ފީފާގެ ރައީސް ޖިއާނީ އިންފަންޓީނޯއަށް ކޮށްފައިވާ ތާއީދު، އުފަން ގައުމު ސްވިޒަލޭންޑްގެ ސްވިސް ފުޓްބޯލް އެސޯސިއޭޝަން (އެސްއެފްވީ) އިންވެސް އަނބުރާ ގެންގޮސްފިއެވެ.

މިހާރުވެސް ފީފާގެ ރައީސްކަން ކުރައްވަމުން ގެންދަވާ ކުރިއަށް އޮތް ދައުރަށް ބާއްވާ އިންތިހާބުގައިވެސް ވާދަކުރައްވާނެކަން މިހާރު ވަނީ އިއުލާނުކުރައްވައިފައެވެ. ފީފާގެ އުސޫލު ބުނާ ގޮތުން ރައީސަކަށް އެންމެ ގިނަވެގެން މަގާމު އަދާކުރެވޭނީ ތިން ދައުރަށެވެ. އިންފަންޓީނޯ 2016 އިން ފެށިގެން ފީފާގެ ރައީސްކަން ކުރައްވަމުންދާ އިރު، އޭނާ ފުރަތަމަ މަގާމާ ހަވާލުވެވަޑައިގަތީ އޭރުގެ ރައީސް ސެޕް ބްލެޓާ މަގާމުން އިސްތިއުފާ ދެއްވުމުންނެވެ. އެއީ ދައުރުގެ މެދުތެރެއިންނެވެ. އެހެންކަމުން މިއީ އިންފަންޓީނޯ އާންމު އުސޫލުގެ ދަށުން އިންތިހާބު ވެގެން ފީފާގެ ރައީސްކަން ކުރައްވާ ދެވަނަ ދައުރެވެ. ކުރިން ފަހަރު އިންފަންޓީނޯ މަގާމާ ހަވާލުވެލެއްވީ ދައުރުން ބޭރު ބޭއްވި ހާއްސަ ޖަލްސާއެއްގެ އަގުލަބިއްޔަތުންނެވެ.

އިންފަންޓީނޯއަށް ފީފާ ރައީސްކަމުގައި ބޮޑެތި ޕްރެޝަރުތަކަކާ ކުރިމަތިލައްވަން ޖެހިފައިވާ އިރު، ފީފާ ފޯވާޑް އެންޓަޕްރައިސް (އެފްއެފްއީ) ގެ ނަމުގައި އިއުލާނުކުރެއްވި ޕްލޭނާއެކު އޭނާއަށް ގިނަ ގައުމުތަކަކުން ކުރަމުން ދިޔަ ތާއީދު ވަނީ އަނބުރާ ގެންގޮސްފައެވެ. އޭގެ ތެރޭގައި މިހާރު ސްވިޒަލޭންޑްވެސް ހިމެނެއެވެ.

"ސްވިޒަލޭންޑުން ނިންމުން ނިންމާފައި ވަނީ މިދިޔަ މަސްތަކުގެ ތެރޭގައި ކަންކަންވެފައިވާ ގޮތަށް ބަލާފައި، އެކަމަށް ވަރަށް ބޮޑެތި މަޝްވަރާތަކެއްވެސް ކޮށްފައި. މަޝްވަރާތަކުން ފާހަގަވެފައި ވަނީ ފީފާގެ ލީޑާޝިޕާއި ހިންގުމަށްވެސް ބަދަލުތަކެއް އަންނަން ޖެހޭކަން. މިހާރަށްވުރެ ކަންކަން ދެފުށް ފެންނަ ގޮތަކަށް ކުރިއަށް ގެންދަން ޖެހޭކަން ސާފު،" ސްވިސް އެފްއޭއިން ބުނެފައިވެއެވެ.

މީގެ ކުރިން އިންގްލެންޑް، ވޭލްސްގެ އިތުރުން ފްރާންސާއި ސާބިއާގެ އިތުރުންވެސް ޔޫރަޕްގެ އެހެން ބައެއް ގައުމުތަކުންވެސް ދަނީ އިންފަންޓީނޯއަށް ކުރި ތާއީދު އަނބުރާ ގެންދަމުންނެވެ.