްފައިވެއެވެ.

ދުބާއީއިން ފުރައިގެން އިސްރާއީލުގެ ޓެލް އަވީވްއަށް 182 މީހުންނާއެކު ދަތުރުކުރި ފްލައިދުބާއީގެ ފްލައިޓުގެ ކެޕްޓަން ސްމިތު މަޗްޗަރަށް ހަމަލާދިން މައްސަލައިގައި ހައްޔަރުކޮށްފައިވާ ހަމާމް، މިހާރު ޔޫއޭއީގެ ކަމާބެހޭ ފަރާތްތަކުގެ ތަހުގީގަށް އެއްބާރުލުން ދެމުން އަންނަ ކަމަށް ރިޕޯޓުތައް ބުނެއެވެ.