އެމްޑީޕީގެ ވެރިކަމެއްގައިވެސް ޕާޓީ ހިންގުމުގެ އެންމެ މަތީ ވެރިޔަކީ ޗެއާޕާސަން ކަމުގައި ކަނޑައަޅައި، ދައުލަތުގެ ރައީސުލްޖުމްހޫރިއްޔާގެ އިސް މުޝީރެއްގެ ގޮތުގައި ޗެއާޕާސަން ހަމަޖެއްސުން ލާޒިމުވާ ގޮތަށް އެ ޕާޓީގެ އަސާސީ ގަވައިދު އިސްލާހުކުރަން ނިންމައިފިއެވެ.

މިރޭ ފަށާ އެމްޑީޕީގެ ކޮންގްރެސް އަށް ހުށަހަޅާފައިވާ އާ އަސާސީ ގަވައިދުގެ ޑްރާފްޓުން ވަނީ، ޕާޓީ ވެރިކަމުގައި އޮންނަ ހިނދު ޕާޓީގެ އެންމެ އިސް ފަރާތަކީ ރައީސުލްޖުމްހޫރިއްޔާކަމަށް 2022 ވަނަ އަހަރުން ފެށިގެން އަމަލުކުރަމުން އައި އުސޫލު އުވާލައިފައެވެ. މި ބަދަލުތަކާ ގުޅޭ ބަހުސް ހޮނިހިރު ދުވަހުގެ ހެނދުނު ކުރިއަށްދާއިރު، އެ ރޭ މި އިސްލާހުތަކަށް ވޯޓަށް އަހާނެއެވެ.

އާ އިސްލާހުގައިވާ ގޮތުން ޕާޓީގެ އެންމެ އިސް ލީޑަރަކީ އަބަދުވެސް ޗެއާޕާސަންއެވެ. އަދި ޗެއާޕާސަންގެ މަގާމުގައި ހުންނަވާ ބޭފުޅަކަށް ރައީސުލްޖުމްހޫރިއްޔާގެ މަގާމު ހިމެނޭހެން ދައުލަތުގެ އެއްވެސް މުސާރަ ލިބޭ ވަޒީފާއެއް އަދާނުކުރެއްވޭނެއެވެ. މީގެއިތުރުން އެމްޑީޕީގެ ވެރިކަމެއްގައި ސަރުކާރު އެކުލަވާލުމާއި ސިޔާސަތުތައް ނިންމުމުގައި ޕާޓީގެ ގައުމީ މަޖިލީހުގެ މަޝްވަރާ ހޯދަން ރައީސުލްޖުމްހޫރިއްޔާ އެއްބަސްވުމެއްގައި ސޮއިކުރަން ޖެހޭނެކަމަށްވެސް ޑްރާފްޓުގައި ބަޔާންކޮށްފައިވެއެވެ.

ޕާޓީގެ އިދާރީ އޮނިގަނޑަށް ގެންނަ މުހިންމު ބަދަލުތަކުގެ ތެރޭގައި، ޕާޓީގެ ރައީސް އަދި ނައިބު ރައީސްގެ މަގާމު އުވާލައި، އޭގެ ބަދަލުގައި ޗެއާޕާސަންގެ ނައިބުގެ މަގާމު އަލަށް އުފެއްދުން ހިމެނެއެވެ.

އަދި މިހާރު ތިއްބަވާ މާލީ އަދި އިދާރީ ނައިބުންނާއެކު ޖުމްލަ ތިން ނައިބުން ތިއްބަވާއިރު، މީގެ ތެރެއިން އެއް މަގާމު އަންހެން ބޭފުޅަކަށް ހާއްސަކުރަން ވަނީ ލާޒިމުކޮށްފައެވެ. މީގެ އިތުރުން ޕާޓީގެ އެތެރޭގެ އިންތިހާބުތަކުގެ އިންސާފުވެރިކަން ދެމެހެއްޓުމަށްޓަކައި ހަރުދަނާ ފިޔަވަޅުތަކެއްވަނީ ހިމަނައިފައެވެ.

އެގޮތުން ޗެއާޕާސަން ހިމެނޭހެން ސެކްރެޓޭރިއަޓްގެ އެއްވެސް މުވައްޒަފަކު އެތެރޭގެ އިންތިހާބެއްގެ ކެމްޕެއިނުގައި އަމަލީ ގޮތުން ބައިވެރިވުމާއި ވަކި ކެންޑިޑޭޓަކަށް ތާއީދުކުރުންވަނީ މަނާކޮށްފައެވެ. އަދި ސެކްރެޓޭރިއަޓްގެ މުވައްޒަފަކު އިންތިހާބެއްގައި ވާދަކުރަން އެދޭ ނަމަ މަދުވެގެން އެއް މަސް ކުރިން އެކަން އަންގަންޖެހޭނެ ކަމަށާއި، އިންތިހާބުވެއްޖެ ނަމަ ވަޒީފާއިން ވަކިވާނެކަމަށް ވެސް ކަނޑައަޅާފައިވެއެވެ.

އަދި މަސްލަހަތު ފުށުއަރާ ހާލަތްތަކުގައި މުވައްޒަފުން މަސްއޫލިއްޔަތުން އެކަހެރިކުރުމުގެ ފުރިހަމަ ބާރު އިންތިހާބު ކޮމިޓީއަށް ލިބިގެންވެއެވެ.