ދައުލަތުން ބޮޑު ހަރަދެއް ކޮށްގެން ހިންގާ ރަސްމާލެ މަޝްރޫއުގެ ދަށުން ބޭރުގެ ކުންފުންޏަކަށް ބިން ދޭ ގޮތަށް ހަދާފައިވާ "ސިއްރު އެއްބަސްވުން"ތަކަށް ކުރިއަށް އޮތް އެމްޑީޕީގެ ސަރުކާރެއްގައި އެއްވެސް ޖާގައެއް ނުދޭނެކަމަށް ކުރީގެ ރައީސް އިބްރާހިމް މުހައްމަދު ސޯލިހު (އިބޫ) މިރޭ ވިދާޅުވެއްޖެއެވެ.

އެމްޑީޕީ ކޮންގްރެސް ފެށުމަށް މިރޭ ބޭއްވި ޖަލްސާގައި ވާހަކަދައްކަަވަމުން ސޯލިހު ވިދާޅުވީ އަބޫދާބީގެ އީގަލް ހިލްސް ކުންފުންޏާ އެކު ސަރުކާރުން ވެފައިވާ އެއްބަސްވުމާމެދު ކަންބޮޑުވާ ކަމަށެވެ. ރައްޔިތުންގެ ފައިސާއިން ގާތްގަނޑަކަށް 700 މިލިއަން ޑޮލަރު ހޭދަކޮށްގެން ފުށިދިއްގަރުފަޅު ހިއްކުމަށްފަހު، އޭގެ ތެރެއިން 500 ހެކްޓަރުގެ އަގުބޮޑު ބިން ހިލޭ ބޭރު ބަޔަކަށް ދޫކޮށްލުމަކީ ބަލައިގަނެވޭނެ ކަމެއް ނޫންކަމަށް ސޯލިހު ވިދާޅުވިއެވެ.

އެކަމާ ގުޅޭގޮތުން ސުވާލު އުފައްދަވަމުން ސޯލިހު ވިދާޅުވީ، މި މުއާމަލާތުން ސަރުކާރަށާއި ރައްޔިތުންނަށް ލިބެނީ ކޮން މަންފާއެއްކަން ސާފުވާންޖެހޭ ކަމަށެވެ. އެމްޑީޕީން ބޭރުގެ އިންވެސްޓްމެންޓްތަކަށާއި އުސޫލުގެ ތެރެއިން ރެސިޑެންސް ވިސާ ދިނުމަށް ދެކޮޅު ނުހަދާ ކަމަށާއި، ނަމަވެސް މި މައްސަލައިގައި ކަންބޮޑުވަނީ މަޝްރޫއުގެ ކަންކަން ރައްޔިތުންނަށް ސިއްރުކޮށްފައި އޮތުމުން ކަމަށް ވިދާޅުވިއެވެ. އެއްބަސްވުމުގެ ތަފުސީލު ހާމަނުކުރާ ނަމަ، އެ އެއްބަސްވުން އުވާލުމަށް އެމްޑީޕީ ކޮންގްރެސް އިން ސަރުކާރަށާއި އީގަލް ހިލްސް ކުންފުންޏަށް ގޮވާލަން ޖެހޭނެކަމަށް ސޯލިހު ވިދާޅުވިއެވެ.

"ސިއްރުން ހިނގާ އެއްވެސް ކަމަކަށް އަޅުގަނޑުމެން އާނއެކޭ ބުނެގެން ނުވާނެ. އަދި އެފަދަ މަސައްކަތެއް އަޅުގަނޑުމެންގެ ސަރުކާރެއްގައި ކުރިއަށް ގެންދަން ޖާގަ ވެސް ދީގެން ނުވާނެ،" ސޯލިހު ވިދާޅުވިއެވެ.

މިދިޔަ ސަރުކާރުން ވ. ފޮއްތެޔޮފަޅު ދޫކުރި މައްސަލައިގައި މި ސަރުކާރުން ކުރާ ތުހުމަތުތަކަށް ރައްދު ދެއްވަމުން ސޯލިހު ވިދާޅުވީ، އެ ފަޅު ކުއްޔަށް ދީގެން ދައުލަތަށް 43 މިލިއަން ޑޮލަރު ލިބުނު ކަމަށެވެ. އަދި އެ ފަޅުގައި އެއާޕޯޓެއް އެޅުމަށް ބިން ހިއްކީ ވެސް އެ ކުންފުނީގެ އަމިއްލަ ހަރަދުގައި ކަމަށާއި، އެއީ ވ. އަތޮޅުގެ ރައްޔިތުންނަށް އިންތިހާއަށް ފައިދާ ކުރާނެ މަޝްރޫއެއްކަމަށް ވިދާޅުވިއެވެ.

މީގެ އިތުރުން ނ. އަތޮޅުގައި އެއާޕޯޓް އަޅަން ދޫކުރި ފަޅު މި ސަރުކާރުން އެސްއީޒެޑްގެ ދަށަށް ބަދަލުކޮށް ޓެކްސް އިނާޔަތްތައް ދިނުމުން، ދައުލަތަށް ލިބެން އޮތް ބޮޑު އާމްދަނީއެއް ގެއްލިފައިވާކަމަށް ސޯލިހު ވިދާޅުވިއެވެ.